EXODUS 40 - Efik Old Bible With Sectional Headings

Edibɔp Ebiet Iduŋ Efe Esop

1EKEM Jehovah ɔdɔhɔ Moses ete, Ke akpa usen akpa ɔfiɔŋ

2ke afo ediwuk ebiet iduŋ efe esop.

3Ndien sin ekebe ntiense do, nyuŋ kɔŋ ukara ke iso ekebe.

4Nyuŋ da okpokoro nim ke esit, nyuŋ tim dori se ekpedoride ke esit; nyuŋ men uwuk utuenikaŋ nim ke esit, nyuŋ dori enye mme utuenikaŋ ke enyɔŋ.

5Ndien da itie-ufɔp incense o-gold diɔk ke iso ekebe ntiense; nyuŋ kɔŋ ikpehe ke enyin-usuŋ ebiet-iduŋ.

6Ndien diɔk itie-ufɔp uwa ke iso enyin-usuŋ ebiet-iduŋ, kpa eke efep esop.

7Nyuŋ diɔk akpaŋkpaŋ uyere mmɔŋ ke ufɔt efe esop, ye itie-uwa, nyuŋ sin mmɔŋ ke esit.

8Ndien wuk okure kanade kuk, nyuŋ kɔŋ ikpehe ke enyin-usuŋ okure.

9Ndien da aran-nyere yet ebiet-iduŋ, ye kpukpru se iduhe enye ke esit, nyuŋ nim enye ke edisana, ye kpukpru ŋkpɔ-utom esie; ndien enye eyedi edisana.

10Ndien yet itie-ufɔp uwa, ye kpukpru ŋkpɔ esie, nyuŋ nam itie-uwa asana; ndien enye eyedi ata edisana itie-uwa.

11Ndien yet akpaŋkpaŋ ye ukot esie; nyuŋ nam enye asana.

12Ndien da Aaron ye nditɔ esie, saŋa kpere enyin-usuŋ efe esop, keyet mmɔ mmɔŋ.

13Ndien sine Aaron edisana edisine-ŋkpɔ ke idem, nyuŋ yet enye aran, nyuŋ nim enye ke edisana; man enye ada oku mi.

14Da ndien nditɔ esie di kpere, nyuŋ sine mmɔ frock ke idem;

15nyuŋ yet mmɔ aran ke idem, nte emi eyetde ete mmɔ, man mmɔ eda oku mi: ndien eriyet emi afo eyetde mmɔ, iditreke ndidi eke itie oku, ke nsinsi, ke ofuri emana mmɔ.

16Ntem ke Moses anam: kpa nte Jehovah eketemede enye kpukpru ŋkpɔ, kpa ntre ke enye anam.

17Ndien edikem ke akpa ɔfiɔŋ udiana-akpa isua, ke akpa usen ɔfiɔŋ, mmɔ eneŋere ebiet-iduŋ oro ewuk.

18Ndien Moses owuk ebiet-iduŋ oro, ɔdiɔk mme socket esie, onyuŋ esin obukpɔk esie, onyuŋ akpaha mme bar esie, onyuŋ eneŋere obubɔk esie owuk.

19Enye onyuŋ ada tent ebri ke enyɔŋ ebiet-iduŋ, onyuŋ ada ufuhɔ-ŋkpɔ tent okubi enye ye enyɔŋ; kpa nte Jehovah eketemede Moses.

20Enye onyuŋ emen ŋkpɔ-ntiense esin ke ekebe, onyuŋ adian esaŋ ke ekebe, onyuŋ ada itie usio-isop okubi ke ekebe.

21Ndien enye emen ekebe edisin ke ebiet-iduŋ, onyuŋ eneŋere ukara okui, eyiri enye ke iso ekebe ntiense: kpa nte emi Jehovah eketemede Moses.

22Ndien enye ada okpokoro ɔdiɔk ke efe esop, ke ŋkaŋ ebiet-iduŋ edem edere, ke iso ukara.

23Onyuŋ ɔdiɔŋ uyo odori ke esit, ke iso Jehovah; nte emi Jehovah eketemede Moses.

24Ndien enye ada uwuk utueni-kaŋ ɔdiɔk ke efe esop, ekem, ye okpokoro, ke ŋkaŋ ebiet - iduŋ edem usuk.

25Enye onyuŋ odori mme utuenikaŋ ke iso Jehovah; nte emi Jehovah eketemede Moses.

26Ndien enye ada itie-uwa gold ɔdiɔk ke efe esop, ke iso ukara:

27onyuŋ ɔfɔp edifuɔŋ incense ke esit; nte emi Jehovah eketemede Moses.

28Ndien enye eyiri ikpehe enyin-usuŋ ebiet-iduŋ.

29Onyuŋ ɔdiɔk itie-ufɔp uwa, ekpere enyin-usuŋ ebiet-iduŋ efe esop; ndien awa edifɔp uwa ye inuak-udia ke esit; nte emi Jehovah eketemede Moses.

30Ndien enye ada akpaŋkpaŋ uyere mmɔŋ ɔdiɔk ke ufɔt efe esop ye itie-uwa, onyuŋ esin mmɔŋ uyere ke esit.

31Ndien Moses, ye Aaron, ye nditɔ esie, eyere ubɔk mmɔ, ye ukot mmɔ ke esit.

32Ke ini mmɔ edukde ke efe esop, ye ke ini mmɔ esaŋade ekpere itie - uwa, mmɔ eyere; kpa nte Jehovah eketemede Moses.

33Ndien enye eneŋere okure akan ebiet - iduŋ ye itie - uwa okuk, onyuŋ eyiri ikpehe inua - otop okure oro. Ntre ke Moses anam utom oro ama.

34Ndien obubit enyɔŋ ofuk efe esop, ubɔŋ Jehovah onyuŋ ɔyɔhɔ ke ebiet-iduŋ.

35Ndien Moses ikwe nte odukde ke efe esop; koro obubit enyɔŋ odorode ke esit, ubɔŋ Jehovah onyuŋ ɔyɔhɔ ke ebiet - iduŋ.

36Ndien adaŋemi obubit enyɔŋ odororede ke ebiet-iduŋ efep, nditɔ Israel edaŋa eka ke kpukpru isaŋ mmɔ:

37edi adaŋemi obubit enyɔŋ oro midorokede, mmɔ idaŋake, tutu osim usen emi enye odorode efep.

38Koro obubit enyɔŋ Jehovah odorode ke ebiet-iduŋ ke uwem-eyo, ikaŋ onyuŋ odoro ke esit ke okoneyo, ke iso ofuri ufɔk Israel, ke ofuri isaŋ mmɔ.