EZEKIEL 37 - Efik Old Bible With Sectional Headings

Itihere Nsat Ɔkpɔ

1UBƆK Jehovah odoro mi ke idem onyuŋ emen mi ke spirit Jehovah ɔwɔrɔ eketem ke ufɔt itihere: ndien ɔkpɔ-ɔkpɔ eyɔhɔ ke esit.

2Ndien enye ada mi asaŋa ebe akanade mmɔ okuk; ndien, sese, mmɔ ewak eti-eti ke iso itihere; ndien sese, mmɔ esat eti-eti.

3Ndien enye ɔdɔhɔ mi, ete, Eyen owo, nte mme ɔkpɔ emi emekeme ndidu uwem? Ndien ndɔhɔ nte, Ɔbɔŋ Jehovah, afo ɔmɔfiɔk.

4Ndien enye ɔdɔhɔ mi, ete, Tiŋ prophecy baŋa mme ɔkpɔ emi, nyuŋ dɔhɔ mmɔ, ete, Mbufo nsat ɔkpɔ, ekop uyo Jehovah.

5Ntem ke Ɔbɔŋ Jehovah ɔdɔhɔ mme ɔkpɔ emi, ete, Sese, ami mmɔŋ nnam ibifik oduk mbufo ke idem, ndien mbufo eyedu uwem;

6nyenyuŋ nda osip ndori mbufo, nnyuŋ nnam obuk ɔkɔri mbufo ke idem, nnyuŋ mfɔri mbufo ikpa, nnyuŋ nsin mbufo ibifik ke idem, ndien mbufo eyedu uwem; enyuŋ efiɔk ete ke ami ndi Jehovah.

7Ntre ke ami ntiŋ prophecy kpa nte eketemede mi. Ndien uyom otibe ke ini ntiŋde prophecy, ndien, sese, erinyek, ndien mme ɔkpɔ esaŋa ekpere kiet eken, ɔkpɔ adiana ɔkpɔ.

8Ndien ŋkut, ndien sese, osip ye obuk ekɔri, enyuŋ efɔri ikpa ke esit: edi spirit iduhe mmɔ ke idem.

9Ndien enye ɔdɔhɔ mi, ete, Tiŋ prophecy kot spirit, tiŋ prophecy eyen owo, nyuŋ dɔhɔ spirit, ete, Ntem ke Ɔbɔŋ Jehovah ɔdɔhɔ ete, Spirit, to ke mme ofum mbinaŋ di, furi mme akpaŋa afai emi ke idem, ndien mmɔ eyedu uwem.

10Ndien ntiŋ prophecy kpa nte enye eketemede mi; ndien spirit oduk mmɔ ke idem, ndien mmɔ edu uwem, enyuŋ edaha eda ke ukot mmɔ, ata akamba udim owo eti-eti.

11Ndien enye ɔdɔhɔ mi, ete, Eyen owo, mme ɔkpɔ emi edi ofuri ufɔk Israel. Sese, mmɔ ke edɔhɔ ete, Mme ɔkpɔ nnyin emesat, idorienyin nnyin omonyuŋ atak: emesibe nnyin efep.

12Tiŋ prophecy ndien, nyuŋ dɔhɔ mmɔ, ete, Ntem ke Ɔbɔŋ Jehovah ɔdɔhɔ, ete, Sese, ami mmɔŋ ŋkubɔre udi mbufo, nnyuŋ nsio mbufo ke udi mbufo, O ikɔt mi, nnyuŋ nda mbufo ndi ke isɔŋ Israel.

13Ndien mbufo eyefiɔk ete ke ami ndi Jehovah, ke ini ami ŋkubɔrede udi mbufo, nnyuŋ nsioŋode mbufo ke mme udi mbufo mfep, O ikɔt mi.

14Ndien nyeda spirit mi nsin mbufo ke idem, ndien mbufo eyedu uwem, nyenyuŋ nyak mbufo etie ke isɔŋ mbufo; mbufo eyenyuŋ efiɔk ete ke ami Jehovah ndɔhɔ nnyuŋ nnam: uyo Jehovah edi emi.

15Edikem uyo Jehovah osim mi, ete,

16Ndien afo eyen owo da eto kiet, nyuŋ wet “Eke Judah, ye eke nditɔ Israel nsaŋa esie,” sin ke esit: ndien da eto kiet (eŋwen), nyuŋ wet, ete, “Eke Joseph, eto Ephraim, ye ofuri ufɔk Israel nsaŋa esie,” sin ke esit:

17ndien dian mmɔ kiet ye kiet ke idem fo, man edi eto kiet; ndien mmɔ eyekabare edi kiet ke ubɔk fo.

18Ndien ke adaŋemi nditɔ obio mbufo edidɔhɔde fi, ete, Nte afo usianke nnyin nte ŋkpɔ emi esaŋade?

19Dɔhɔ mmɔ, ete, Ntem ke Ɔbɔŋ Jehovah ɔdɔhɔ, ete, Sese, ami mmɔŋ nda eto Joseph emi odude ke ubɔk Ephraim, ye mme esien Israel nsaŋa esie, nnyuŋ nda mmɔ ndori enye ke esit, kpa eto Judah, nnyuŋ nnam mmɔ edi eto kiet, ndien mmɔ eyekabare edi kiet ke ubɔk mi.

20Ndien yak eto emi afo ediwetde mmɔ ke esit edu fi ke ubɔk ke enyin mmɔ.

21Ndien dɔhɔ mmɔ, ete, Ntem ke Ɔbɔŋ Jehovah ɔdɔhɔ, ete, Sese, ami mmɔŋ nda nditɔ Israel mfep ke otu mme idut emi mmɔ esaŋade do, nnyuŋ ntaŋ mmɔ ke ŋkanŋkuk mbon, nnyuŋ nda mmɔ ndi ke isɔŋ mmɔ;

22nyenyuŋ nnam mmɔ edi idut kiet ke isɔŋ ke enyɔŋ ikpɔ obot Israel; ndien edidem kiet eyedi edidem mmɔ kpukpru: mmɔ idinyuŋ idige aba idut iba, idinyuŋ ibahakede aba mmɔ ke obio iba ke nsinsi.

23Idinyuŋ idaha aba ibɔk mmɔ ye ŋkpɔ ndek mmɔ, ye baba mme idiɔk ido mmɔ kiet isabare idem mmɔ: ndien ami nyenyaŋa mmɔ nsio ke kpukpru ebiet iduŋ mmɔ emi mmɔ ekenamde idiɔk ke esit; nnyuŋ nnam mmɔ edi edisana: ndien mmɔ eyedi ikɔt mi, ami nyenyuŋ ndi Abasi mmɔ.

24Owo mi David eyenyuŋ edi edidem mmɔ; kpukpru mmɔ eyenyuŋ enyene ɔbɔk-erɔŋ kierakiet: ndien mmɔ eyesaŋa ke mme item mi, enyuŋ ekpeme mme ewuhɔ mi, enyuŋ enam mmɔ.

25Ndien mmɔ eyeduŋ ke isɔŋ emi ŋkɔnɔde owo mi Jacob, emi mme ete mbufo ekeduŋde ke esit; ndien mmɔ eyeduŋ ke esit, kpa mmɔ ye nditɔ mmɔ ye nditɔ nditɔ mmɔ ke nsinsi:

26nyenyuŋ nnam ediomi emem ye mmɔ; eyedi nsinsi ediomi ye mmɔ; ndien nyenim mmɔ (ke itie), nnyuŋ nnam mmɔ ewak, nnyuŋ ŋwuk mmɔ edisana ebiet mi ke ufɔt ke nsinsi.

27Iduŋ mi eyenyuŋ odu ye mmɔ: ndien ami nyedi Abasi mmɔ, mmɔ eyenyuŋ edi ikɔt mi.

28Ndien mme idut eyefiɔk ete ke ami Jehovah nnam Israel esana, ke ini edisana ebiet mi odude ke ufɔt mmɔ ke nsinsi.