JOSHUA 11 - Efik Old Bible With Sectional Headings

Nditɔ Israel Ekan Jabin ye Kpukpru Mmɔ Emi Esaŋade ye Enye

1EDIKEM adaŋemi Jabin ɔbɔŋ Hazor okopde, enye ɔdɔŋ utom ke ɔtɔ Jobab, ɔbɔŋ Madon, ye ke ɔtɔ ɔbɔŋ Shimron, ye ke ɔtɔ ɔbɔŋ Hehshaph,

2ye ke ɔtɔ mbɔŋ emi edude ke edem obot edere-edere, ye ke una-isɔŋ ke edem usuk Chinneroth, ye ke unaisɔŋ edem inyaŋ, ye ke obot Dor ke edem usop-utin,

3ye ke ɔtɔ mme Canaanite ke edem usiaha-utin, ye ke edem usop-utin, ye ke ɔtɔ mme Amorite, ye eke mme Hittite, ye eke mme Perizzite, ye eke mme Jebusite, ke ikpɔ obot, ye ke ɔtɔ mme Hivite ke ukot Hermon ke isɔŋ Mizpah.

4Ndien mmɔ ewɔŋɔ ye kpukpru mbon ekɔŋ mmɔ ŋko, ata ediwak owo, ebiet ntan emi odude ke mben inyaŋ ke uwak, ye ata ediwak horse ye chariot.

5Ndien kpukpru mbɔŋ emi esop idem eka ekenam nna ekɔŋ ke ɔtɔ kiet ke mben mmɔŋ Merom, ete iŋwana ekɔŋ ye Israel.

6Ndien Jehovah ɔdɔhɔ Joshua ete, Kufehe ndik ubaŋa mmɔ: koro ke adaŋemi ini ntem mkpɔŋ ke ami ndida mmɔ kpukpru ŋwot nnim ke iso Israel; afo eyekpok mme horse mmɔ akpan osip, onyuŋ ɔfɔp mme chariot mmɔ ke ikaŋ.

7Ekem Joshua edi ye kpukpru mbon-ekɔŋ ŋko, edibuat mmɔ ke mben mmɔŋ Merom; ndien mmɔ ebumere eyi ye mmɔ.

8Ndien Jehovah emen mmɔ esin Israel ke ubɔk, ndien mmɔ ewot mmɔ, enyuŋ ebine mmɔ tutu esim ke akwa Zidon, ye ke Misrephoth-maim, ye ke itihere Mizpeh ke edem usiaha-utin; enyuŋ ewot mmɔ, tutu isuhɔke baba nsuhɔ kiet inɔ mmɔ.

9Ndien Joshua anam mmɔ kpa nte Jehovah ɔkɔdɔhɔde enye: okpok mme horse mmɔ akpan osip, onyuŋ ɔfɔp mme chariot mmɔ ke ikaŋ.

10Ndien ke ini oro Joshua afiak akada Hazor, onyuŋ owot ɔbɔŋ mmɔ ke ofut: koro Hazor ekebemde iso edi etubom kpukpru mme idut oro.

11Enye onyuŋ ada iso ofut owot kpukpru owo emi edude ke esit, osobo mmɔ fap: baba kiet eke eduɔkde ibifik isuhɔke: enye onyuŋ ɔfɔp Hazor ke ikaŋ.

12Ndien Joshua ada kpukpru obio mbɔŋ oro, ye kpukpru mbɔŋ mmɔ, onyuŋ owot mmɔ ke iso ofut, osobo mmɔ fap, kpa nte Moses owo Jehovah okowukde.

13Edi ama edi kpukpru obio emi edade ke ŋkokoŋo obot mmɔ, Israel ifɔpke mmɔ, ibɔhɔke Hazor ikpɔŋ-ikpɔŋ ke Joshua ɔkɔfɔp.

14Ndien nditɔ Israel ebume kpukpru mbume obio oro ye ufene, eda ke idem mmɔ; edi mmɔ ewot kpukpru owo ke iso ofut, tutu esobo mmɔ, isuhɔke baba ŋkpɔ kiet eke ɔduɔkde ibifik.

15Kpa nte Jehovah eketemede Moses owo esie, ntre ke Moses onyuŋ eteme Joshua, kpa ntre ŋko ke Joshua onyuŋ anam; enye ikpɔŋke baba ŋkpɔ kiet ke kpukpru se Jehovah eketemede Moses.

16Ntem ke Joshua ada ofuri edem oro, ye ikpɔ obot, ye ofuri edem usuk, ye ofuri isɔŋ Goshen, ye una-isɔŋ edem inyaŋ, ye itihere Jordan, ye ikpɔ obot Israel, ye isɔŋ edem inyaŋ esie;

17ɔtɔŋɔde ke obot Halak (Ibɔ) emi ɔdɔkde aka Seir, tutu osim Baal-gad ke itihere Lebanon ke ukot obot Hermon: enye onyuŋ omum kpukpru mbɔŋ mmɔ, onyuŋ ɔtɔ mmɔ owot.

18Joshua aŋwana ekɔŋ ye kpukpru mbɔŋ oro ediwak usen.

19Baba owo kiet eke ɔkɔŋɔde mfaŋ ɔnɔ Israel ikoduhe, ibɔhɔke mme Hivite emi eduŋde ke Gibeon: mmɔ eda kpukpru ke ekɔŋ.

20Koro okotode Jehovah, maan enye ɔsɔŋ mmɔ esit ndiŋwana ekɔŋ ye Israel, man enye osobo mmɔ, kpa nte Jehovah eketemede Moses.

21Ke ini oro Joshua onyuŋ edi edikpok nditɔ Anak ke ikpɔ obot, ke Hebron, ye ke Debir, ye ke Anab, ye ke kpukpru obot Judah, ye ke kpukpru obot Israel, efep: Joshua osobo mmɔ ye obio mmɔ.

22Isuhɔke baba eyen Anak kiet ke isɔŋ nditɔ Israel: edi esuhɔ ke Gaza, ye ke Gath, ye ke Ashdod:

23Ntem ke Joshua ada ofuri edem oro, ekem ke kpukpru se Jehovah ɔkɔdɔhɔde Moses; ndien Joshua ada enye ɔnɔ Israel ke udeme, nte mbak mmɔ ye esien mmɔ edide: ndien isɔŋ ɔduɔk odudu ekɔŋ.