ŊWED MBON ROME 15 - Efik Old Bible With Sectional Headings

Nam Ŋkpɔ Yom Ufɔn Mbon Efen Man Mmɔ Esɔŋ Eda ke Ɔbɔŋ

1EDI nnyin emi ikopde idem ikpobiom mmem-idem mbon mmem-idem, itre ndinem idem nnyin esit.

2Eyak nnyin owo kiet kiet inem mbɔhiduŋ nnyin esit ke eriyom ufɔn esie, man enye ɔkɔri ke mbuɔtidem.

3Koro Christ ŋko ikenemke idem esit; edi, kpa nte ewetde, Esuene mmɔ eke esuenede fi ɔduɔ mi ke idem.

4Koro se ededi eke ekewetde ke ini oko, ke ekewet ndida ŋkpep nnyin ŋkpɔ, man nnyin inyene idori-enyin oto ke ime ye ndɔŋ-esit eke Ŋwed Abasi ɔnɔde.

5Edi Abasi ime ye ndɔŋesit akpakam ɔnɔ mbufo ndiyene esit kiet ye kiet eken, nte Christ Jesus etemede;

6man mbufo ekpeda esit kiet ye inua kiet enɔ Abasi ye Ete Ɔbɔŋ nnyin Jesus Christ ubɔŋ.

7Mmɔdo edara kiet eken kpa nte Christ akadarede mbufo, man Abasi enyene ubɔŋ.

8Koro mmɔdɔhɔ nte Christ amakabare edi asaŋa-utom ɔnɔ mme ana-mbobi kabaŋa akpanikɔ Abasi, man anam se ekɔŋwɔŋɔde enɔ mme ete nnyin ɔsɔŋɔ ada,

9man mme Gentile enyuŋ enɔ Abasi ubɔŋ ebaŋa mbɔm Esie; nte ewetde ete,

Ke ntak emi nyenɔ Fi itoro ke otu mme Gentile,

Nyenyuŋ ŋkwɔ enyiŋ Fo.

10Onyuŋ ɔdɔhɔ ete,

Mbufo mme Gentile, edara ye ikɔt Esie.

11Onyuŋ ɔdɔhɔ ete,

Etoro Ɔbɔŋ, kpukpru mme Gentile,

Yak kpukpru mme idut etoro Enye.

12Isaiah onyuŋ ɔdɔhɔ ete,

Orun eyeto ke Jesse ɔwɔrɔ,

Edi Enye eyedaha ada ndikara mme Gentile;

Mme Gentile eyenyuŋ edori Enye enyin ke idem.

13Abasi idori-enyin akpakam ɔyɔhɔ mbufo ye kpukpru idaresit ye emem ke mbuɔtidem mbufo, man mbufo enyene uwak idori-enyin oto ke odudu Edisana Spirit.

14Edi ami ke idem mi mmotim mbure mbufo mfiɔk, nditɔ-ete mi, nte mbufo emenyene mfɔn-ido ɔyɔhɔ-ɔyɔhɔ, emenyuŋ eyɔhɔ ye kpukpru ifiɔk, enyuŋ ekeme ndinɔ kiet eken item.

15Edi nda uko ŋkan ŋwet ubak ŋwed emi nnɔ mbufo, nte owo emi etide mbufo ŋkpɔ, oto ke mfɔn eke Abasi ɔkɔnɔde mi, ete,

16ŋkpedi asaŋa-utom Christ Jesus nnɔ mme Gentile, ŋkpe-nyuŋ ŋkama gospel nte oku Abasi, man oto do eriwa mme Gentile akpakabare edi se Abasi adarade ndibɔ, sia Edisana Spirit ama anam enye asana.

17Ntem ke mmenyene se mburede ke Christ Jesus mbaŋa utom Abasi.

18Koro mmendinyeneke uko nditiŋ ŋkpɔ

19mbe se Christ akadade mi anam, ke ikɔ ye utom, ke odudu mme idiɔŋɔ ye mme utibe-ŋkpɔ ye ke odudu edisana Spirit, man mme Gentile esuk ibuot. Ntem ke mma ntɔŋɔ ke Jerusalem ŋkwɔrɔ gospel Christ ɔyɔhɔ-ɔyɔhɔ tutu ŋkanare ŋkosim Illyricum.

20Ntem ke mmaŋwana ndikwɔrɔ gospel, idige ke mme ebiet eke ema ekebem iso ekot enyiŋ Christ ke esit, mbak ndimen utom mi nnim ke se owo eŋwen ama akanam;

21edi nnam, man edi nte ewetde ete,

Mmɔ emi etop Esie akanam misimke mmɔ eyekut,

Mmɔ emi akanam mikopke eyeyuŋ efiɔk.

22Ke ntak emi ŋkpɔ ɔbiɔŋɔ mi ediwak ini nditiene mbufo:

23edi ke emi, sia mmenyeneke aba ɔtɔ nte nnamde utom ke edem emi, sia okonyuŋ ɔdɔŋde mi nditiene mbufo adaŋa ediwak isua emi,

24ini ekededi eke ndikade Spain, mmodori enyin nte nyese mbufo ke usuŋ isaŋ mi, nte mbufo eyenyuŋ eda mi ekeyak, ke mma ŋkokut ndusuk inemesit ye mbufo.

25Edi ke emi mmɔŋ ŋka Jerusalem, man nda enɔ mfɔn nsɔk ikɔt Abasi.

26Koro ama enem mbon Macedonia ye Achaia ke enyin ndinam etibe nnɔ esɔk nditɔ ubuene eni edude ke otu ikɔt Abasi ke Jerusalem.

27Edi se ikenemde mmɔ ke enyin ke akpanikɔ; mmɔ enyuŋ ekama mmɔ oro isɔn ŋko. Koro edieke mmɔ ema ekenam mme Gentile etiene mmɔ enyene udeme ke ŋkpɔ spirit, mme Gentile ekama mmɔ isɔn ndida ŋkpɔ obukidem nnɔ mmɔ nte uwa.

28Mma ŋkure mbuehe emi, mma mmen mbuŋwum emi nsin mmɔ ke ubɔk nte idiɔŋɔ utom mi, nyesaŋa ke ŋkaŋ mbufo mbe ŋka Spain.

29Ndien mmɔfiɔk nte ke adaŋemi ndidide nyeda ɔyɔhɔ eridiɔŋ Christ ndi.

30Edi mmekpe mbufo ubɔk, nditɔ-ete, ke enyiŋ Ɔbɔŋ nnyin Jesus Christ ye ke ima emi Spirit esinde nnyin ke esit, nte mbufo etiene mi eŋwana ebɔŋ akam enɔ Abasi ebaŋa mi;

31man enyaŋa mi esio ke ubɔk mmɔ eke minimke ke akpanikɔ ke Judaea, man utom eke ŋkade ndinam nnɔ ikɔt Abasi ke Jerusalem onyuŋ enem mmɔ esit;

32man ŋkpedi ke ɔtɔ mbufo ye idaresit oto ke erinyime Abasi, ŋkponyuŋ ntie ntre ye mbufo mbɔ nduɔk-odudu.

33Abasi emem akpakam odu ye mbufo kpukpru. Amen.