2 NDIDEM 23 - Efik Old Bible With Sectional Headings

Edidem Josiah Osioŋo Ofuri Ŋkpoduoho Mme Esen Abasi Ɔfɔp

1EKEM edidem ɔdɔŋ ekekot kpukpru mbiowo Judah, ye eke Jerusalem, ete esop idem ke ɔtɔ imɔ.

2Ndien edidem ɔdɔk aka ke ufɔk Jehovah, ye kpukpru owo Judah, ye kpukpru mme andiduŋ Jerusalem ŋko, ye mme oku, ye mme prophet, ye owo akpaimɔ, mbɔ ye mbuot: ndien enye emen kpukpru ikɔ ŋwed ediomi oro ekekutde ke ufɔk Jehovah etiŋ ke utɔŋ mmɔ.

3Ndien edidem ada adiana adaha, onyuŋ anam ediomi ke iso Jehovah, ete iyetiene Jehovah, inyuŋ inim ibet esie, ye item esie, ye mme ewuhɔ esie, ke ofuri esit, ye ke ofuri ukpɔŋ, inyuŋ inam ikɔ ediomi emi ekewetde ke ŋwed emi. Ndien kpukpru owo eda ke ediomi.

4Ndien edidem owuk Hilkiah akwa oku, ye mme oku udiana-akpa udim, ye mme andikpeme enyin-usuŋ, ete esio kpukpru mkpoduoho oro ekenamde enɔ Baal, ye Asherah, ye ofuri udim enyɔŋ, ke ufɔk Jehovah efep: ndien enye ɔfɔp mmɔ ke edem Jerusalem ke iŋwaŋ Kidron, ndien ada ntɔŋ mmɔ aka ke Beth-el

5Enye onyuŋ osobo mme oku ndem oro ndidem Judah ekenimde, ye ke mme ebiet emi ekande Jerusalem ekuk; ye mmɔ eke efɔpde uwa enɔ Baal, ye utin, ye ɔfiɔŋ, ye ntantafiɔŋ, ye ofuri udim enyɔŋ.

6Enye onyuŋ osio mbiet Asherah ke ufɔk Jehovah, ɔwɔrɔ ke edem Jerusalem aka ke ebedeŋ Kidron, ɔkɔfɔp enye ke ebedeŋ Kidron, onyuŋ anuak enye emem, ndien ada ntan esie asuan ke mme udi nditɔ mbio-obio.

7Enye onyuŋ owuri mme ufɔk mbon-use eke edude ke ufɔk Jehovah, eke iban edɔkde ufɔk enɔ mbiet Asherah.

8Enye onyuŋ anam kpukpru oku eto ke mme obio Judah edi, onyuŋ asabare kpukpru edikoŋ ebiet emi mme oku ekam efɔpde uwa do, ɔtɔŋɔde ke Geba, tutu osim ke Beer-sheba, onyuŋ owuri mme edikoŋ ebiet inua-otop oro okodude ke inua-otop Joshua etubom obio, enye oro okodude owo ke ubɔk ufien ke inua-otop obio.

9Edi mme oku edikoŋ ebiet idɔkke ke itie-uwa Jehovah ke Jerusalem, edi mmɔ eta uyo eke leaven miduhe ke otu nditɔ-ete mmɔ.

10Enye onyun asabara Topheth, emi odude ke ebedeŋ nditɔ Hinnom, man owo baba kiet okunam eyen-eren esie, ye eyen esie aŋwan ebe oduk ke ikaŋ ɔnɔ Molech.

11Enye onyuŋ osobo mme horse oro ndidem Judah ekedade enɔ utin ke ebiet emi edukde ke ufɔk Jehovah, ekpere ubet Nathan-melech eunuch emi odude ke okure: enye onyuŋ ɔfɔp mme chariot utin ke ikaŋ.

12Edidem onyuŋ owuri mme itie-uwa oro edude ke ɔkɔm ubet enyɔŋ Ahaz, emi ndidem Judah ekenamde, ye mme itie-uwa oro Manasseh akanamde esin ke esien mbiba ke ufɔk Jehovah, onyuŋ osio mmɔ ke ebiet oro, anuak emem, ada ɔkɔduɔk ke ebedeŋ Kidron.

13Edidem onyuŋ asabare mme edikoŋ ebiet oro edude ke iso Jerusalem, mmɔ oro edude ke edem nnasia obot mbubiam, emi Solomon edidem Israel ɔkɔbɔpde ɔnɔ Ashtoreth, mbubiam ŋkpɔ mme Zidonian, ye Chemosh, mbubiam ŋkpɔ Moab, ye Milcom mbubiam ŋkpɔ nditɔ Ammon.

14Enye onyuŋ obom mme adaha, onyuŋ asiak mme eto-mkpe, onyuŋ esin ɔkpɔ owo ke itie mmɔ ɔyɔhɔ.

15Ndien ŋko ama edi itie-uwa oro odude ke Beth-el, ye edikoŋ ebiet oro Jeroboam eyen Nebat, emi ekesinde Israel ediɔk, akanamde, kpasuk itie-uwa oro ye edikoŋ ebiet oro ke enye okowuri, onyuŋ ɔfɔp edikoŋ ebiet oro, onyuŋ anuak enye emem, onyuŋ ɔfɔp eto-mkpe.

16Ndien Josiah akabare ese mme udi emi edude do ke obot, ndien ɔdɔŋ ekesioŋo mme ɔkpɔ ke mme udi oro, ada mmɔ efɔp ke mme itie-uwa oro, onyuŋ asabare enye, ekem ke uyo Jehovah oro owo Abasi ɔkɔkwɔrɔde, emi ɔkɔkwɔrɔde ŋkpɔ emi.

17Ndien enye obup, ete, Nsidi adaha oro ŋkutde? Ndien mbio-obio oro edɔhɔ enye, ete, Ke edi udi owo Abasi oro okotode ke Judah ɔkɔkwɔrɔde ŋkpɔ emi afo anamde itie-uwa Beth-el.

18Ndien enye ɔdɔhɔ, ete, Mbufo eyak enye ana; owo baba kiet okutuk mme ɔkpɔ esie. Ntre ke mmɔ eyak mme ɔkpɔ esie, ye mme ɔkpɔ prophet oro okotode ke Samaria.

19Ndien ŋko ama edi mme ufɔk edikoŋ ebiet oro edude ke mme obio Samaria, mmɔ oro ndidem Israel ekenamde, enyuŋ eyat Jehovah esit, oro ke Josiah osio efep, onyuŋ anam mmɔ, kpa nte enye akanamde Beth-el kpukpru ŋkpɔ.

20Enye onyuŋ ada kpukpru oku edikoŋ ebiet eke edude do, owot ke mme itie-uwa oro, onyuŋ ɔfɔp mme ɔkpɔ owo ke esit, ndien ɔnyɔŋ ke Jerusalem.

21Ekem edidem owuk kpukpru owo, ete, Mbufo enam passover enɔ Jehovah Abasi mbufo, kpa nte ewetde ke ŋwed ediomi emi.

22Akanam inamke oruk passover nte emi, toto ke ini mme ebiere-ikpe emi ekekpede ikpe Israel, ye ke ofuri eyo edidem Israel, ye eke ndidem Judah;

23ibɔhɔke ke ɔyɔhɔ isua edidem Josiah efureta, ke mmɔ ekenam passover emi enɔ Jehovah ke Jerusalem.

24Ndien ŋko Josiah onyuŋ osobo mme ebre idiɔŋ ekpo owo, ye mbon idiɔk ifiɔk, ye mme teraphim, ye mme nsu-nsu abasi, ye kpukpru mbubiam ŋkpɔ eke ekutde ke idut Judah ye ke Jerusalem, kpaŋ enye ekpenam ikɔ mbet emi ewetde ke ŋwed emi Hilkiah oku ɔkɔfiɔhɔde ke ufɔk Jehovah.

25Ndien baba edidem kiet eke ebietde enye akanam ibemke enye iso, emi akabarede etiene Jehovah ke ofuri esit esie, ye ke ofuri ukpɔŋ esie, ye ke ofuri odudu esie, nte ofuri ibet Moses eketemede; baba kiet eke ebietde enye akanam inyuŋ itieneke edem idaha ida.

26Edi Jehovah ikabakede ikpɔŋ ikaŋ akwa iyaresit esie, emi enye ayatde esit ye Judah, abaŋa kpukpru eriyat oro Manasseh akadade ayat enye.

27Jehovah onyuŋ ɔdɔhɔ, ete, Nyemen Judah ŋko ke iso mi mfep, kpa nte ŋkemende Israel mfep, nyenyuŋ mmen obio emi ŋkemekde, kpa Jerusalem, ye ufɔk emi ŋkɔdɔhɔde, nte ke enyiŋ mi edidu do, nduɔk.

28Ndien ama edi ikɔ Josiah eke ɔsuhɔde, ye kpukpru se enye akanamde, nte ikewetke mmɔ isin ke ŋwed ikɔ eyo ndidem Judah?

29Ke eyo esie Pharaoh-necoh edidem Egypt ɔdɔk aka ke akpa Euphrates, ndiŋwana ekɔŋ ye edidem Assyria ndien edidem Josiah aka ɔkɔbiɔŋɔ enye: ndien Pharaoh owot enye ke Megiddo, ke ini okutde enye.

30Ndien ikɔt esie edori okpo esie ke chariot ke Megiddo, ebiom edi ke Jerusalem, edibuk enye ke udi esiemɔ: ndien mbio-obio eda Jehoahaz eyen Josiah, eyet enye aran, enim enye ke itie ete esie.

31Jehoahaz edi isua edip ye ita ke ini enye adade ubɔŋ; enye onyuŋ edi edidem ke Jerusalem ke ɔfiɔŋ ita: ndien enyiŋ eka esie ekere Hamutal, eyen Jeremiah a Libnah.

32Enye onyuŋ anam idiɔk ke iso Jehovah, kpa nte mme ete esie ekenamde kpukpru.

33Ndien Pharaoh-necoh esin enye ke ŋkpɔkɔbi ke Riblah ke idut Hamath, ke ini enye adade ubɔŋ ke Jerusalem, onyuŋ adia isɔŋ isop talent silver ikie, ye talent gold kiet.

34Ndien Pharaoh-necoh emen Eliakim eyen Josiah onim ke edidem ke itie Josiah ete esie, onyuŋ ɔkpuhɔre enye enyiŋ okot Jehoiakim; onyuŋ ada Jehoahaz ɔnyɔŋ: ndien enye osim Egypt,

35onyuŋ akpa do. Ndien Jehoiakim ɔnɔ Pharaoh silver ye gold oro; edi enye ɔkɔm ɔnɔ obio, man ekeme ndinɔ silver oro ke uyo Pharaoh: enye anam mbio-obio etibe silver ye gold, kpukpru owo nte ekɔmde enɔ mmɔ, man ada ɔnɔ Pharaoh-necoh.

36Jehoiakim osim isua edip ye ition ke ini enye adade ubɔŋ; ndien edi edidem ke Jerusalem ke isua duopekiet: ndien enyiŋ eka esie ekere Zebidah, eyen Pedaiah a Rumah.

37Enye onyuŋ anam idiɔk ke iso Jehovah, kpa nte mme ete esie ekenamde kpukpru.