DANIEL 6 - Efik Old Bible With Sectional Headings

Etop Daniel Esin ke Obube Mme Lion

1DARIUS ama ndinim mbɔŋ ikie ye edip, ete ekan obio, man mmɔ ekama ofuri obio.

2Enye onyuŋ onim ikpɔ owo ita, ete ekama mme mmɔ emi, ndien Daniel edi owo mmɔ kiet, man mbɔŋ emi ebuk mbuk enɔ mmɔ, man ŋkpɔ edidem ekubiara.

3Ndien Daniel emi akan mbɔŋ ye ikpɔ owo emi: koro ata eti spirit odude enye ke idem: ndien edidem ekere ndinim enye ke akama ofuri obio.

4Ndien ikpɔ owo ye mbɔŋ oro esin ubɔk eyom ndikut ikɔ eke ekpedoride Daniel ke edem ŋkpɔ obio; edi mmɔ ikemeke ndikut baba ŋkpɔ kiet ye idiɔk ido kiet eke ekpedoride enye, koro enye edide owo akpanikɔ, ndien mmɔ ikwe baba ndudue kiet, ye baba idiɔk ido kiet eke ekpedoride enye.

5Ndien mbon oro edɔhɔ, ete, Nnyin idikwe baba ŋkpɔ kiet eke idade idori Daniel emi, ke mibɔhɔke ke ikɔ mbet Abasi esie ke nnyin idikut se idade idori enye.

6Ndien ikpɔ owo ye mbɔŋ emi esop idem ke ɔtɔ edidem, enyuŋ edɔhɔ ntem ye enye, ete, Edidem Darius, itɔŋ uwem akpakam ɔsɔŋ fi ke nsinsi.

7Kpukpru ikpɔ owo obio, ye mme andikara, ye mbɔŋ, ye mme andinɔ item, ye mme etubom emediomi ete iwuk ewuhɔ edidem, inyuŋ inam isɔŋ-ikɔ, ite, Emen owo ekededi eke edibeŋede abasi mme owo ekededi ebeŋe, ke ofuri usen edip ye duop, ke midige afo ikpɔŋ ke ebeŋe, O edidem, eda enye eduɔk ke obube mme lion.

8O edidem, nam ndien isɔŋ-ikɔ emi, nyuŋ sin enyiŋ ke ŋwed, man ekukpuhɔre enye, nte mme ewuhɔ nditɔ Media ye nditɔ Persia esaŋade, emi mikemeke ndikpu-hɔre.

9Mmɔdo edidem Darius esinde enyiŋ esie ke ŋwed oro ye ke ibet oro.

10Ekem ke adaŋemi Daniel ɔfiɔkde ete ke emesin enyiŋ ke ŋwed, enye oduk ke ufɔk esie, ekeberere window ubet enyɔŋ esie ke edem emi esede Jerusalem; ndien enye ɔtɔŋɔ edɔŋ esie utim ikata ke usen, onyuŋ ɔbɔŋ akam, onyuŋ ɔnɔ ekɔm ke iso Abasi esie kpasuk nte enye akam esinamde.

11Ekem mbon oro esop idem edikut ete ke Daniel ɔbɔŋ akam, onyuŋ anam mkpe-ubɔk ke iso Abasi esie.

12Ndien mmɔ esaŋa ekpere, enyuŋ edɔhɔ ke iso edidem ebaŋa isɔŋ-ikɔ edidem, ete, Nte afo ukesinke enyiŋ ke isɔŋ-ikɔ, ete ke emen owo ekededi eke edibeŋede abasi ekededi mme owo ekededi ebeŋe ke ofuri usen edip ye duop, ke mibɔhɔke afo, O edidem, eda eduɔk ke obube mme lion? Edidem ɔbɔrɔ onyuŋ ɔdɔhɔ ete, ikɔ oro edi akpanikɔ nte asaŋade ye mme ewuhɔ Media ye persia, emi mikemeke ndikpuhɔre.

13Ndien mmɔ ebɔrɔ enyuŋ edɔhɔ ke iso edidem, ete, Daniel emi otode ke nditɔ mme Jew emi eketaŋde edi, ibatke fi, O edidem, ke baba ŋkpɔ kiet inyuŋ ibatke isɔŋ-ikɔ oro afo ekesinde enyiŋ ke esit, edi enye anam mkpeubɔk utim ikata ke usen.

14Ndien adaŋemi edidem okopde ikɔ oro, enye ayat esit eti-eti ye idem esie: enye onyuŋ odori Daniel esit esiemɔ, ete inyaŋa enye: onyuŋ aŋwana ndinyaŋa enye tutu osim ini emi utin osopde.

15Ndien mbio oro esop idem ke ɔtɔ edidem, enyuŋ edɔhɔ edidem, ete, O edidem, fiɔk ete ke edi ido nditɔ Media ye Persia, ete ke ikemeke ndiwuhɔre baba isɔŋ-ikɔ ye baba ewuhɔ kiet eke edidem owukde.

16Ndien edidem ɔnɔ uyo, ndien eda Daniel edi ediduɔk ke obube mme lion. Edidem ɔbɔrɔ onyuŋ ɔdɔhɔ Daniel, ete, Abasi fo emi afo anamde ŋkpɔ esie kpukpru ini, eyenyaŋa fi.

17Ndien mmɔ eda itiat kiet edori ke inua obube oro; ndien edidem ada ufik ŋwed esiemɔ ye eke ikpɔ owo esie onim idiɔŋɔ ke esit; man ekukpuhɔre uduak emi abaŋade Daniel.

18Ndien edidem ɔnyɔŋ ke ufɔk esiemɔ, onyuŋ etre udia ofuri okoneyo, inyuŋ iyakke eda ŋkpɔ mbre edi ke iso esie: idap onyuŋ atiam enye.

19Ndien eyo esiere, edidem abak adaha ke enyɔŋ, ɔsɔp ukot aka ke obube mme lion.

20Ndien adaŋemi enye osimde obube oro, enye ada uyo mbɔm eseme okot Daniel. Edidem ɔbɔrɔ onyuŋ ɔdɔhɔ Daniel, ete, O Daniel, owo Abasi uwem, nte Abasi fo emi afo anamde ŋkpɔ esie kpukpru ini, emekeme ndinyaŋa fi mbɔ mme lion?

21Ndien Daniel ɔdɔhɔ edidem, ete, O edidem, itɔŋ uwem osuk ɔsɔŋ fi ke nsinsi.

22Abasi mi ɔmɔdɔŋ angel esie edikubi mme lion inua, ndien mmɔ inamke mi baba idiɔk ŋkpɔ kiet: koro ekutde ete ke nnyeneke se nduede ke iso esie; ndien, ŋko, O edidem, nnamke baba idiɔkŋkpɔ kiet ke iso fo.

23Ndien esit adat edidem eti-eti abaŋa enye, enye onyuŋ ɔnɔ uyo, ete, ekot Daniel esio ke obube. Ntre ke mmɔ ekot Daniel esio ke obube: ndien ikwe baba ŋkpɔ kiet eke anamde enye ke idem; koro enye ɔkɔbuɔtde idem ye Abasi esie.

24Ndien edidem ɔnɔ uyo, ete eda mbon oro ekedoride Daniel ikɔ edi, ndien eda mmɔ ye nditɔ mmɔ ye iban mmɔ ediduɔk ke obube mme lion: ndien mme lion emum mmɔ, enyuŋ enuak kpukpru mme ɔkpɔ mmɔ, ke mmɔ mika-isimke isɔŋ obube.

25Ndien Darius edidem ewet ɔnɔ kpukpru mme idut, ye obio, ye usem eke eduŋde ke ofuri ererimbot, ete, Emem mbufo akpakam awak.

26Mmowuk ewuhɔ nte ke kpukpru ebiet eke ndide ɔbɔŋ ye edidem, yak owo ebak enyuŋ efehe Abasi Daniel: koro edi enye edi Abasi uwem, enye onyuŋ ebigi ke nsinsi, ubɔŋ esie onyuŋ edi se midibiarake, ndien enye eyedi edidem ke nsinsi.

27Enye anyaŋa onyuŋ osio, onyuŋ anam mme idiɔŋɔ ye mme utibe ŋkpɔ ke enyɔŋ ye ke isɔŋ, emi akanyaŋade Daniel osio ke ubɔk mme lion.

28Ntem ke Daniel emi oforo ke eyo ubɔŋ Darius, ye ke eyo uboŋ Cyrus persian.