LEVITICUS 6 - Efik Old Bible With Sectional Headings

Uwa Usio Isop Ke Ini Eduede Mbɔhiduŋ Fo

1NDIEN Jehovah ɔdɔhɔ Moses, ete, Adaŋemi owo eduede,

2onyuŋ anam se minenke ye Jehovah, onyuŋ akaŋ se mbɔhiduŋ esie ɔbuɔtde enye, mme ke ŋkpɔ ubiɔŋ, mme ke ŋkpɔ mbume, mme enye anam mbɔhiduŋ esie nnama;

3mme ke enye onyuŋ okutde ŋkpɔ eke osopde, onyuŋ akaŋ enye, onyuŋ otomo esin ke nsu; ke abaŋa ŋkpɔ emi ekededi eke owo akam anamde, onyuŋ eduede ke esit:

4ama ekem, adaŋemi enye eduede ntem, onyuŋ enyenede isop, enye enyene ndien ndiyak mbume emi enye obumede, ye ŋkpɔ nnama emi enye akanamde, mme ebuɔt eke ekebuɔtde enye, mme ŋkpɔ emi osopde, emi enye ɔfiɔhɔde:

5mme ŋkpɔ ekededi emi enye okotomo esin ke nsu; ndien yak enye ada iso ŋkpɔ oro, onyuŋ ɔkɔrɔ ɔyɔhɔ ubak ition ke esit, osio usiene ɔnɔ andinyene, ke usen usio-isop esie.

6Ndien yak enye ada ŋkpɔ isop esie ɔsɔk Jehovah, kpa okukim erɔŋ eke ɔfɔnde ama, eke otode ke ŋkpri ufene, nte afo ɔkɔmde, ke ŋkpɔ isop, ada etiene oku:

7ndien oku edisio isop esie ke iso Jehovah; ndien eyefen enye ke ŋkpɔ ekededi eke enye anamde ke eridue ke esit.

8Ndien Jehovah ɔdɔhɔ Moses, ete

9Teme Aaron ye nditɔ esie, ete, Ewuhɔ edifɔp uwa, edi emi enye edi edifɔp uwa, koro ɔfɔbɔde ke ikaŋ ke itie-uwa ke ofuri okoneyo, tutu eyo esiere; yak ikaŋ itie-uwa onyuŋ asak ke esit.

10Ndien yak oku esine linen ekura esie, onyuŋ esine linen ɔfɔŋ-ukot ke obukidem esie, ndien osio ntɔŋ eke ikaŋ akatade edifɔp uwa anam ke itie-uwa, efep, ɔkpɔnɔre onim ke ŋkaŋ itie-uwa.

11Ndien enye osio edisine-ŋkpɔ esie ke idem efep, onyuŋ esine edisine-ŋkpɔ efen ndien emen ntɔŋ oro ɔwɔrɔ aka ke edem nna ke edisana ebiet.

12Ndien yak ikaŋ ke enyɔŋ itie-uwa osuk asak ke esit, okunime; edi yak oku esin ifia ke esit kpukpru usenubɔk, onyuŋ ɔdiɔŋ edifɔp uwa odori ke esit; onyuŋ ɔfɔp ikpɔŋ mme uwa emem ke esit.

13Yak ikaŋ asak ke itie-uwa kpukpru ini; okunime.

14Emi onyuŋ edi ewuhɔ inuak-udia: yak nditɔ Aaron eda enye edi ke iso Jehovah, ke iso itie-uwa.

15Ndien yak enye owobi ndom-uyo inuak-udia, ye aran, ɔyɔhɔ ubɔk esie ke esit, ye kpukpru frankinsence eke odorode ke inuak-udia, onyuŋ ɔfɔp editi ubak esie ke itie-uwa, edinem utebe, ɔnɔ Jehovah.

16Ndien Aaron ye nditɔ esie edia ubak eke ɔsuhɔde; yak edia enye ke edisana ebiet, ekusin leaven; ke okure efe esop ke edidia enye. Ekusin leaven esaŋ enye.

17Mmada enye nnɔ mmɔ ke udeme uwa ikaŋ mi; enye edi ata edisana ŋkpɔ, nte uwa idiɔk ido, ye nte uwa isop.

18Kpukpru irenowo ke otu nditɔ Aaron edidia enye. Edi nsinsi ewuhɔ mme uwa ikaŋ Jehovah ke ofuri emana mbufo: kpukpru owo eke etukde mmɔ eyekabare edisana.

19Ndien Jehovah ɔdɔhɔ Moses, ete, Emi edi enɔ Aaron,

20ye eke nditɔ esie, eke mmɔ edidade esɔk Jehovah, toto ke usen eke eyetde enye aran; omer eti ndom-uyo kiet ke inuak-udia kpukpru ini, ubak esie ke usenubɔk, ye ubak esie eken ke mbubreyo.

21Yak eda ukwak-usaŋ-uyo enam enye, esin aran; enyuŋ ekaŋ enye, eda edi; da edisaŋ inuak-udia mbak-mbak di nɔ Jehovah ke edinem utebe.

22Ndien yak owo nditɔ esie emi eyetde aran enim enye ke ibuot ke oku, anam enye: ke edi nsinsi ewuhɔ Jehovah; yak efɔp enye kpukpru.

23Yak enyuŋ efɔp kpukpru uwa udia oku ofuri-ofuri: ekudia enye.

24Ndien Jehovah ɔdɔhɔ Moses, ete,

25Dɔhɔ Aaron ye nditɔ esie ete, Ewuhɔ uwa idiɔk ido edi emi: yak ewot uwa idiɔk ido ke ebiet emi ewotde edifɔp uwa ke iso Jehovah: enye edi ata edisana ŋkpɔ.

26Oku eke awade enye edita enye: ke edisana ebiet ke enye edita enye, ke okure efe esop.

27Kpukpru owo eke etukde unam esie ekabare edisana: ndien edieke owo osimede iyip esie ke edisine-ŋkpɔ esie, da ŋkpɔ eke osimede iyip ke esit, yet ke edisana ebiet.

28Edi yak ebom eso eke etemde enye ke esit: edi edieke etemde enye ke eso okpoho, yak etuk enye, enyuŋ eyet ke mmɔŋ.

29Kpukpru irenowo ke otu mme oku edita enye; enye edi ata edisana.

30Edi ekuta baba uwa idiɔk ido emi edade iyip esie eduk ke efe esop, ndisio isop ke esit ke edisana ebiet: yak efɔp enye ke ikaŋ.