1 ŊWED CORINTH 14 - Efik Old Bible With Sectional Headings

Enɔ Owo Ndisiak Uduak Abasi Ye Ndisem Usem ke Edeme

1EBINE ima; enyuŋ eyom enɔ eke spirit ye ofuri esit mbufo, edi eyom ekan ndisiak uduak Abasi.

2Koro owo eke esemde usem itiŋke inɔ owo, edi etiŋ ɔnɔ Abasi; koro baba owo kiet ikopke, edi enye etiŋ ndibe-ndibe ikɔ ke spirit esie.

3Edi owo eke asiakde uduak Abasi etiŋ se inamde owo ɔkɔri ke ifiɔk, ye se isɔŋɔde owo esit, ye se inɔde owo idɔŋesit.

4Owo eke esemde usem anam idem esie ɔkɔri ke ifiɔk; edi owo eke asiakde uduak Abasi anam ufɔk Abasi ɔkɔri ke ifiɔk.

5Mmama mbufo kpukpru esem usem, edi ɔdɔŋ mi akan ete mbufo ekpesiak uduak Abasi. Koro asiak-uduak-Abasi akan owo eke esemde usem, ibɔhɔke esem-usem akabare se enye etiŋde, man anam ufɔk Abasi ɔkɔri ke ifiɔk.

6Edi nte edide ke emi, Nditɔ-ete, edieke ndide ke ɔtɔ mbufo nsem usem, nso udori ke nda nsɔk mbufo, adaŋa nte mmenemeke ŋkpɔ ye mbufo ke usuŋ eriyarare, mme ke usuŋ ifiɔk, mme ke usuŋ erisiak-uduak Abasi, mme ke usuŋ erikpep-ŋkpɔ?

7Ŋkɔm kpa mme ŋkpɔ eke minyeneke uwem, nte ifiom ye ndido-uruk eke esiorode uyo, edieke mmɔ misinke ukpuhɔre ke uyom eke mmɔ enamde, owo edinam didie ɔfiɔk se efride ke ifiom mme se ebrede ke ndido-uruk?

8Koro edieke obukpoŋ osiorode uyo eke owo midiɔŋɔke se ɔwɔrɔde, anie editim idem ebeŋe ekɔŋ?

9Ntre ŋko, edieke mbufo midaha edeme mbufo isem usem eke ememde owo idem ndikop, edisaŋa didie efiɔk se mbufo etiŋde?

10Koro mbufo eŋwaŋa ikɔ mbufo eduɔk ke ofim. Ŋkɔm usem ewak oruk eti-eti ke ererimbot, kpukpru mmɔ kiet kiet enyuŋ enyene se mmɔ ewɔrɔde.

11Ntre edieke mme-ndfiɔŋɔke se ikɔ eke owo etiŋde ɔwɔrɔde, nyedi esen owo ke enyin anditiŋ, anditiŋ eyenyuŋ edi esen owo ke enyin mi.

12Mmɔdo ndien, sia ɔsɔŋɔde ɔdɔŋ mbufo edinyene enɔ eke spirit, eyom uwak enɔ eke spirit emi edinamde ufɔk Abasi ɔkɔri ke ifiɔk.

13Yak owo eke esemde usem ndien ebeŋe ete, imɔ idikeme ndikabare se itiŋde.

14Koro edieke mbɔŋde akam ke usem, edi spirit mi ke ɔbɔŋ akam; edi ekikere esit mi isioŋoke mfri.

15Ɔwɔrɔ didie ndien? Nyebɔŋ akam ke spirit, nyenyuŋ mbɔŋ akam ke ekikere esit mi; nyekwɔ itoro ke spirit, nyenyuŋ ŋkwɔ itoro ke ekikere esit mi.

16Koro edieke afo otorode Abasi ke spirit, owo eke mimeheke ye usem edinam didie ibɔrɔ ite Amen idian ye ekɔm fo, sia enye mifiɔkke se afo ɔdɔhɔde?

17Ke akpanikɔ afo ototim ɔnɔ ekɔm, edi owo efen isioho ifiɔk ke esit ikɔri.

18Mmɔkɔm Abasi koro mmesem usem ŋkan mbufo kpukpru;

19edi ke ufɔk Abasi mkpakam nda ekikere esit mi ntiŋ ikɔ ition ŋkpep mmɔ eŋwen ŋkpɔ, ŋkan nditiŋ thousand ikɔ duop ke esen usem.

20Nditɔ-ete mi, ekudi nditɔwɔŋ ke ekikere, edi ke erinam ibak etie nte nsek nditɔ; edi ke ekikere etie nte ikpɔ owo.

21Ke ŋwed ibet ewet ntem ete, Jehovah ɔdɔhɔ ete, Nyeda mmɔ emi esemde esen usem ye mkpɔk-inua isen owo ntiŋ ŋkpɔ ye mbio emi; edi kpa ke ini nnamde ntem, mmɔ idikopke uyo Mi.

22Ntem ke enim ete erisem usem edi idiɔŋɔ, inaŋa inɔ mmɔ emi enimde ke akpanikɔ, edi ana ɔnɔ mmɔ emi minimke ke akpanikɔ. Edi erisiak-uduak-Abasi ana ɔnɔ mmɔ emi enimde ke akpanikɔ, inaŋa inɔ mmɔ emi minimke ke akpanikɔ.

23Mmɔdo kini ofuri ufɔk Abasi obonode, edieke kpukpru owo esemde usem, mmɔ emi mimeheke ye usem ye mmɔ emi minimke ke akpanikɔ enyuŋ edukke edi, nte mmɔ ididɔhɔke ite, ibuot abiara mbufo?

24Edi edieke kpukpru mbufo esiakde uduak-Abasi, ndien owo emi minimke ke akpanikɔ minyuŋ ifiɔkke ŋkpɔ oduk edi, ikɔ mbufo kpukpru eyeyarare idem esie owut enye, onyuŋ odomo enye;

25ndibe ŋkpɔ eke edude enye ke esit ewɔrɔ ke aŋwa; ntem ke enye eyeduɔ okibi iso esie ke isɔŋ, onyuŋ atuak ibuot ɔnɔ Abasi, onyime aŋwa-aŋwa ete Abasi odu ke otu mbufo ke akpanikɔ.

26Didie ke mbufo ekpenam ŋkpɔ ndien, nditɔ-ete? Ke adaŋemi mbufo ebonode, owo kiet ye psalm, enye eken ye ukpep-ŋkpɔ, owo emi ye ikɔ eriyarare, enye oko ye usem, enye eken nde ye ukeme erikabare usem; ke erinam kpukpru, eyom ŋkɔri ufɔk Abasi.

27Ama edi mme esem usem, yak edi owo iba, mme owo ita ke ŋwak-ŋkan, esem usem ke esop kiet; mmɔ enyuŋ etiŋ ke iduɔk ke iduɔk; owo onyuŋ akabare se mmɔ etiŋde.

28Edi edieke akabare-usem miduhe ɔfɔn esem-usem okibi inua etie suŋ-ŋ ke ufɔk Abasi, onyuŋ eneme nneme ye idem esie ye Abasi.

29Ama edi mme asiak-uduak-Abasi, owo iba mme ita etiŋ ikɔ, mmɔ eken enyuŋ ekere se mmɔ etiŋde.

30Edieke eyararede ŋkpɔ enɔ owo efen emi etiede tie, yak akpan anditiŋ odop uyo.

31Mbufo kpukpru emekeme ndisiak uduak-Abasi ke iduɔk ke iduɔk, man kpukpru owo ebɔ ukpep-ŋkpɔ, enyuŋ ekop ndɔŋ-esit;

32ndien spirit mme asiak-uduak-Abasi esine ke idak erikara mme asiak-uduak-Abasi.

33Koro Abasi idige Abasi ndutime, edi edi Abasi emem; nte ido edide ke kpukpru mme ufɔk mbon Abasi.

34Yak iban edop uyo etie suŋ ke ufɔk Abasi; koro iyakke mmɔ etiŋ ikɔ; mmɔ enyene ndidu ke nsuk-idem, nte ibet etemede.

35Edieke ɔdɔŋde mmɔ ndikpep ŋkpɔ ekededi, yak mmɔ ebup ebe mmɔ ke ufɔk: koro ɔwɔrɔ esuene ŋwan nditiŋ ikɔ ke ufɔk Abasi.

36Mme eyom ndineni nte ikɔ Abasi okoto mbufo ɔwɔrɔ osim mmɔ eŋwen? Mme ndi mbufo ikpɔŋ ke ikɔ Abasi okosim?

37Edieke owo abatde idem ete idi asiak-uduak-Abasi inyuŋ inyene spirit, yak enye ɔfiɔk ete se ŋwetde nnɔ esɔk mbufo edi uyo Ɔbɔŋ.

38Edieke owo mfiɔkke uyo Ɔbɔŋ yak enye amana etre ndifiɔk.

39Mmɔdo nditɔ-ete, eyom ndisiak uduak-Abasi ke ofuri esit mbufo, ekunyuŋ ebiɔŋɔ owo ndisem usem;

40edi enam kpukpru ŋkpɔ ke nde ye ke ido nte eyede.