1 CHRONICLES 22 - Efik Old Bible With Sectional Headings

Edidem David Anam Ndutim Nte Edibɔpde Temple

1NDIEN David ɔdɔhɔ, ete, Emi edi ufɔk Jehovah Abasi emi onyuŋ edi itie edifɔp-uwa Israel.

2Ndien David ɔdɔhɔ ete ebon isen owo eke edude ke isɔŋ Israel; enye onyuŋ onim mbon usɔ-itiat eke ediɔŋde itiat ubɔp ufɔk Abasi.

3David onyuŋ obon ediwak ukwak, ke eke ɔkpɔ ukwak itim enyin-usuŋ, ye ke eke ntok; ye ediwak okpoho emi midomoke;

4ye eto cedar eke minyeneke ibat: koro mbio Zidon ye eke Tyre edade eto cedar ediwak esɔk David.

5Ndien David ɔdɔhɔ, ete, Solomon eyen mi edi ekpri eyen-ɔwɔŋ, inyuŋ isɔŋke, ndien ufɔk eke ekpebɔpde enɔ Jehovah enyene ndikpon eti-eti, man enye enyene etop ye itoro ke otu kpukpru mme idut; yak ami mbon ndien ŋkpɔ nnɔ enye. Ntre ke David obon ediwak ŋkpɔ ke enye mika-ikpaha kaŋa.

6Ekem enye okot Solomon eyen esie edi, ndien eteme enye, ete ɔbɔp ufɔk ɔnɔ Jehovah Abasi Israel.

7Ndien David ɔdɔhɔ Solomon eyen esie, ete, Ŋkɔm okodu mi ke esit ndibɔp ufɔk nnɔ enyiŋ Jehovah Abasi mi:

8edi uyo Jehovah okosim mi, ete, Afo ama ɔduɔk iyip ediwak, ama onyuŋ aŋwana ikpɔ ekɔŋ: idige afo edibɔp ufɔk ɔnɔ enyiŋ mi, koro ama ɔduɔk ediwak iyip ke isɔŋ ke iso mi.

9Sese, eyen eyemana ɔnɔ fi eke edidide owo nduɔk-odudu; nyenyuŋ nnam enye ɔbɔhɔ kpukpru mme asua esie eke ekande enye ekuk, ɔduɔk odudu: koro enyiŋ esie eyekere Solomon, ndien nyenɔ Israel ifure ke eyo esie.

10Enye eyebɔp ufɔk ɔnɔ enyiŋ mi; eyenyuŋ odu ye ami nte eyen, ami nyenyuŋ ndu ye enye nte ete; nyenyuŋ ŋwuk ebekpo ubɔŋ esie ke Israel ke nsinsi.

11Yak Jehovah ndien akam odu ye afo, eyen mi; afo akam onyuŋ okut unen, onyuŋ ɔbɔp ufɔk Jehovah Abasi fo, kpa nte enye ɔkɔdɔhɔde abaŋa fi.

12Yak Jehovah akam ɔnɔ fi ikike ye asian, onyuŋ eteme fi abaŋa Israel, man afo onim mbet Jehovah Abasi fo.

13Afo eyekut unen, ndien, edieke edikpemede ndinim mme ewuhɔ ye mme item emi Jehovah okowukde Moses abaŋa Israel: sɔŋ esit, sɔŋ idem; kufehe, kunyuŋ udikhe.

14Ndien, sese, ke ukut mi mma mbon tɔsin talent gold ke itie ikie, nnɔ ufɔk Jehovah, ye tɔsin talent silver ke itie tɔsin; edi idomoke okpoho ye ukwak: koro mmɔ ewakde eti-eti; mma nnyuŋ mbon eto ye itiat; afo eyenyuŋ adian efen ke mmɔ.

15Mbon utom ediwak enyuŋ edu ye afo, mme ndisɔi-itiat, ye mbon usɔ-eto, ye kpukpru owo eke efiɔkde kpukpru oruk utom.

16Ndien idomoke gold, ye silver, ye okpoho, ye ukwak. Daha ke enyɔŋ nam, ndien Jehovah eyedu ye afo.

17Ndien David owuk kpukpru mbɔŋ Israel, ete eŋwam Solomon eyen imɔ, ete,

18Nte Jehovah Abasi mbufo iduhe ye mbufo? nte enye ikɔnɔŋɔ mbufo nduɔk-odudu ikan ikuk? koro enye ama ada mme andiduŋ isɔŋ esin mi ke ubɔk; isɔŋ onyuŋ osuk ibuot ke iso Jehovah, ye ke iso ikɔt esie.

19Mbufo esin ndien esit mbufo, ye ukpɔŋ mbufo, eyom Jehovah Abasi mbufo: edaha ke enyɔŋ ndien, ebɔp edisana iduŋ Jehovah Abasi, enyuŋ eda ekebe ediomi Jehovah, ye edisana ŋkpɔ utom Abasi, enim ke ufɔk eke ebɔpde enɔ enyiŋ Jehovah.