1 ŊWED CORINTH 9 - Efik Old Bible With Sectional Headings

Kubɔp Enaŋ Inua, Ke Ini Enye Edigide Ibokpot

1NTE nnyeneke unen ndinam nte mmade? Nte ndige apostle? Nte ŋkekwe Jesus Ɔbɔŋ nnyin? Nte mbufo idige ubɔk-utom mi ke Ɔbɔŋ?

2Edieke mmendige apostle nnɔ owo eŋwen, ndi apostle nnɔ mbufo; koro mbufo edi idiɔŋɔ itie-apostle mi ke Ɔbɔŋ.

3Oro edi ibɔro nyaŋa-idem eke mbɔrɔde mmɔ eke edomode mi.

4Nte nnyin inyeneke unen ndidia nnyuŋ ŋŋwɔŋ ŋkpɔ?

5Nte nnyin inyeneke unen ndida ŋwan emi edide eyen-ete nte nsaŋa nnyin, kpa nte mme apostle eken, ye nditɔ-ete ke Ɔbɔŋ, ye Cephas enamde?

6Mme nte ami ikpɔŋ ye Barnabas inyeneke unen nditre utom ndinam?

7Ewe owo-ekɔŋ akanam ada okuk esiemɔ aka ekɔŋ? Anie ɔtɔ iŋwaŋ vine, ndien etre ndidia mbuŋwum eke otode ke esit?

8Anie ɔbɔk erɔŋ, ndien etre ndiŋwɔŋ mmɔŋeba erɔŋ? Nte ntiŋ ikɔ emi nte edide ido owo nditiŋ? mme nte ibet idɔhɔke kpa ntre?

9Koro ewet ke ibet Moses ete, Kubɔp enaŋ inua, ke ini enye edigide ibokpot. Ndi enaŋ ke Abasi ekere abaŋa?

10Mme nte Enye ɔdɔhɔ emi kabaŋa ufɔn nnyin ofuri-ofuri? Ke akpanikɔ ewet kabaŋa ufɔn nnyin; koro odotde ofuŋ-isɔŋ ofuŋ isɔŋ ye idori-enyin, onyuŋ odotde otim-ibokpot otim ye idori-enyin ete inyenyene udeme udia.

11Edieke nnyin ikɔtɔde se idide ŋkpɔ spirit inɔ mbufo, mme edi akwa ŋkpɔ ke nnyin idɔkde se idide ŋkpɔ obukidem mbufo?

12Edieke owo eŋwen enyenede unen emi ke idem mbufo, nte nnyin inyeneke ikan?

Edi nnyin ikanamke nte nnyin inyenede unen ndinam. Nnyin ikam ibiom kpukpru ŋkpɔ, mbak nnyin idisin ŋkpɔ ɔbiɔŋɔ gospel Christ ndika iso.

13Nte mbufo ifiɔkke ite mmɔ emi enamde utom temple edadia se itode ke temple? mmɔ emi edade mbet itie-uwa ebuana udeme-udia ye itie-uwa?

14Kpa ntre ke Ɔbɔŋ ebiere onim, ete mmɔ emi ekwɔrɔde gospel ekpeda se itode ke gospel edu uwem.

15Edi ami ŋkadaha mme ŋkpɔ emi baba kiet ŋkama idem; nnyuŋ ŋwetke mme ikɔ emi man ekpeda mmɔ enam ntre ye ami: koro ɔfɔn ye ami ndikpa, akan ndiyak baba owo kiet anam mbure mi akabare ɔwɔrɔ ikpikpu.

16Koro edieke ŋkwɔrɔde gospel, nnyeneke ntak mbure; utom oro obiomo mi ke idem nte ŋkpɔ eke nnyenede ndinam; koro idifɔnke fɔn inɔ mi edieke mmeŋkwɔrɔke gospel.

17Koro edieke nnamde utom emi ke erinyime esit mi, mmenyene utip; edi edieke mmenamke ke erinyime esit, ntie nte akama-ukpɔhɔre emi eyakde utom esin enye ke ubɔk, ete anam.

18Utip mi edi nso ndien? ete, ke ŋkwɔrɔde gospel, ŋkpɔnɔ enye ke mfɔn, ŋkunyuŋ nda ɔyɔhɔ odudu itie mi ke gospel.

19Koro okposuk edi nte mmensineke baba owo kiet ke idak, mmoduk ufin nnɔ kpukpru owo, man nduri owo nda awak akan.

20Mmakabare ntie ye mme Jew nte eyen Jew, man nduri mme Jew nda. Ye mmɔ emi esinede ke idak ibet, mmakabare ntie nte owo eke odude ke idak ibet, okposuk edi nte ami ke idem mi mmenduhe ke idak ibet, man nduri mmɔ oro edude ke idak ibet nda.

21Ye mmɔ emi minyeneke ibet ke ntie nte owo eke minyeneke ibet, idige nte ndianarede ŋkpɔŋ ibet Abasi, edi nsine ke idak ibet Christ, man nduri mmɔ oro minyeneke ibet nda.

22Mmakabare ntie ye mbon mmemidem nte owo mmemidem, man nduri mbon mmemidem nda. Mmakabare ndi kpukpru ŋkpɔ nnɔ kpukpru owo, man nte ededi ŋkpekeme ndinyaŋa ndusuk mmɔ.

23Nanam kpukpru ŋkpɔ kabaŋa gospel, man ami nde nnyene udeme ke esit.

24Nte mbufo ifiɔkke ite edi kpukpru mbon itɔk efehe mbuba, edi edi owo kiet ɔbɔ utip. Efehe ndien ke usuŋ nte edibɔde utip.

25Owo ekededi eke onyuŋ aŋwanade mbɔk akama idem ke ufat ke kpukpru usuŋ. Ndien mmɔ enam emi ndibɔ anyanya eke edibiarade; edi nnyin inam man ibɔ anyanya eke midibiarake.

26Ntre ndien ke ami mfehe mbuba; mfeheke nte owo eke minyeneke iwuk ebiet eke enye akade: ntem ŋko ke ntop ita; ntopke nte owo ɔtɔde ofim;

27edi ntɔŋɔ idem mi ita, nnam enye oduk ufin, mbak, ke mma ŋkɔkwɔrɔ nnɔ owo eŋwen, ke usuŋ ekededi edisio mi ke idem mi eduɔk.