ŊWED MBON PHILIPPI 4 - Efik Old Bible With Sectional Headings

Ikɔ Nnɔ-Item: Edat Esit ke Ɔbɔŋ Kpukpru Ini

1NTRE nditɔ-ete, emi mmade, nnyuŋ ŋkopde udɔŋ mbufo, idara mi ye anyanya mi, esɔŋɔ eda ntem ke Ɔbɔŋ, ndima mi.

2Mmɔnɔ Euodia item, mmonyuŋ nnɔ Syntyche item, nte mmɔ enyene esit kiet ke Ɔbɔŋ.

3Mmonyuŋ nsɔŋɔ mbeŋe fi, ata nsaŋa-utom mi, nte aŋwam iban oro, koro mmɔ ekesaŋade ye ami eŋwana eŋwan ebaŋa gospel, enyuŋ ediana ye Clement nde, ye mme nsaŋa-utom mi eken, emi enyiŋ mmɔ edude ke ŋwed uwem.

4Edat esit ke Ɔbɔŋ kpukpru ini; nyetɔŋɔ ntak ndɔhɔ, Edat esit.

5Eyak kpukpru owo ekut ete emetim ekara esit mbufo. Ɔbɔŋ ke ekpere.

6Ekutimere esit ke baba ŋkpɔ kiet, edi ke kpukpru ŋkpɔ, esaŋa ye akam ye mkpe-ubɔk ye ekɔm, esian Abasi se mbufo eyomde.

7Ndien emem Abasi, emi ayaŋade ifiɔk owo, eyekpeme mbufo esit ye ekikere ke Christ Jesus.

8Ke akpatre item, nditɔ-ete, ŋkpɔ ekededi eke edide akpanikɔ, ye ŋkpɔ ekededi eke enyenede ukpono, ye ŋkpɔ ekededi eke enende, ye ŋkpɔ ekededi eke edide edisana, ye ŋkpɔ ekededi eke odotde ete ema, ye ŋkpɔ ekededi eke ɔwɔrɔde eti etop; edieke eti ido odude ke ŋkpɔ, edieke itoro onyuŋ odude, ekere ŋkpɔ oro.

9Se mbufo ekekpepde ekenyuŋ ebɔde mi ke ubɔk, enyuŋ ekopde enyuŋ ekutde ete nanam, mbufo etiene enam; ndien Abasi emem eyedu ye mbufo.

10Mmedat esit ke Ɔbɔŋ eti-eti, koro mbufo emetɔŋɔ ntak edemere ekikere mbufo ebaŋa mi: ke akpanikɔ mbufo ema ekekere, edi mbufo ikekwe ifet unam-ŋkpɔ.

11Ntiŋke nte owo unana; koro mmekpep nditie ke oruk itie ekededi eke ntiede ye inem.

12Mmɔdiɔŋɔ ndidu ke usuhɔre-itie, mmonyuŋ ndiɔŋɔ ndinyene ŋkpɔ uwak-uwak. Ke kpukpru itie ye ke kpukpru ebiet, emehe mi ndidia nyuhɔ, ndiyuŋ ntie biɔŋ; ndinyene ŋkpɔ uwak-uwak, ndiyuŋ nnana ŋkpɔ.

13Mmenyene ukeme ndinam kpukpru ŋkpɔ ke odudu Andisɔŋɔ mi idem.

14Edi mbufo emotim enam ke emi mbufo ekebuanade ye ami ke ukut mi.

15Mbufo mbon Philippi emenyuŋ efiɔk ete, ke ini gospel osimde mbufo ke akpa, ke ini ntode Macedonia ndi, ndomo ufɔk Abasi kiet idukke nduk ye ami ke erinɔnɔ mme eribɔbɔ ŋkpɔ, ke mibɔhɔke mbufo ikpɔŋ-ikpɔŋ.

16Koro kpa ke idem ini ndude ke Thessalonica, mbufo ekɔnɔ ŋkpɔ-mfɔn esɔk mi utim ikaba ndiŋwam mi ke unana mi.

17Idige nte nyom enɔ, edi nyom mbufo eŋwum mfri eke edidiɔŋde diɔŋ ɔwɔrɔ mbufo udori.

18Edi mmenyene kpukpru ŋkpɔ uwak-uwak; mmɔyuhɔ, sia mma ŋkɔbɔ enɔ mbufo ke ubɔk Epaphroditus; ata edinem ufuɔŋ ke edi, uwa eke Abasi adarade, onyuŋ enemde Enye esit eti-eti ndibɔ.

19Abasi mi eyenɔ mbufo kpukpru se inanade mbufo ɔyɔhɔ-ɔyɔhɔ, nte inyene eke Enye enyenede ke ubɔŋ edide ke Christ Jesus.

20Ubɔŋ enyene Abasi ye Ete nnyin ke nsinsi-nsinsi. Amen.

21Ekɔm kpukpru ikɔt Abasi eke edude ke Christ Jesus.

22Nditɔ-ete eke edude ye ami ete ekɔm mbufo. Kpukpru ikɔt Abasi ete ekɔm mbufo, akpan-akpan mbon ufɔk Caesar.

23Mfɔn Ɔbɔŋ Jesus Christ akpakam odu ye mbufo ke spirit.