1 NDIDEM 7 - Efik Old Bible With Sectional Headings

Ediedem Solomon Ɔbɔp Ufɔk Esie ye Mme Ufɔk Efen

1SOLOMON onyuŋ ada isua duopeta ɔbɔp ufɔk esiemɔ; enye onyuŋ ama ofuri ufɔk esie.

2Enye ɔbɔp ufɔk akai Lebanon ŋko: uniɔŋ esie edi ibio-idomo-okuk ikie, ubom esie edi ibio-idomo-okuk aba ye duop, idaha esie onyuŋ edi ibio-idomo-okuk edip ye duop, odori enye ke udim obubɔk cedar inaŋ, onyuŋ odori beam a-cedar ke obubɔk.

3Ndien eda cedar efuk enye ke enyɔŋ ubet emi edude ke ŋkaŋ, emi edorode ke ɔbubɔk aba ye ition, efut ke udim, efut ke udim.

4Ye beam udim ita emi enade ukem-ukem, utim ikaba.

5Kpukpru usuŋ ye obubɔk enyin-usuŋ edi beam emi esɔide ukukem, etie ukem-ukem utim ikata.

6Enye onyuŋ ada obubɔk anam etehe; uniɔŋ esie edi ibio-idomo-okuk aba ye duop, ye ubom esie ibio-idomo-okuk edip ye duop: etehe efen, ye obubɔk, ye asaŋudɔk, enyuŋ edu mmɔ ke iso.

7Enye onyuŋ anam etehe ebekpo eke edikpede ikpe do, kpa etehe ikpe: mmɔ enyuŋ eda cedar ekɔŋ ofuri isɔŋ etehe oro.

8Ndien enye anam ufɔk esie eke enye oduŋde do ke esien eken ke esit etehe, kpa nte anamde emi. Solomon onyuŋ anam ufɔk ebiet etehe emi, ɔnɔ adiaha Pharaoh emi enye ɔkɔdɔde.

9Ekebɔp kpukpru mme mmɔ emi ke ɔsɔŋ-urua itiat, ekem ke idomo nte esɔide mmɔ, emi eyɔkde ke uyɔkŋkpɔ ke esit ye ke edem, onyuŋ ɔtɔŋɔde ke isɔŋ ufɔk tutu osim ke ukot ufɔk, onyuŋ ɔtɔŋɔde ke edem-esa tutu osim ke akwa okure.

10Ndien mmɔ eda ɔsɔŋ-urua itiat, ikpɔ itiat, itiat ibio-idomo-okuk duop, ye itiat ibio-idomo-okuk itia ita etɔŋɔ ndibɔp.

11Ndien ɔsɔŋ-urua itiat eke ekemde idomo nte esɔide mmɔ, ye cedar, edu ke enyɔŋ.

12Ndien mmɔ enam akwa okure emi akande okuk, ke udim edisɔi itiat ita, ye ke udim beam cedar kiet, kpa nte emi enamde okure ufɔk Jehovah emi odude ke esit-esit, ye ke etehe ufɔk.

13Ndien edidem Solomon ɔdɔŋ ekeda Hiram ke Tyre edi.

14Enye ekedi eyen ebekpa kiet emi okotode ke esien Naphtali, edi ete esie edi eyen Tyre, owo usɔ okpoho: ndien eti ibuot ɔyɔhɔ enye ke idem, ye asian, ye ifiɔk, ke erinam kpukpru oruk utom okpoho. Ndien enye aka ke ɔtɔ edidem Solomon, akanam kpukpru utom esie.

15Ndien enye atara okpoho anam adaha iba, emi idaha adaha kiet edide ibio-idomo-okuk efureta: uruk ibio-idomo-okuk duopeba onyuŋ akanade adaha eken okuk.

16Enye onyuŋ atara okpoho anam mbuot iba eke edoride ke enyɔŋ mme adaha oro: idaha ibuot kiet edi ibio-idomo-okuk ition, ibio-idomo-okuk ition onyuŋ edi idaha ibuot eken oro:

17ye iyire emi enamde nsiŋede-nsiŋede, ye uruk emi enamde nte ŋkpɔkɔbi esin ke mbuot emi edorode ke enyɔŋ mme adaha; itiaba ke ibuot kiet, itiaba ke ibuot kiet eken.

18Ndien enye anam mme adaha esin udim pomegranate iba akan okuk ke iyire kiet, ndifuk ibuot emi odorode ke enyɔŋ; ntem ke enye onyuŋ anam ibuot eken.

19Ntre ke enye anam mbuot eke edorode ke enyɔŋ mme adaha ke etehe, ebiet lily, ibio-idomo-okuk inaŋ.

20Ndien mmɔ enyuŋ enam mbuot emi edorode ke enyɔŋ adaha iba, ke ɔtɔ isobo ye idibi emi odorode ke iyire, esin pomegranate ikie iba ke udim, ke udim, eke ekanade mbuot mbiba ekuk.

21Ekem enye eneŋere mme adaha owuk ke etehe temple: owuk adaha nnasia, osio enye enyiŋ Jachin (Eyesɔŋ onim); onyuŋ owuk adaha ufien, osio enyiŋ Boaz (Odudu ke esit).

22Enye onyuŋ anam mbuot adaha oro ebiet lily: ntem ke ema utom mme adaha.

23Enye onyuŋ atara okpoho anam mkpɔdiɔhɔ-mmɔŋ; enye edi ibio-idomo-okuk duop ɔtɔŋɔde ke mben kiet osim mben eken, ekara-ekara; idaha esie edi ibio-idomo-okuk ition, uruk ibio-idomo-okuk edip ye duop onyuŋ akanade enye okuk.

24Ikpɔk-ekpo enyuŋ edu enye ke idak mben ekan ekuk, duop ke ibio-idomo-okuk, ekabare ekan mkpɔdiɔhɔ-mmɔŋ ekuk: enam mbiet ikpɔk-ekpo esin ke udim iba, ke adaŋoro etarade enye enam.

25Enye odoro ke enaŋ duopeba, enaŋ ita ekabare ese edere, ita enyuŋ ese edem usop-utin, ita ese usuk, ita enyuŋ ese edem usiaha-utin: ntre ke mkpɔdiɔhɔ-mmɔŋ odoro mmɔ ke edem, kpukpru isim mmɔ enyuŋ edu ke esit.

26Ndien udop esie etie nte eka-ubɔk kiet, mmɔ enyuŋ enam mben esie nte mben cup, mfri ikɔŋ lily: enye oduk tɔsin gallon efut.

27Enye onyuŋ ada okpoho anam udiɔhɔ-ŋkpɔ duop; uniɔŋ udiɔhɔ ŋkpɔ kiet edi ibio-idomo-okuk inaŋ, ubom esie edi ibio-idomo-okuk inaŋ, ndien idaha esie edi ibio-idomo-okuk ita.

28Ndien ntem ke mmɔ enam udiɔhɔ-ŋkpɔ oro: mmɔ enyene panel, ndien mme panel esine ke ufɔt mben.

29Ndien lion, ye enaŋ, ye cherubim edu ke panel emi esinede ke ufɔt mben oro: ukot onyuŋ odoro ke enyɔŋ mben oro: ndien enam nyeriye eke ekɔŋɔde ke idak mme lion ye enaŋ oro.

30Ndien udiɔhɔ-ŋkpɔ kiet enyene wheel okpoho inaŋ ye axle okpoho: ndien ukot inaŋ esie enyene afara: mmɔ enam afara oro ke eritara ke idak akpaŋkpaŋ, kiet kiet ke edem nyeriye.

31Ndien inua esie oduk ke ibuot, onyuŋ ɔwɔrɔ ke enyɔŋ ibio-idomo-okuk kiet: ndien inua esie etie ekara-ekara, onyuŋ etie nte enamde udiɔhɔ-ŋkpɔ, ekem ye ibio-idomo-okuk ye ubak; mmɔ enyuŋ ekap mben esie; mme panel mmɔ enyuŋ edi ukukem,Idige ekara-ekara.

32Ndien mme wheel inaŋ oro etie ke idak mme panel; ubɔk mme wheel enyuŋ emum udiɔhɔ-ŋkpɔ oro: ndien idaha wheel kiet edi ibio-idomo-okuk kiet ye ubak.

33Ndien enam mme wheel oro nte enamde wheel a-chariot, ubɔk mmɔ, ye mme felloe mmɔ, ye mme spoke mmɔ, ye mme nave mmɔ, etara ŋkpɔ enam kpukpru.

34Ndien udiɔhɔ-ŋkpɔ kiet enyene afara inaŋ ke inuk esie inaŋ: mme afara esie edi idem kiet ye udiɔhɔ-ŋkpɔ.

35Ndien enam mben adaha, ubak ibio-idomo-okuk ekara-ekara, ekan ekuk, ke enyɔŋ udiɔhɔ-ŋkpɔ: ndien ubɔk esie ye panel esie ke enyɔŋ ibuot udiɔhɔ-ŋkpɔ edi idem kiet ye enye.

36Enye onyuŋ akap cherubim, ye lion, ye eyop, esin ke eka-ubɔk esie, ye ke panel esie, nte ufaŋ kiet kiet etiede, onyuŋ anam nyeriye esin akan okuk.

37Ntem ke enye a nam mme udiɔhɔ-ŋkpɔ duop: atara mmɔ kpukpru anam ubɔk kiet, ye idomo kiet, ye oruk kiet.

38Ndien enye ada okpoho anam akpaŋkpaŋ duop: akpaŋkpaŋ kiet oduk gallon ikie ita: akpakpaŋ kiet edi ibio-idomo-okuk inaŋ: akpaŋkpaŋ kiet odoro mme udiɔhɔ-ŋkpɔ duop kiet kiet.

39Ndien enye ada udiɔhɔ-ŋkpɔ ition ɔdiɔk ke edem ufɔk nnasia. Ɔdiɔk ition ke edem ufɔk ufien: enye onyuŋ ɔdiɔk mkpɔdiɔhɔ-mmɔŋ ke edem ufɔk nnasia, ke edem usiaha-utin, asak iso ese edem usuk-usuk.

40Ntre ke Hiram anam mme akpaŋ-kpaŋ, ye mme uwobi-ntɔŋ, ye mme bason.

Ntem ke Hiram anam ofuri usɔ enye akanamde ɔnɔ Solomon edidem, ke eke ufɔk Jehovah, ama;

41mme adaha mbiba, ye idibi mbuot emi edorode ke enyɔŋ mme adaha;

42ye iyire iba oro efukde idibi mbuot emi edorode ke enyɔŋ mme adaha; ye mme pomegranate iba ke iyire kiet eke ofukde mme bowl mbuot iba, emi edude ke iso mme adaha;

43ye mme udiɔhɔ-ŋkpɔ duop, ye akpaŋkpaŋ duop emi edorode ke mme udiɔhɔ-ŋkpɔ;

44ye mme mkpɔdiɔhɔ mmɔŋ kiet, ye enaŋ duopeba emi edude mkpɔdiɔhɔ-mmɔŋ oro ke idak;

45ye mme eso, ye uwobi-ntɔŋ, ye mme bason; ndien kpukpru ŋkpɔ oro Hiram akanamde ɔnɔ Solomon edidem ke eke ufɔk Jehovah, edi edisem okpoho.

46Edidem atara mmɔ aŋwaŋa ke itihere Jordan, ke isɔŋ mbat ke ufɔt Succoth ye Zarethan.

47Ndien Solomon ɔkpɔŋ kpukpru ŋkpɔ oro; koro mmɔ ewakde ekan: mmɔ itimke ifiɔk udobi okpoho.

48Ndien Solomon anam kpukpru mkpoduoho ufɔk Jehovah; kpa itie-uwa o-gold, ye okpokoro o-gold emi uyo iso odorode,

49ye mme uwuk-utuenikaŋ, ition ke nnasia, ye ition ke ufien, ke eti gold, ke iso ubet-etak, ye edisiaha mfri, ye mme utuenikaŋ, ye mme ufat-ikaŋ, ke ata eti gold;

50ye mme cup, ye mme udiɔŋ-utuenikaŋ, ye mme bason, ye mme ikpaŋidaŋ, ye mme censer, ke ata eti gold; ye afara-ikut o-gold, ke eke itim ufɔk emi odude ke esit-esit, kpa eke ata edisana ebiet, ye eke itim ata ufɔk, kpa temple.

51Ntem ke ofuri utom ufɔk Jehovah oro Solomon edidem anamde, okure. Ndien Solomon emen ŋkpɔ oro David ete esie okonimde, esin ke esit; ada silver, ye gold, ye mkpoduoho esin ke ebiet unim-ŋkpɔ ufɔk Jehovah.