1 SAMUEL 30 - Efik Old Bible With Sectional Headings

David Aŋwana Ekɔŋ ye Mbon Amalek Onyuŋ Akan Mmɔ

1EDIKEM adaŋemi David ye ikɔt esie esimde Ziklag ke ɔyɔhɔ usen ita, mme Amalekite ema ekedi ekɔŋ ke edem usuk, ye ke Ziklag, enyuŋ esuan Ziklag,

2enyuŋ efɔp enye ke ikaŋ: enyuŋ etaŋ iban eke edude ke esit, ŋkpri ye ikpɔ, mmɔ iwotke baba owo kiet, edi eda mmɔ enyɔŋɔ ekemɔ.

3Ekem David ye ikɔt esie edisim obio: ndien, sese, ema ekefɔp obio ke ikaŋ; ema enyuŋ etaŋ iban mmɔ, ye nditɔ mmɔ iren ye iban enyɔŋɔ.

4Ndien David ye mmɔ eke edude ye enye, emenere uyo mmɔ etua eyet, tutu enana odudu eyet.

5Ema enyuŋ etaŋ iban David mbiba, kpa Ahinoam ŋwan a Jezreel, ye Abigail aŋwan Nabal Carmelite:

6ndien David etie ke ata itie ukut: koro kpukpru owo edɔhɔde ete itɔŋɔ enye ke itiat; koro esit ayatde kpukpru owo abaŋa nditɔ mmɔ iren ye iban: edi David ɔsɔŋɔ esit esie ke Jehovah Abasi esie.

7Ndien David ɔdɔhɔ Abiathar oku, eyen Ahimelech, ete, Mbɔk, da ephod di nɔ mi. Ndien Abiathar ada ephod edi ke ɔtɔ David.

8Ndien David obup Jehovah, ete, Nte ndibine udim owo emi? Nte ndisim mmɔ? Ndien enye ɔdɔhɔ enye, ete, Bine: koro afo mudutreke ndisim mmɔ,

9nnyuŋ mbɔ mmɔ kpukpru. Ndien David asaŋa ye owo ikie itiokiet oro edude ye enye, ndien mmɔ ekesim idim Besor, ndien mmɔ eke esuhɔde etuak eda do.

10Edi David ye owo ikie inaŋ ebine: ndien owo ikie iba emi ekpɔtde, ndien mikemeke ndibe idim Besor, etie do.

11Ekem mmɔ ekut eyen Egypt kiet ke ikɔt, enyuŋ eda enye esɔk David; enyuŋ enɔ enye uyo ata, ye mmɔŋ ɔŋwɔŋ;

12enyuŋ enɔ enye ubak ebok fig, ye ebok edisat grape iba: ndien adaŋemi enye adiade, ukpɔŋ eset enye: koro enye mikadiaha ŋkpɔ, mikonyuŋ iŋwɔŋke mmɔŋ ke uwemeyo ita ye okoneyo ita.

13Ndien David obup enye, ete, Anie enyene fi? Afo onyuŋ oto mmɔŋ? Enye ɔdɔhɔ ete, Ami ndi eyen Egypt, ofin Amalekite kiet; ndien ete mi ɔkɔkpɔŋ mi, koro ŋkɔdɔŋɔde ke usen ita.

14Nnyin ika ekɔŋ ke edem usuk mme Cherethite, ye ke se inyenede Judah, ye ke edem usuk Caleb; inyuŋ ifɔp Ziklag ke ikaŋ.

15Ndien David obup enye, ete, Nte afo edida mi ɔsuhɔre edisim udim emi? Ndien enye ɔbɔrɔ ete, Tomo Abasi nɔ mi, ete ke afo uduwotke mi, udunyuŋ udaha mi usin ete mi ke ubɔk, ndien nyeda fi nsuhɔre ŋkosim udim oro.

16Ekem adaŋemi enye akadade enye ɔsuhɔre, sese, mmɔ efuk ofuri iso isɔŋ, ke edia ŋkpɔ, enyuŋ eŋwɔŋ, enyuŋ enek unek, ebaŋa adaŋa ekese mbume oro mmɔ ekebumede ke isɔŋ mme Philistine, ye ke isɔŋ Judah.

17Ndien David owot mmɔ ɔtɔŋɔde ke mfuŋ-mfuŋ mbubreyo tutu osim ke mbubreyo mkpɔŋ: baba owo mmɔ kiet ibɔhɔke, ke mibɔhɔke mkparawa ikie inaŋ, emi edorode ke camel efeŋe.

18Ndien David anyaŋa kpukpru se Amalek ekedade: David onyuŋ anyaŋa iban esie mbiba.

19Eke mmɔ baba kiet inyuŋ itakke, ekpekpri, okpokpon, mme nditɔ-iren, mme nditɔ-iban, mme mbume, mme kpukpru se mmɔ ekedade ke idem mmɔ:

20David anyaŋa kpukpru. David onyuŋ ada kpukpru ŋkpri ufene, ye enaŋ; ndien mmɔ ebine mmɔ ke iso ufene idem mmɔ, enyuŋ edɔhɔ ete, Mbume David edi emi.

21Ekem David okosim owo ikie iba oro ekekpɔtde ekan nte esaŋade ye David, emi mmɔ ekenyuŋ enamde etie ke mben idim Besor: ndien mmɔ ewɔŋɔ ndisobo ye David, ndinyuŋ nsobo ye mbon oro edude ye enye: ndien adaŋemi David osimde mmɔ, enye ɔkɔm mmɔ.

22Ndien kpukpru mme idiɔk ye mme oburobut owo ke otu mbio oro ekesaŋede ye David, ebɔrɔ, ete, Koro mmɔ mikasaŋake ye nnyin, nnyin ikunɔ mmɔ ubak mbume emi nnyin ikanyaŋade, ke mibɔhɔke nnyin ndinɔ kiet kiet ŋwan esie ye nditɔ esie, man eda mmɔ enyɔŋ.

23Ndien David ɔdɔhɔ ete, Nditɔ-ete mi, mbufo ekunam ntem ke se Jehovah ɔnɔde nnyin, emi okonyuŋ ekpemede nnyin, onyuŋ emende udim oro okotode edi ndiŋwana ye nnyin, esin nnyin ke ubɔk.

24Anie owo ŋko edikop uyo mbufo ke ikɔ emi? Ŋkɔm udeme andisuhɔre ke ekɔŋ eyekem ke udeme anditie ye mkpɔduɔhɔ: mmɔ eyeda udeme ukem-ukem.

25Ndien edi ntre toto ke usen oro, onyuŋ aka iso: enye (David) onyuŋ onim enye ke ewuhɔ ye ido ke Israel tutu osim mfin emi.

26Edikem adaŋemi David osimde ke Ziklag, enye ɔnɔ ubak mbume oro esɔk mbiowo Judah, kpa mme ufan esiemɔ, ete, Se ŋkpɔ mfɔn mbufo, emi otode ke mbume mme asua Jehovah;

27esɔk mmɔ eke edude ke Beth-el, ye mmɔ eke edude ke usuk Ramoth,

28ye mmɔ eke edude ke Jattir, ye mmɔ eke edude ke Aroer, ye mmɔ eke edude ke Siphmoth, ye mmɔ eke edude ke Eshtemoa,

29ye mmɔ eke edude ke Racal, ye mmɔ eke edude ke mme obio Jerahmeelite, ye mmɔ eke edude ke mme obio mme Kenite,

30ye mmɔ eke edude ke Hormah, ye mmɔ eke edude ke Cor-ashan, ye mmɔ eke edude ke Athach,

31ye mmɔ eke edude ke Hebron, ye kpukpru ebiet oro David ye ikɔt esie ekam esaŋade do.