1 NDIDEM 10 - Efik Old Bible With Sectional Headings

Ɔbɔŋ Aŋwan Sheba Edise Edidem Solomon

1EKEM ɔbɔŋ aŋwan Sheba okop etop Solomon emi otode enyiŋ Jehovah, ndien aka okodomo enye ke ŋke.

2Enye onyuŋ ada ata akamba udim, kpa camel eke ebiomde ufuɔŋkpɔ, ye ata ediwak gold, ye ndiye itiat, aka ke Jerusalem: ndien enye aka ke ɔtɔ Solomon, ekeneme nneme ye enye abaŋa kpukpru se idude enye ke esit.

3Ndien Solomon asiak kpukpru ikɔ esie ɔnɔ enye: baba ikɔ kiet eke enye misiakke inɔ enye, idibeke edidem.

4Ekem adaŋemi ɔbɔŋ aŋwan Sheba okutde kpukpru ifiɔk Solomon, ye ufɔk oro enye ɔkɔbɔpde,

5ye udia okpokoro esie, ye itie ikɔt esie, ye idaha mme asaŋutom esie, ye edisine-ŋkpɔ mmɔ, ye mme akama wine esie ye udigukot esie emi enye ɔdɔkde ke ufɔk Jehovah, idem akpa enye.

6Ndien enye ɔdɔhɔ edidem, ete, se ŋkokopde ke edem nnyin ebaŋa ŋkpɔ fo, ye ifiɔk fo, edi akpanikɔ.

7Edi ŋkonimke ikɔ oro ke akpanikɔ tutu ndi, enyin mi enyuŋ ekut: ndien, sese, iketiŋke ibio inɔ mi; eti ibuot ye inyene emebe etop oro ŋkokopde.

8Ɔfɔfɔn ye ikɔt fo, ɔfɔfɔn ye mme asaŋutom fo emi edade fi ke iso kpukpru ini, enyuŋ ekopde eti ibuot fo.

9Etoro Jehovah Abasi fo, emi amade fi, onyuŋ emende fi odori ke ebekpo Israel: koro Jehovah amade Israel ke nsinsi esin enye onim fi ke edidem, man afo ekpe ikpe eke enende.

10Ndien enye ɔnɔ edidem talent gold ikie ye edip, ye ediwak ufuɔ ŋkpɔ eti -eti, ye ɔsɔŋ-urua itiat: oruk uwak ufuɔ ŋkpɔ idige aba nte eke ɔbɔŋ aŋwan Sheba ɔkɔnɔde Solomon.

11Ndien ŋko ubom - mbakara Hiram eke edade gold ke Ophir ebiom edi, eda ata ediwak eto almug ke Ophir, ye ɔsɔŋ-urua itiat edi.

12Ndien edidem ada eto almug oro anam udigukot ke ufɔk Jehovah, ye ke ufɔk edidem, anam ndido, ye harp ɔnɔ mme ɔkwɔ-ikwɔ: oruk eto almug eke etiede ntem idige aba, owo inyuŋ ikwe aba mmɔ tutu osim mfin emi.

13Ndien edidem Solomon ɔnɔ ɔbɔŋ aŋwan Sheba kpukpru se inemde enye, eke enye oyomde, ɔkɔrɔ ye se ɔnɔde enye nte ekemde ubɔk edidem Solomon. Ekem enye ɔnyɔŋ ke idut esie, ye ikɔt esie ŋko.

14Ndien udobi gold emi osimde Solomon ke isua kiet edi talent gold ikie itiokiet ye talent ata ye itiokiet,

15ɔkɔrɔ ye se enye ɔbɔde mbon-urua, ye utom urua mbon-mbubine, ye kpukpru mbon Arabia, ye mme andikara mme idut.

16Ndien edidem Solomon odom gold anam otu-ekɔŋ ikie iba: shekel gold ikie itiokiet eduk ke otu kiet:

17enye onyuŋ ada gold odom ŋkpri otu-ekɔŋ ikie ita; shekel gold ikie ita eduk ke otu kiet: ndien edidem ada mmɔ esin ke ufɔk akai Lebanon.

18Ndien ŋko edidem ada oduk-enin anam akamba ebekpo, onyuŋ ada ata eti gold ofuk enye.

19Ebekpo oro enyene udigukot, ndien ibuot ebekpo edi ekara-ekara ke edem esie: ubɔk onyuŋ odu ke edem mbiba ke ɔtɔ eke etiede, ndien lion iba eda ke ŋkaŋ ubɔk oro.

20Lion duopeba enyuŋ eda do ke udigukot itiokiet oro ke edem mbiba: akananam inamke oruk ŋkpɔ eke etiede ntem ke baba idut kiet.

21Ndien kpukpru uŋwɔŋ-ŋkpɔ edidem Solomon edi gold, kpukpru mkpoduoho ufɔk akai Lebanon enyuŋ edi ata eti gold: silver iduhe: ibatke enye ke baba ŋkpɔ kiet ke eyo Solomon.

22Koro edidem enyenede ubom-mbakara Tarshish eke ewatde ye ubom Hiram ke akwa mmɔŋ: mme ubom Tarshish ebiom gold, ye silver, ye oduk-enin, ye ebɔk, ye peacock, edi ini kiet ke isua ita.

23Ntem ke edidem Solomon okpon akan kpukpru ndidem ke ererimbot, ke inyene ye ke eti ibuot.

24Ndien ofuri ererimbot eyom iso Solomon, kpaŋ ekpekop ifiɔk esie, emi Abasi ekesinde enye ke esit.

25Kpukpru mmɔ enyuŋ eda enɔ mmɔ edi, kpa ŋkpɔ silver, ye ŋkpɔ gold, ye edisine-ŋkpɔ, ye ŋkpɔ ekɔŋ, ye ufuɔŋkpɔ, ye horse, ye mule, nte enimde ibat ke isua ke isua.

26Solomon onyuŋ ɔkɔ chariot ye mbon horse: enye onyuŋ enyene tɔsin chariot ye ikie inaŋ, ye tɔsin mbon horse duopeba, emi enye onimde ke mme obio chariot, ye ke ɔtɔ edidem ke Jerusalem.

27Ndien edidem anam silver odu ke Jerusalem nte itiat, onyuŋ anam cedar awak nte sycomore emi edude ke una-isɔŋ edem inyaŋ ke uwak.

28Ndien emi ekedade horse ke Egypt esɔk Solomon, udim mbon-urua edidem ekam eda udim horse ke ekɔm-urua edi.

29Ndien chariot kiet oto ke Egypt ɔdɔk ke shekel silver ikie itiokiet, ye horse kiet ke shekel ikie ye aba ye duop: ndien ntre ke mmɔ eto edi enɔ kpukpru mbɔŋ mme Hittite, ye mbɔŋ Syria, ke ubɔk mmɔ.