ŊWED MME PSALM 107 - Efik Old Bible With Sectional Headings

Etoro Abasi Emi Anyaŋade Owo Osio ke Ediwak Nnanenyin

1MBUFO ekɔm Jehovah, koro enye ɔfɔŋde; koro ima esie ebigide ke nsinsi.

2Yak mme mmɔ emi Jehovah afakde edɔhɔ ntem, kpa mme mmɔ emi enye afakde osio mme asua ke ubɔk;

3onyuŋ ataŋ mmɔ ke mme idut, ke edem usiaha-utin ye ke edem usop, ye ke edere, ye ke inyaŋ, edi.

4Mmɔ ediyo ke wilderness, ye ke usuŋ desert; ikwe obio iduŋ.

5Biɔŋ ɔdɔŋ mmɔ, itɔŋ onyuŋ asat mmɔ, ukpɔŋ akpa mmɔ ke idem.

6Ndien mmɔ eseme enɔ Jehovah ke nnaanenyin mmɔ; enye osio mmɔ ke itie ukut mmɔ.

7Ndien enye ada mmɔ asaŋa ke edinen usuŋ, man eka obio iduŋ.

8Yak owo ekɔm Jehovah ke ima esie, ye ke mme utibe ŋkpɔ emi enye anamde ye nditɔ owo.

9Koro enye ɔyuhɔde ukpɔŋ udɔŋ, onyuŋ ada eti ŋkpɔ ɔnɔ ukpɔŋ ɔbiɔŋ ɔyuhɔ.

10Eduŋ ke ekim ye mfut mkpa, eda ukut ye ukwak ebɔp mmɔ;

11koro mmɔ enenide uyo Jehovah, enyuŋ esede item Ata Edikoŋ ke ndek:

12ndien enye ada ukut ɔsuhɔre mmɔ esit onim; mmɔ eduɔŋɔ ke isɔŋ, ndien owo eke anyaŋade iduhe.

13Ndien mmɔ eseme enɔ Jehovah ke nnan-enyin mmɔ; enye anyaŋa mmɔ osio ke itie ukut mmɔ.

14Osio mmɔ ke ekim ye mfut mkpa, onyuŋ obuŋ ŋkpɔkɔbi mmɔ.

15Yak mmɔ ekɔm Jehovah ke ima esie, ye ke mme utibe ŋkpɔ emi enye anamde ye nditɔ owo.

16Koro enye anuakde mme itim okpoho, onyuŋ osibe ukwak-usin-usuŋ mbai-mbai.

17Ndisime owo ekut ukut ebaŋa usuŋ ukwaŋ-ŋkpɔ mmɔ ye mme idiɔk ido mmɔ.

18Ukpɔŋ mmɔ asua kpukpru oruk udia; ndien mmɔ edisim ke inua-otop mkpa.

19Ndien mmɔ eseme enɔ Jehovah ke nnan-enyin mmɔ; enye anyaŋa mmɔ osio ke itie ukut mmɔ. Enye ɔdɔŋ ikɔ esie utom,

20onyuŋ anam udɔŋɔ okure mmɔ, ndien ayak mmɔ ebɔhɔ mme nsobo mmɔ.

21Yak owo ekɔm Jehovah ke ima esie, ye ke mme utibe ŋkpɔ emi enye anamde ye nditɔ owo.

22Yak mmɔ enyuŋ ewa mme uwa ekɔm, enyuŋ etaŋa mme ese esie ke ikwɔ.

23Mmɔ eduk ke ubom mbakara esuhɔre ke inyaŋ, enam utom ke akwa mmɔŋ:

24mmɔ oro ekut se Jehovah anamde, ye ŋkpɔ ndyɔ esie ke inyaŋ ibom.

25Ndien enye ɔdɔhɔ, ndien oyobio edemere, onyuŋ emenere odut esie.

26Mmɔ edɔk ke enyɔŋ, esuhɔre ke udem: ukpɔŋ atara mmɔ ke nnaenyin.

27Mmɔ eyok enyuŋ efum nte owo mmin, ofuri ifiɔk mmɔ onyuŋ atak.

28Ndien ke ini mmɔ esemede enɔ Jehovah ke nnanenyin mmɔ, enye osio mmɔ ke itie ukut mmɔ.

29Enye anam oyobio odobo, ndien odut mmɔ odop uyo.

30Ndien mmɔ edat esit koro mmɔ enade suŋ; ndien enye ada mmɔ edi ke esuk emi mmɔ eyomde.

31Yak owo ekɔm Jehovah ke ima esie, ye ke mme utibe ŋkpɔ emi enye anamde ye nditɔ owo.

32Yak mmɔ enyuŋ ekpono enye ke esop mbio-obio, enyuŋ etoro enye ke odu mbiowo.

33Enye anam mme akpa-mmɔŋ ekabare edi wilderness, anam mme idim ekabare edi edisat isɔŋ;

34onyuŋ anam eti isɔŋ akabare edi inuŋ-inuŋ, ke abaŋa mme idiɔk ido mmɔ emi eduŋde ke esit.

35Enye anam wilderness edi mkpɔdiɔhɔ-mmɔŋ, anam edisat isɔŋ akabare edi idim mmɔŋ.

36Onyuŋ anam mbio ɔbiɔŋ eduŋ do, mmɔ enyuŋ ediɔŋ obio iduŋ;

37Enyuŋ esuan mkpasip ke iŋwaŋ, enyuŋ etɔ iŋwaŋ-vine, ndien mmɔ esioŋo mbuŋwum ŋkpɔ.

38Enye onyuŋ ɔdiɔŋ mmɔ ŋko, ndien mmɔ ewak eti-eti; inyuŋ iyakke ufene mmɔ ekabare ekpri.

39Ekem mmɔ ekabare ekpri enyuŋ esuhɔre ke ufik, ye utuk, ye afanikɔŋ.

40Enye aŋwaŋa but ofuk mbɔŋ, onyuŋ anam mmɔ ediyo ke ikpikpu ebiet, emi ɔkpɔ-usuŋ miduhe ke esit.

41Onyuŋ osio mme ubuene ke nnanenyin, emenere onim ke enyɔŋ, onyuŋ anam ufɔk etie nte otu erɔŋ.

42Ndinen owo eyekut enyuŋ edara; ofuri idiɔk ido eyenyuŋ okibi inua esie.

43Owo ekededi eke enyenede ibuot eyetiŋ enyin ke ŋkpɔ emi, eyenyuŋ ekere ima Jehovah.