1ŊWED TIMOTHY 6 - Efik Old Bible With Sectional Headings

Uteŋe Abasi Emi Asaŋade ye Uyuhɔ Enyene Akwa Udori: Eŋwana Eti Eŋwan Mbuɔridem

1YAK kpukpru mmɔ emi esinede ke idak ufin ebat mme ete mmɔ nte owo emi edotde ɔyɔhɔ ukpono, mbak owo editiŋ idiɔk adian enyiŋ Abasi ye ikɔ Abasi eke ekpepde.

2Yak mmɔ emi enyenede ete-ufɔk eke onimde ke akpanikɔ ekuse enye ke ndek oto koro enye edide eyenete. Edi mmɔ ekam enam ŋkpɔ enɔ enye ekan, koro enye emi adiade ufɔn ubɔktom mmɔ edi owo mbuɔtidem ye edima owo Abasi.

3Kpep nyuŋ teme mmɔ enam ntem. Edieke owo ekededi ekpepde oruk ŋkpɔ eŋwen, minyuŋ inyimeke inɔ nti ikɔ, kpa ikɔ Ɔbɔŋ nnyin Jesus Christ, ye ukpep-ŋkpɔ eke ekemde ye uteŋe Abasi,

4Enye edi owo ŋkohore-idem; enye ifiɔkke ŋkpɔ, edi esit esie ɔdɔŋɔ eneni ye eŋwan ikɔ; edi ŋkpɔ emi ada ufup edi, ye eŋwan,

5ye isuŋi, ye idiɔk ekikere, ye ɔkpɔsɔŋ eneni ke otu mmɔ emi ekikere mmɔ ama akabiara, akpanikɔ ama onyuŋ ɔbɔhɔ mmɔ; etie mmɔ nte uteŋe Abasi edi afaŋ udia-udori.

6Edi uteŋe Abasi edi akwa udori, ke ini asaŋade ye esit eke okutde ete se inyenede ekem.

7Koro nnyin ikadaha baba ŋkpɔ kiet iduk ke ererimbot, idinyuŋ ikemeke ndida baba ŋkpɔ kiet ŋwɔrɔ.

8Mmɔdo edieke nnyin inyenede se idiade ye se idade ifuk iferi, nnyin iyekut ite oro ekem.

9Edi mmɔ eke eyomde ndidi mbon inyene eduɔ esine ke idomo ye afia ye ediwak ndisime ye idiɔk udɔŋ, eke edudide owo esuhɔre ke nditaha ye nsobo.

10Koro itɔŋ inyene edi oruŋ kpukpru oruk mme idiɔk-ŋkpɔ; ndien ke erinyanare mbine enye, ndusuk owo ema eyo ekpɔŋ mbuɔtidem, enyuŋ eda ediwak mfuhɔ enɔ idem mmɔ unan.

11Edi afo, O owo Abasi, fehe kpɔŋ mme ŋkpɔ emi; nyuŋ bine edinen ido, ye uteŋe Abasi, ye mbuɔtidem, ye ima, ye ime, ye nsuhɔre-esit.

12Ŋwana eti eŋwan mbuɔtidem; sɔŋɔ mum nsinsi uwem kama, emi ekokotde fi edida enyene, afo okonyuŋ etiŋ eti ikɔ mbuɔtidem ke iso ediwak ntiense.

13Ke iso Abasi, emi ɔnɔde kpukpru ŋkpɔ uwem, ye ke iso Christ Jesus, emi eketiŋde eti ikɔ mbuɔtidem ke iso Pontius Pilate,

14mmowuk fi nte, onim item emi anana ndo, onyuŋ anana se etiŋde edian enye, tutu osim eribiɔŋɔre Ɔbɔŋ nnyin Jesus Christ;

15emi Abasi ediyararede ke edikem ini; kpa Enye emi edide Andikara, emi enyenede itoro onyuŋ ikpɔŋ-ikpɔŋ adade ubɔŋ, onyuŋ edide Edidem mme edidem ye Ɔbɔŋ mme ɔbɔŋ;

16emi Enye ikpɔŋ mikpaha mkpa, emi oduŋde ke uŋwana eke owo mikemeke ndisaŋa ŋkpere; emi akanam owo mikwe, midinyuŋ ikemeke ndikut: ubɔŋ enyene Enye ye nsinsi odudu. Amen.

17Sɔŋɔ dɔhɔ mme enyene-ŋkpɔ ke eyo emi, ete mmɔ ekumenere idem, ekunyuŋ edori enyin ke se iyaŋade owo nte enyene, edi edori enyin ke Abasi, emi ɔnɔde nnyin kpukpru ŋkpɔ uwak-uwak, ete idara ke esit.

18Dɔhɔ mmɔ ete, efɔn ido, enyuŋ enam nti utom uwak-uwak, enyuŋ etat ubɔk, enyime ndinɔ owo ŋkpɔ;

19eŋwana eyom eti isɔŋ enɔ idem mmɔ ke ini iso, man mmɔ ekpemum uwem eke edide ata uwem ekama.

20O Timothy, kpeme se ekayakde esin fi ke ubɔk. Fep idem ke mbukpo ndisime ndutiŋ ye ɔkpɔsɔŋ eneni, eke owo ekotde ke nsu, ete, ifiɔk;

21ndusuk owo ema enyime ukpep-ŋkpɔ oro, ediyo ekpɔŋ mbuɔtidem.

Mfɔn akpakam odu ye mbufo.