1NDIEN mme mmɔ emi edi enyiŋ mme esien. Dan ada kiet ke utit edem edere ke ŋkaŋ usuŋ Hethlon, ke ɔtɔ emi owo odukde Hamath, ye Hazar-enen, adaŋa Damascus, ese edem edere, tutu osim ke ŋkaŋ Hamath; ndien mme mmɔ emi edi adaŋa esie ke edem usiaha-utin ye ke edem usop-utin.
2Asher onyuŋ ada kiet adiana mben Dan, ɔtɔŋɔde ke adaŋa mben usiaha-utin tutu osim ke adaŋa usop-utin.
3Naphtali onyuŋ ada kiet, adiana mben Asher, ɔtɔŋɔde ke edem usiaha-utin tutu osim ke mben usop-utin.
4Ndien Manasseh ada kiet, adiana mben Naphatali, ɔtɔŋɔde ke adaŋa edem usiaha-utin tutu osim ke adaŋa edem usop.
5Ephraim onyuŋ ada kiet, adiana mben Manasseh, ɔtɔŋɔde ke adaŋa edem usiaha-utin tutu osim ke adaŋa edem usop.
6Reuben onyuŋ ada kiet, adiana mben Ephraim, ɔtɔŋɔde ke adaŋa edem usiaha-utin tutu osim ke adaŋa edem usop.
7Ndien Judah ada kiet, adiana mben Reuben, ɔtɔŋɔde ke adaŋa edem usiaha-utin tutu osim ke adaŋa edem usop.
8Ndien ubak eke mbufo edinɔde (Abasi) eyediana mben Judah ɔtɔŋɔde ke adaŋa edem usiaha-utin tutu osim ke adaŋa edem usop, ubom esie eyedi tɔsin eto edip ye ition, uniɔŋ esie onyuŋ ekem ye mbak efen kiet, ɔtɔŋɔde ke adaŋa edem usiaha-utin tutu osim ke adaŋa edem usop. Edisana ebiet eyenyuŋ ada enye ke ufɔt.
9Uniɔŋ udeme emi mbufo edimenerede enɔ Jehovah edidi tɔsin edip ye ition; ubom esie onyuŋ edi tɔsin duop.
10Ndien edisana udeme eyena ɔnɔ mmɔ emi, kpa mme oku, ntem: tɔsin edip ye ition ese edem edere; ubom ese edem usop-utin tɔsin duop: ubom ese edem usiaha-utin onyuŋ edi tɔsin duop: ndien uniɔŋ ese edem usuk edi tɔsin edip ye ition ke uniɔŋ; ndien edisana ebiet Jehovah eyedu enye ke ufɔt.
11Mme oku edida enye, kpa nditɔ Zadok, emi edide edisana, emi ekpemede se ŋkotobode, emi mikodiyoho ke adaŋemi nditɔ Israel ekediyode, nte emi mme Levite ekediyode.
12Ndien mmɔ eyeda udeme ke udeme isɔŋ emi emenerede enɔ (Abasi), ata edisana, ke mben mme Levite.
13Ndien mme Levite eyena ekem ye adaŋa mme oku, tɔsin edip ye ition ke uniɔŋ, ye tɔsin duop ke ubom: ofuri uniɔŋ eyedi tɔsin edip ye ition, ubom eyenyuŋ edi tɔsin duop.
14Ndien mmɔ ekunyam baba ubak esie kiet, ekunyuŋ ekpuhɔ, ekunyuŋ ekabare akpa mbuŋwum isɔŋ oro (enɔ owo eŋwen): koro enye edide edisana ŋkpɔ Jehovah.
15Ndien tɔsin ition emi esuhɔde ke ubom ekem iso ye tɔsin edip ye ition oro eyedi ŋkpɔ kpukpru owo ke eke obio, ke eke iduŋ, ye ke eke mben isɔŋ: ndien obio ada enye ke ufɔt.
16Ndien mmɔ emi edi idomo esie; adaŋa edem edere tɔsin inaŋ ye ikie ition; adaŋa edem usuk ŋko, tɔsin inaŋ ye ikie ition: ye ke edem usiaha-utin, tɔsin inaŋ ye ikie ition: ye ke edem usop-utin tɔsin inaŋ ye ikie ition.
17Ndien obio eyenyene mben-isɔŋ ke edem edere, ikie iba ye aba ye duop, ye ke edem usuk, ikie iba ye aba ye duop, ye ke edem usiaha-utin, ikie iba ye aba ye duop, ye ke edem usop-utin ikie iba ye aba ye duop.
18Ndien se isuhɔde ke uniɔŋ, ekem ye edisana udeme edidi tɔsin duop ke edem usiaha-utin, ye tɔsin duop ke edem usop-utin: ndien enye eyena ukem-ukem ye edisana udeme; ndien se enye oŋwumde edidi udia mmɔ emi enamde ŋkpɔ obio.
19Ndien mmɔ emi enamde ŋkpɔ obio eyeto ke kpukpru mme esien Israel enam ŋkpɔ esie.
20Ofuri ubak emi edimenerede enɔ (Abasi) eyedi tɔsin edip ye ition ke uniɔŋ, ye tɔsin edip ye ition ke ubom: mbufo emenere edisana udeme ukem-ukem enɔ, ekɔrɔ ye se obio adade.
21Ndien ɔbɔŋ ada se isuhɔde ke edem mbiba, adiana ke edisana udeme, ye ke se obio adade, ke iso tɔsin edip ye ition, emi edide ubak emi emenerede enɔ (Abasi) osim ke adaŋa edem usiaha-utin; ye ke adaŋa edem usop-utin ke iso tɔsin edip ye ition ke adaŋa edem usop-utin, ekem iso ye mbak ɔbɔŋ. Ndien enye eyedi edisana ubak, ndien edisana ufɔk iduŋ eyena enye ke ufɔt.
22Ndien ɔbɔŋ eyeda, ɔtɔŋɔde ke se mme Levite edade, onyuŋ ɔtɔŋɔde ke se obio adade, ke ufɔt ubak emi enyenede ɔbɔŋ, ke ufɔt adaŋa Judah ye adaŋa Benjamin.
23Ndien ama edi mme esien emi esuhɔde, Benjami (ada ubak) kiet ɔtɔŋɔde ke adaŋa edem usiaha-utin tutu osim ke adaŋa edem usop.
24Ndien Simeon ada kiet, adiana mben Benjamin, ɔtɔŋɔde ke adaŋa edem usiaha-utin tutu osim adaŋa edem usop.
25Issachar onyuŋ ada kiet adiana mben Simeon, ɔtɔŋɔde ke adaŋa edem usiaha-utin tutu osim ke adaŋa edem usop.
26Ndien Zebulun onyuŋ ada kiet, adiana mben Issachar, ɔtɔŋɔde ke adaŋa edem usiaha-utin tutu osim ke adaŋa edem usop.
27Gad onyuŋ ada kiet, adiana mben Zebulum, ɔtɔŋɔde ke adaŋa edem, usiaha-utin tutu osim ke adaŋa edem usop.
28Ndien ata adaŋa eyesaŋa ke adaŋa Gad edem usuk, oto ke Tamar aka mmɔŋ Meribath-kadesh, aka ke akpa Egypt akatuak ke akwa inyaŋ.
29Isɔŋ emi ke mbufo edida edeme enɔ mme esien Israel ke udeme; mme mmɔ emi enyuŋ edi mbak mmɔ. Emi edi uyo Ɔbɔŋ Jehovah.
30Ndien ntem ke obio ediwɔrɔ: adaŋa edem edere ekem tɔsin eto idomo inaŋ ye ikie ition.
31Ndien mme inua-otop obio eyesaŋa ke enyiŋ mme esien Israel: inua-otop ita ke edem edere; inua-otop Reuben, kiet; inua-otop Judah, kiet; inua-otop Levi, kiet.
32Ndien ŋko adaŋa edem usiaha-utin, tɔsin inaŋ ye ikie ition; ye inua-otop ita; ndien inua-otop Joseph edi kiet; inua-otop Benjamin, kiet; inua-otop Dan, kiet.
33Ndien adaŋa edem usuk tɔsin eto idomo inaŋ ye ikie ition; ye inua-otop ita; inua-otop Simeon, kiet; inua-otop Issachar, kiet; inua-otop Zebulun, kiet.
34Adaŋa edem usop-utin edi tɔsin inaŋ ye ikie ition, ye inua-otop mmɔ ita; inua-otop Gad, kiet; inua-otop Asher kiet; inua-otop Naphtali, kiet.
35Enye edi tɔsin eto idomo-okuk efureta akan okuk.
Ndien toto ke usen oro enyiŋ obio eyekere, ete, JEHOVAH-SHAMMAH (JEHOVAH ODU DO).
Who We AreWhat We EelieveWhat We Do
2025 by iamachristian.org,Inc All rights reserved.
