2 CHRONICLES 2 - Efik Old Bible With Sectional Headings

Nditim Emi Edidem Solomon Akanamde Ndibɔp Temple

1EKEM Solomon ɔdɔhɔ ete iyebɔp ufɔk inɔ Jehovah, ye ufɔk ubɔŋ imɔ.

2Ndien Solomon abat tɔsin mbon mbiomo ata ye duop, ye tɔsin owo anaŋ eke ekpeŋede ke obot, ye tɔsin owo ita ye owo ikie itiokiet, ete eteme mmɔ eken.

3Ndien Solomon ɔdɔŋ ekedɔhɔ Huram, edidem Tyre, ete, kpa nte akanamde ye David ete mi, okonyuŋ ɔnɔde cedar esɔk enye, man ebɔp ufɔk eke oduŋde ke esit enɔ enye.

4Sese, ami mmɔŋ ndibɔp ufɔk nnɔ enyiŋ Jehovah Abasi mi, ndida nnim nnɔ enye, man efɔp edifuɔŋ incense enɔ enye, ye ke eke uyo eke ediɔkde kpukpru ini, ye ke edifɔp uwa usenubɔk ye mbubreyo, ye ke mme sabbath, ye ke mbufa ɔfiɔŋ, ye ke mme usɔrɔ emi Jehovah Abasi nnyin okodoride. Emi edi nsinsi ewuhɔ ke Israel.

5Ndien ufɔk eke mbɔpde okpon: koro Abasi nnyin omokpon akan kpukpru abasi.

6Ndien anie ekeme ndibɔp ufɔk nnɔ enye, sia enyɔŋ ye ata enyɔŋ mikemeke ndida enye? Ndien ami ndi anie, eke ndibɔpde ufɔk nnɔ enye, ke mibɔhɔke ndifɔp uwa ke iso esie?

7Mbɔk, ndien, nɔ mi owo eke ɔfiɔkde usɔ-gold, ye eke silver, ye eke okpoho, ye eke ukwak, ye purple, ye ididuot, ye awawa, emi onyuŋ ɔfiɔkde usɔ-erikap, etiene mbon eti ibuot emi edude ye ami ke Judah ye Jerusalem emi David ete mi okonimde.

8Nyuŋ nɔ eto cedar, ye cypress, ye algum, eke etode ke Lebanon, esɔk mi: koro mmɔfiɔk nte ikɔt fo emefiɔk ndikpi eto ke Lebanon; ndien, sese, ikɔt mi eyedu ye ikɔt fo;

9nyuŋ tim ediwak eto nɔ mi: koro ufɔk emi ndibɔpde eyekpon, onyuŋ enyene ndyɔ.

10Ndien, sese, nyeda wheat eke etimde tim, ke tɔsin udomo edip, ye barley ke tɔsin udomo edip, ye tɔsin bath wine edip, ye tɔsin bath aran edip, nnɔ ikɔt fo eke esɔide, enyuŋ ekpeŋede eto.

11Ndien Huram edidem Tyre ɔdɔhɔ ke ŋwed emi enye enɔde esɔk Solomon, ete, Koro Jehovah amade ikɔt esie, esin enye onim fi ke edidem mmɔ.

12Huram onyuŋ ɔdɔhɔ, ete, Mbufo etoro Jehovah Abasi Israel, emi akanamde enyɔŋ ye isɔŋ, emi enɔde edidem David enyene-ibuot eyen emi edide ɔniɔŋ ye asian, man enye ɔbɔp ufɔk ɔnɔ Jehovah, ye ufɔk ubɔŋ esiemɔ.

13Ndien ke emi ndɔŋ enyene-ibuot owo ete mi Huram kiet, emi edide asian,

14eyen aŋwan kiet emi otode ke nditɔ-iban Dan, ndien ete esie edi owo Tyre, emi ɔfiɔkde usɔ-gold, ye usɔ-silver, ye eke okpoho, ye ukwak, ye itiat, ye purple, ye awawa, ye eti linen, ye ididuot; ndinyuŋ ŋkap kpukpru oruk erikap ŋkpɔ, emi onyuŋ enyenede ikike unam kpukpru oruk ŋkpɔ eke enɔde enye, etiene mme ɔfiɔkŋkpɔ owo ɔbɔŋ mi David usɔ.

15Ndien ama edi wheat, oro, ye barley, ye aran, ye wine oro ɔbɔŋ mi ɔdɔhɔde, yak ɔnɔ ɔsɔk owo esie:

16ndien nnyin iyekpeŋe eto ke Lebanon, adaŋa nte afo oyomde, inam mmɔ efiɔrɔ ke inyaŋ isɔk fi ke Joppa, ndien afo eyeda mmɔ ɔdɔk ke Jerusalem.

17Ndien Solomon abat kpukpru isen owo eke edude ke isɔŋ Israel, kpa nte David ete esie akabatde mmɔ; ndien mmɔ ekut tɔsin, tɔsin owo, ke itie ikie ye aba ye duop, ye tɔsin ita, ye ikie itiokiet.

18Ndien enye onim tɔsin mmɔ ata ye duop ke mbon mbiomo, ye tɔsin anaŋ ke mme andisɔi ke obot, ye tɔsin ita ye ikie itiokiet ke mme ese-utom, eke enamde mmɔ eken enam utom.