2 SAMUEL 7 - Efik Old Bible With Sectional Headings

Abasi Anam Ediomi ye David

1EDIKEM adaŋemi edidem etiede ke ufɔk esie, ke Jehovah ama okonyuŋ ɔnɔ enye nduɔk-odudu ɔbɔhɔ kpukpru mme asua esie emi ekande enye ekuk;

2ndien edidem ɔdɔhɔ Nathan prophet, ete, Mbɔk, se ami nduŋ ke ufɔk cedar, edi ekebe Abasi oduŋ ke ufɔt ikpehe oro.

3Ndien Nathan ɔdɔhɔ edidem ete, Ka kanam kpukpru se idude fi ke esit: koro Jehovah odude ye afo.

4Edikem ke okoneyo oro, ndien uyo Jehovah osim Nathan, ete,

5Ka kɔdɔhɔ owo mi David, ete, Ntem ke Jehovah ɔdɔhɔ ete, Nte afo edibɔp ufɔk iduŋ ɔnɔ mi?

6Koro mmeŋkanam nduŋke ke ufɔk toto ke usen oro ŋkadade nditɔ Israel ke Egypt ndɔk, tutu osim mfin emi, edi ŋkasaŋa ke tent nte ebiet iduŋ.

7Ke ofuri isaŋ emi ŋkasaŋade ke otu kpukpru nditɔ Israel, nte mma ndɔhɔ ikɔ ye esien Israel ekededi, eke ŋkowukde nte ebɔk ikɔt mi Israel, nte Nsinam mbufo mibɔpke ufɔk cedar inɔ mi?

8Dɔhɔ ntem, ndien ye owo mi David, ete, Ntem ke Jehovah mme udim ɔdɔhɔ, ete, Ami ŋkosio fi ke nna-erɔŋ emi afo etienede ŋkpri ufene, man afo edi etubom ikɔt mi Israel:

9mma nnyuŋ ndu ye afo ke kpukpru ebiet emi afo akade, nnyuŋ nsibe kpukpru mme asua fo mfep ke iso fo, nnyuŋ nnam akamba enyiŋ nnɔ fi, eke ebietde enyiŋ ikpɔ owo emi ekedude ke ererimbot.

10Mma nnyuŋ nnim ebiet nnɔ ikɔt mi Israel, nnyuŋ ntɔ mmɔ, ndien mmɔ eduŋ ke ɔtɔ mmɔ, idinyuŋ itimekede aba mmɔ; nditɔ idiɔk ido idinyuŋ itɔŋɔke aba ntak ituhɔ mmɔ, kpa nte akpa;

11ɔtɔŋɔde ke usen oro ami ŋkonimde mme eberikpe ke mme etubom ikɔt mi Israel; mma nnyuŋ nnɔ fi nduɔk-odudu ɔbɔhɔ kpukpru mme asua fo. Jehovah onyuŋ asian fi ete iyenam ufɔk inɔ fi.

12Ndien ke ini usen fo ekemde, ke afo onyuŋ anade ye mme usɔ ede, ami nyenam ubon fo emi editode fi ke idem, etiene fi adaha ada, nnyuŋ nnam ubɔŋ esie ɔsɔŋ ada.

13Enye eyebɔp ufɔk ɔnɔ enyiŋ mi, nyenyuŋ nnam ebekpo ubɔŋ esie ɔsɔŋ ada ke nsinsi.

14Ami nyedi ete esie, ndien enye eyedi eyen mi; emi ke ini enye anamde ukwaŋ ido, nyeda eto owo, ye ikpa eyen owo ntunɔ enye:

15edi ima mi idikpɔŋke enye, nte ŋkanamde enye ɔkpɔŋ Saul, emi ŋkebinde ke iso fo mfep.

16Ntre ke ufɔk fo ye ubɔŋ fo edisɔŋ eda ke iso fo ke nsinsi: ebekpo fo eyewuhɔ ke nsinsi.

17Ndien Nathan ada kpukpru ikɔ emi ye ofuri ŋkukut emi nte asaŋade, ɔkɔdɔhɔ David.

18Ekem edidem David oduk editie ke iso Jehovah, onyuŋ ɔdɔhɔ ete, Ami ndi anie, O Jehovah Abasi? Ufɔk mi onyuŋ edi nso, emi afo adade mi edi ken?

19Emi osuk onyuŋ ekpekpri ke enyin fo, O Ɔbɔŋ Jehovah; ndien afo omonyuŋ ɔdɔhɔ abaŋa ufɔk owo fo ke anyan ini ke iso. Ndien emi edi ido owo, O Ɔbɔŋ Jehovah.

20Ndien nso ŋkpɔ eŋwen ke David edidɔhɔ fi? Ŋkɔm afo ɔmɔfiɔk owo fo, O Ɔbɔŋ Jehovah.

21Ke abaŋa uyo fo, ye nte ima esit fo edide, ke fo amanam ofuri ubɔŋ emi, man asian owo fo.

22Mmɔdo afo omokpon, O Jehovah Abasi: koro baba kiet mibietke fi, Abasi inyuŋ iduhe ke mibɔhɔke afo, ke kpukpru se nnyin ikekopde ke utɔŋ nnyin.

23Ndien ewe idut kiet ke ererimbot ebiet ikɔt fo Israel, emi Abasi akakade ndifak nnim ke ikɔt esiemɔ, nnyuŋ nnam enyiŋ ke idemesie, nnyuŋ nnam ikpɔ ŋkpɔ nnɔ mbufo, ye ŋkpɔ ndik nnɔ isɔŋ fo ke iso ikɔt fo, emi afo akafakde ke Egypt (ɔbɔ) mme idut ye mme abasi mmɔ, osio ɔnɔ idemfo?

24Afo omonyuŋ ɔsɔŋ onim ikɔt fo Israel ke idemfo ke ikɔt fo ke nsinsi: afo, Jehovah, omonyuŋ akabare edi Abasi mmɔ.

25Mbɔk ndien, O Jehovah Abasi, nam ikɔ oro afo ɔkɔdɔhɔde abaŋa owo fo, ye ufɔk esie, ada ke nsinsi, nyuŋ nam kpa nte afo ɔkɔdɔhɔde.

26Nam enyuŋ ekpono enyiŋ fo ke nsinsi, ete, Jehovah mme udim edi Abasi Israel: nyuŋ nam ufɔk owo fo David ɔwuhɔ ada ke iso fo.

27Koro afo, O Jehovah mme udim, Abasi Israel, ama ɔdɔhɔ owo fo ke utɔŋ, ete, Nyebɔp ufɔk nnɔ fi: mmɔdo owo fo ɔsɔŋɔde esit ekpe fi mkpe-ubɔk emi.

28Ndien ke emi, O Ɔbɔŋ Jehovah, edi afo edi Abasi, ikɔ fo onyuŋ edi akpanikɔ, afo omonyuŋ ɔdɔhɔ mfɔn emi abaŋa owo fo:

29mbɔk, ndien, nyime ndidiɔŋ ufɔk owo fo, man enye odu ke nsinsi ke iso fo: koro afo, O Ɔbɔŋ Jehovah, ɔmɔdɔhɔ: nyuŋ da nti ŋkpɔ fo diɔŋ ufɔk owo fo ke nsinsi.