ŊWED MME PSALM 105 - Efik Old Bible With Sectional Headings

Abasi ye Ikɔt Esie

1O MBUFO ekɔm Jehovah; ekot enyiŋ esie: etaŋa ese esie ke otu mme idut.

2Ekwɔ enɔ enye, ebre enɔ enye: ekere kpukpru mme utibe ŋkpɔ esie.

3Mbufo ebure ke edisana enyiŋ esie: esit eyedat mmɔ eke eyomde Jehovah.

4Mbufo ebine Jehovah ye odudu esie: eyom iso esie kpukpru ini.

5Eti mme utibe ŋkpɔ esie emi enye anamde; ŋkpɔ-ndyɔ esie, ye mme ikpe inua esie;

6mbufo ubon Abraham owo esie, nditɔ Jacob emi enye ekemekde.

7Enye edi Jehovah Abasi nnyin: mme ikpe esie edu ke ofuri ererimbot.

8Enye eti ediomi esie ke nsinsi, ikɔ emi enye owukde ke tɔsin emana.

9Emi enye okodiomide ye Abraham, ye uŋwɔŋɔ emi enye ɔkɔŋwɔŋɔde ɔnɔ Isaac;

10onyuŋ anam enye ɔsɔŋɔ ada ɔnɔ Jacob ke ewuhɔ, ɔnɔ Israel ke nsinsi ediomi; ete,

11Nyenɔ fi isɔŋ Canaan, udeme emi edomode enɔ mbufo.

12Ke ini eke ekemede ndibat mmɔ; edi esisit, ye mme isen owo ke esit.

13Ndien mmɔ ekpɔŋ idut kiet, esaŋa eka idut efen; enyuŋ edaha ke obio kiet eka mbio efen:

14enye iyakke owo baba kiet otuk mmɔ, edi asua ɔnɔ ndidem abaŋa mmɔ; ete,

15Mbufo ekutuk mbon emi nyetde aran nnim ke idem mi, ekunyuŋ enam mme prophet mi idiɔk.

16Ndien enye okot akaŋ esin ke isɔŋ; obuŋ ofuri esaŋ udia.

17Enye ɔdɔŋ owo, ete ebem mmɔ iso, Joseph anyama ke ofin:

18ebiak enye ukot ke ebuka: ukpɔŋ esie esine ke ukwak:

19tutu ekem ke ini emi ikɔ esie edide: uyo Jehovah odomo enye.

20Edidem ɔdɔŋ ekekpɔhɔre enye: andikara obio ɔdɔŋ ekesana enye eyak.

21Onim enye ke etubom ufɔk esie, ye ke andikara ofuri inyene esie:

22Ete enye ɔbɔp ikpɔ owo imɔ, nte amade, onyuŋ ekpep mbiowo imɔ ifiɔk.

23Ntre ke Israel aka ke Egypt; Jacob onyuŋ oduŋ ke isɔŋ Ham.

24Ndien enye anam ikɔt esiemɔ etɔt eti-eti; onyuŋ anam mmɔ esɔŋɔ ekan mme asua mmɔ.

25Enye akabare esit mmɔ esua ikɔt esie, enyuŋ enam ŋkari etuk ifin esie.

26Enye ɔdɔŋ Moses owo esie utom; ye Aaron emi enye ekemekde.

27Mmɔ enim ikpɔ mme idiɔŋɔ esie ke otu mmɔ, ye ŋkpɔ ndyɔ ke isɔŋ ham.

28Enye ɔdɔŋ ekim utom, onyuŋ anam okim; ndien mmɔ isɔŋke ibuot ke ikɔ esie.

29Enye akabare mmɔŋ mmɔ edi iyip, onyuŋ owot iyak mmɔ.

30Ikwɔt ɔnyɔk ke isɔŋ mmɔ, ke ubet ndidem mmɔ.

31Enye ɔdɔhɔ, ndien nduyip ŋkpɔ edi, ye idaŋ ke ofuri adaŋa mmɔ.

32Enye ɔnɔ mmɔ itiat ke edim, ye edemikaŋ ke isɔŋ mmɔ;

33onyuŋ abiat vine mmɔ ye fig mmɔ, onyuŋ obuŋ mme eto adaŋa mmɔ.

34Enye ɔdɔhɔ, ndien ŋkukuŋkpɔyɔriyɔ edi, idiaŋ eke minyeneke ibat,

35Ndien eta kpukpru ikɔŋ ke iŋwaŋ mmɔ, enyuŋ eta mfri isɔŋ mmɔ.

36Ndien enye owot kpukpru mme akpan ke isɔŋ mmɔakpa mfri odudu mmɔ.

37Ndien ada mmɔ ɔwɔrɔ ke silver ye gold: baba mfum-mfum owo kiet inyuŋ iduhe ke otu mme esien mmɔ.

38Esit adat Egypt ke ini mmɔ ewɔŋɔde; koro uteŋe mmɔ odorode mmɔ ke idem.

39Enye ebri obubit enyɔŋ ke ufuhɔ-ŋkpɔ; ye ikaŋ eke ayamade ke okoneyo.

40Mmɔ ebeŋe, ndien enye ada nduduɔk edi, onyuŋ ɔnɔ mmɔ udia heaven eyuhɔ.

41Enye asiak itiat, ndien mmɔŋ otop ɔwɔrɔ; ndien asaŋa ke edisat ebiet nte akpa.

42Koro enye etide edisana uyo esie, ye Abraham owo esie;

43onyuŋ ada ikɔt esie ɔwɔrɔ ke mbre, ye edimek mbio esie ke mkpo idara:

44onyuŋ ɔnɔ mmɔ isɔŋ mme idut; ndien mmɔ eda utom mme obio enyene:

45kpaŋ mmɔ ekpenim mme ewuhɔ esie, enyuŋ ekpe, mbet esie.

Mbufo etoro Jehovah.