ERIYARARE 6 - Efik Old Bible With Sectional Headings

Mme Ufik-Ŋkpɔ Itiaba

1EKEM ŋkut ke adaŋemi Eyenerɔŋ ama akadianare ufik-ŋkpɔ kiet ke itiaba oro, nnyuŋ ŋkop kiet ke otu ŋkpɔ-uwem inaŋ oro, nte ɔdɔhɔde ke uyo eke ebietde obuma, ete, Wɔrɔ di.

2Ndien ŋkut, ndien sese, afia enaŋ-mbakara; andidoro enye ke edem onyuŋ enyene utiga; enyuŋ enɔ enye anyanya; ndien enye ɔwɔrɔ edikan, onyuŋ ɔdɔdiɔŋ akan.

3Ke adaŋdemi Enye ama akadianare ɔyɔhɔ ufik-ŋkpɔ iba, ŋkop nte udiana ŋkpɔ-uwem ɔdɔhɔde ete, Wɔrɔ di.

4Ndien enaŋ-mbakara efen ɔwɔrɔ edi, ididuot enaŋ; ndien enɔ andidoro enye ke edem ndisio emem mfep ke isɔŋ, man owo ewot kiet eken; enyuŋ enɔ enye akwa ofut.

5Ke adaŋemi Enye ama akadianare ɔyɔhɔ ufik-ŋkpɔ ita, ŋkop nte ɔyɔhɔ ŋkpɔ-uwem ita ɔdɔhɔde ete, Wɔrɔ di. Ndien ŋkut, ndien sese, obubit enaŋ-mbakara; andidoro enye ke edem onyuŋ enyene udomo-ŋkpɔ ke ubɔk.

6Ndien ŋkop nte uyo ke ufɔt ŋkpɔ-uwem inaŋ oro ɔdɔhɔde ete, Idomo ibokpot kiet ke okuk kiet, ye idomo barley ita ke okuk kiet; edi kubiat aran ye wine.

7Ke adaŋemi Enye ama akadianare ɔyɔhɔ ufik—ŋkpɔ inaŋ, ŋkop nte uyo ɔyɔhɔ ŋkpɔ-uwem inaŋ ɔdɔhɔde ete, wɔrɔ di.

8Ndien ŋkut, ndien sese, ntɔŋ-ntɔŋ enaŋ-mbakara, ye andidoro enye ke edem, emi enyiŋ esie ekerede Mkpa; obio ekpo onyuŋ etiene enye ke edem. Ndien enɔ mmɔ odudu ke ubak isɔŋ kiet ke itie inaŋ, ete, eda ofut, ye akaŋ, ye idiɔk udɔŋɔ, ye mme unam ikɔt, ewot mmɔ.

9Ke adaŋemi Enye ama akadianare ɔyɔhɔ ufik-ŋkpɔ ition, ŋkut ke idak itie-uwa mme ukpɔŋ owo emi ekewotde kabaŋa ikɔ Abasi ye ikɔ-ntiense eke mmɔ enyenede.

10Ndien mmɔ efiori ke ɔkpɔsɔŋ uyo ete, O Ɔbɔŋ, emi edide Edisana onyuŋ anamde akpanikɔ, adaŋa didie ke editre ndikpe ikpe nnyuŋ nsio usiene iyip nnyin ke idem mme andiduŋ ke isɔŋ?

11Ndien enɔ mmɔ kiet kiet afia edisine-ŋkpɔ, enyuŋ edɔhɔ mmɔ ete, ebet kaŋa ke ekpri ibio ini, tutu ibat nsaŋa-utom mmɔ ye nditɔ-ete mmɔ, eke ediwotde nte mmɔ, ɔyɔhɔ.

12Ndien ŋkut, ke adaŋemi Enye ama akadianare ɔyɔhɔ ufik-ŋkpɔ itiokiet, nte akwa unyek-isɔŋ otibede, utin onyuŋ akabare ebire nte ɔfɔŋ-ikpo eke edade idet edɔk, ofuri ɔfiɔŋ onyuŋ akabare oyibe nte iyip;

13ntantafiɔŋ ikpa-enyɔŋ enyuŋ ekibe eduɔŋɔ ke isɔŋ, nte ŋkim fig ekibede ke eto eduɔŋɔ, ke ini ɔkpɔsɔŋ ofim enyeŋede enye.

14Ndien emen ikpa-enyɔŋ efep nte emi efutde ikpa-ŋwed; enyuŋ emen kpukpru ikpɔ obot ye isuo efep ke itie mmɔ.

15Ndien ndidem isɔŋ, ye mbɔŋ, ye ikpɔ mme etubom ekɔŋ, ye mbon inyene, ye mkpɔsɔŋ owo, ye kpukpru ifin ye nditɔ-isɔŋ edibe ke mme aba ye ke ikpɔ itiat emi edude ke ikpɔ obot;

16mmɔ enyuŋ edɔhɔ ikpɔ obot ye ikpɔ itiat, ete, Eduɔ efuk nnyin, enyuŋ edip nnyin, man nnyin ibɔhɔ iso Anditie ke ebekpo ye iyat esit Eyen-erɔŋ;

17koro akwa usen iyat esit Mmɔ emedi, ndien anie ekeme ndida?