ERIYARARE 3 - Efik Old Bible With Sectional Headings

Etop Enɔde Esɔk Ufɔk-Abasi ke Sardis, Philadelphia ye Laodicea

1 NYUŊ nɔ ŋwed esɔk angel ufɔk Abasi emi odude ke Sardis, ete:

Ntem ke Enye emi enyenede mme Spirit Abasi itiaba, ye ntantafiɔŋ itiaba, ɔdɔhɔ ete; Mmɔfiɔk mme utom fo, nte emenyene enyiŋ, ete ke odu uwem, ndien ama akpa.

2Kabare kpeme ndien, nyuŋ nam se isuhɔde, eke eyomde ndikpa, esɔŋɔ eda: koro akanam ŋkwe baba utom fo kiet ɔwɔrɔde usuŋ ke iso Abasi Mi.

3Ti ndien usuŋ nte akasaŋade ɔbɔ enyene, ye adaŋa nte okokopde, nyuŋ kpeme, nyuŋ kabare esit. Edieke mudu-kpemeke, nyedi nte inɔ, ndien udufiɔkke ini eke ndibuatde fi.

4Edi emenyene enyiŋ ifaŋ do ke Sardis emi mikasabakere edisine-ŋkpɔ mmɔ; mmɔ oro eyesine afia ɔfɔŋidem esaŋa ye Ami, koro mmɔ edotde.

5Owo eke akande, eyesine enye afia ɔfɔŋidem ntem; ndien ndisioho enyiŋ esie mfep ke ŋwed uwem, ndien nyenyime enyiŋ esie ke iso Ete Mi ye ke iso mme angel Esie.

6Yak owo eke enyenede utɔŋ okop se Spirit ɔdɔhɔde mme ufɔk Abasi.

7 Nyuŋ nɔ ŋwed esɔk angel ufɔk Abasi emi odude ke Philadelphia, ete:

Ntem ke Enye emi edide edisana, emi edide ata akpanikɔ, emi enyenede ukpɔhɔre David, emi ɔkpɔhɔrede, ndien baba owo kiet iberike; onyuŋ eberide, ndien baba owo kiet ikpɔhɔkere, ɔdɔhɔ ete, Mmɔfiɔk mme utom fo.

8Sese, ŋkonim fi ana-iŋwaŋ usuŋ ke iso, emi baba owo kiet mikemeke ndiberi, koro emenyene ekpri ukeme omonyuŋ onim uyo Mi, ukonyuŋ ukaŋke enyiŋ Mi.

9Sese, mmɔnɔ mmɔ emi etode synagogue Satan, emi edɔhɔde ete mme imɔ idi mme Jew, ndien mmɔ idige, edi esosu; sese, nyenam mmɔ edi edituak ibuot ke ukot fo, enyuŋ efiɔk ete, Ami ŋkamama fi.

10Sia ama ekekpeme uyo anyan ime Mi, Ami nyenyuŋ ŋkpeme fi ke ini idomo, emi ɔmɔŋ edisim ofuri ererimbot, ndidomo mmɔ emi eduŋde ke isɔŋ.

11Mmɔŋ ndi iwiwa. Sɔŋɔ mum se enyenede kama, mbak owo edibɔ anyanya fo.

12Owo eke akande, nyenam enye edi adaha ke temple Abasi Mi, ndien enye idiwɔrɔke do aba; nyenyuŋ ŋwet enye enyiŋ Abasi Mi ke idem, ye enyiŋ Obio Abasi Mi, kpa obufa Jerusalem, emi otode Abasi Mi ɔsuhɔre ke heaven edi, ye obufa enyiŋ Idem Mi.

13Yak owo eke enyenede utɔŋ okop se Spirit ɔdɔhɔde mme ufɔk Abasi.

14 Nyuŋ nɔ ŋwed esɔk angel ufɔk Abasi emi odude ke Laodicea, ete:

Ntem ke Enye, emi edide Amen, ata ntiense akpanikɔ, ebe-iso ke kpukpru se Abasi obotde, ɔdɔhɔ ete,

15Mmɔfiɔk mme utom fo, nte ubitke unyuŋ ufiopke. Akpakam afo ebit, midige, ofiop.

16Ntre sia edide ndebe, mufiopke munyuŋ ubitke, nyekpɔhi fi nsio ke inua Mi.

17Koro ɔdɔhɔde ete, Mmenyene inyene, mmonyuŋ ŋkɔ inyene, nnyuŋ nnanake ŋkpɔ; ndien udiɔŋɔke ete idi ata nditaha owo, emi enyenede mbɔm, inyuŋ ibuene, inyuŋ idɔŋɔ nnan, inyuŋ inana edisine-ŋkpɔ;

18mmɔnɔ fi item nte edep ke ubɔk Mi gold eke etemde asana ke ikaŋ, man enyene inyene; ye afia edisine-ŋkpɔ ada esine ke idem, mbak but iferi fo ediyarare; ye ibɔk enyin ada eyet enyin fo, man okut usuŋ.

19Ami nsasua nnɔ kpukpru mmɔ emi mmade, nnyuŋ ntunɔ mmɔ; nyene ifiopesit ndien, nyuŋ kabare esit.

20Sese, ndada ke usuŋ ntuak; edieke owo okopde uyo Mi onyuŋ osiode usuŋ, nyeduk ntiene enye, ndia ŋkpɔ ye enye, enye onyuŋ adia ŋkpɔ ye Ami.

21Owo eke akande, nyenɔ enye nditie ye Ami ke ebekpo Mi, kpa nte Ami ŋkakande, nnyuŋ nsuhɔre ntie ye Ete Mi ke ebekpo Esie.

22Yak owo eke enyenede utɔŋ okop se Spirit ɔdɔhɔde mme ufɔk Abasi.