1EKEM nnyin ikabare, ida isaŋ ikeduk ke wilderness ke usuŋ Ididuot Inyaŋ, kpa nte Jehovah ɔkɔdɔhɔde mi; ndien nnyin ikan obot Seir ke edem ikabare ediwak usen.
2Ndien Jehovah ɔdɔhɔ mi, ete,
3Mbufo emekan obot emi ke edem ekabare, ekem: mbufo ewɔŋɔre eka edem edere.
4Nyuŋ teme mbio emi, ete, Mbufo emɔŋ edisaŋa ebe ke adaŋa nditɔ-ete mbufo, nditɔ Esau, emi eduŋde ke Seir; ndien ndik mbufo eyenam mmɔ: mbufo etim ndien ekpeme idem:
5ekuŋwana ye mmɔ; koro mmendinɔŋɔ mbufo isɔŋ mmɔ, baba ke eka ikpat kiet; koro mmaŋkada obot Seir nnɔ nditɔ Esau ke udeme.
6Mbufo eda okuk edep udia ye mmɔ edia; enyuŋ eda okuk ŋko edep mmɔŋ ye mmɔ eŋwɔŋ.
7Koro Jehovah Abasi fo ama ɔdiɔŋ fi ke kpukpru utom ubɔk fo: enye ɔmɔfiɔk nte afo akasaŋade ke akwa wilderness emi: Jehovah Abasi fo ama odu ye afo ke isua mbaba emi; ukananake ŋkpɔ ndomo kiet.
8Ndien nnyin ikebe nditɔ-ete nnyin, nditɔ Esau, emi eduŋde ke Seir, isaŋa ke usuŋ Arabah ikpɔŋ Elath, ye Ezion-geber, ndien ikabare isaŋa ibe ke usuŋ wilderness Moab.
9Ndien Jehovah ɔdɔhɔ mi, ete, Kudutuhɔ nditɔ Moab, kunyuŋ uŋwana ekɔŋ ye mmɔ: koro mmendidaha isɔŋ mmɔ nnɔ fi ada: koro mmaŋkada Ar nnɔ nditɔ Lot enyene.
10Mme Emim ekeduŋ ke esit akpa, ikpɔ owo, ewak, enyuŋ ekoŋ idaha, nte nditɔ Anak;
11emi ekebatde mmɔ ŋko ke Rephaim, nte nditɔ Anak: edi Moab ekot mmɔ ete, Emim.
12Ndien mme Horite ekeduŋ ke Seir akpa; edi nditɔ Esau ebɔ mmɔ itie, enyuŋ esuan mmɔ ke iso mmɔ efep, ndien eduŋ ke itie mmɔ: kpa nte Israel enamde ye isɔŋ udeme mmɔ emi Jehovah ɔnɔde mmɔ.
13Mbufo edaŋa ndien, esaŋa ebe itihere Zered. Ndien nnyin isaŋa ibe itihere Zered.
14Ndien ini emi nnyin iketode ke Kadesh-barnea, isaŋa tutu idibe itihere Zered, edi isua edip ye efureta; tutu ofuri emana mbon-ekɔŋ ekure ke nna, kpa nte Jehovah ɔkɔŋwɔŋɔde abaŋa mmɔ.
15Ubɔk Jehovah onyuŋ otuk mmɔ ŋko, onyuŋ osobo mmɔ ke nna efep, tutu mmɔ ekure.
16Edikem adaŋemi kpukpru mbon-ekɔŋ ema ekekpaŋa ekure ke otu mbio oro,
17Jehovah ɔdɔhɔ mi, ete,
18Afo ɔmɔŋ edibe Ar, adaŋa Moab, mfin emi:
19ndien ke adaŋemi afo edisimde nditɔ Ammon, ekem ye mmɔ, kudutuhɔ mmɔ, kunyuŋ uŋwana ekɔŋ ye mmɔ: koro mmendaha baba ubak isɔŋ nditɔ Ammon nnɔ fi ada: koro mma ŋkada enye nnɔ nditɔ Lot eda.
20(Ekunyuŋ ebat enye ke idut Rephaim: Rephaim ekeduŋ ke esit akpa; ndien nditɔ Ammon ekot mmɔ, ete, Zamzummim;
21mbon oro ekponi, enyuŋ ewak, enyuŋ ekoŋ idaha, nte nditɔ Anakim; ndien Jehovah osobo mmɔ efep ke iso mmɔ; ndien mmɔ ebɔ mmɔ isɔŋ, enyuŋ eduŋ ke itie mmɔ:
22kpa nte enye akanamde ɔnɔ nditɔ Esau emi eduŋde ke Seir, emi enye okosobode mme Horite efep ke iso mmɔ; ndien mmɔ ebɔ mmɔ isɔŋ, enyuŋ eduŋ ke itie mmɔ, tutu osim mfin emi:
23ndien ŋko mme Avvim emi ekeduŋde ke Hazerim, tutu osim ke Gaza, mme Caphtorim emi eketode ke Caphtor, ekesuan mmɔ, enyuŋ eduŋ ke itie mmɔ.)
24Mbufo edaha ke enyɔŋ esaŋa ebe itihere Arnon: sese, mmada Sihon Amorite, ɔbɔŋ Heshbon, ye isɔŋ esie, nnɔ fi ke ubɔk: tɔŋɔ ndida, nyuŋ ŋwana ekɔŋ ye enye.
25Mfin emi mmɔŋ ntɔŋɔ ndinam ndik fo ye uteŋe fo edoro mme idut ke idak ofuri ikpa enyɔŋ, eke edikopde etop fo, ndien mmɔ eyenyek idem, enyuŋ eyomo nsia ebaŋa fi.
26Ndien ntie ke wilderness Kedemoth ndɔŋ mme isuŋ-utom ekedɔhɔ ikɔ
27emem ye Sihon ɔbɔŋ Heshbon, ete, Mbɔk, yak nsaŋa ke isɔŋ fo mbe: nyesaŋa ke ɔkpɔ-usuŋ, ndiwahake ŋka ke ubɔk nnasia, nnyuŋ ŋkaha ke ubɔk ufien.
28Afo eyenyam udia ɔnɔ mi ke okuk, ndia; eyenyuŋ ɔnɔ mi mmɔŋ ke okuk, nda ŋwɔŋ: edi nyeda ukot-ukot nsaŋa mbe;
29kpa nte nditɔ Esau emi eduŋde ke Seir ekenamde ye ami; ye mme Moabite emi eduŋde ke Ar; tutu ŋkebe Jordan nduk ke isɔŋ emi Jehovah Abasi nnyin ɔnɔde nnyin.
30Ndien Sihon ɔbɔŋ Heshbon ikonyimeke ndiyak nnyin isaŋa ibe enye: koro Jehovah Abasi fo ɔkɔsɔŋde enye ibuot, onyuŋ anamde esit esie edi itun, ete ida enye isin fi ke ubɔk, kpa nte edide mfin emi.
31Ndien Jehovah ɔdɔhɔ mi, ete, Sese, mmɔŋ ntɔŋɔ ndida Sihon ye isɔŋ esie nnim ke iso fo: tɔŋɔ ndida, man afo enyene isɔŋ esie.
32Ekem, Sihon ye kpukpru ikɔt esie ewɔŋɔ, ete iŋwana ekɔŋ ke Jahaz.
33Ndien Jehovah Abasi nnyin ada enye onim ke iso nnyin; ndien nnyin isuan enye, ye nditɔ esie, ye ofuri ikɔt esie.
34Nnyin inyuŋ ida kpukpru obio esie ke ini oro, inyuŋ isobo kpukpru obio, ye iren owo, ye iban, ye nditɔwɔŋ; isuhɔke baba nsuhɔ:
35edi nnyin ibume ufene ida ke idem nnyin ye mbume obio oro ikadade.
36Ɔtɔŋɔde ke Aroer, emi odude ke mben itihere Arnon, ye obio emi odude ke itihere, tutu osim ke Gilead, baba obio kiet eke ɔsɔŋde akan nnyin iduhe: Jehovah Abasi nnyin ada kpukpru onim ke iso nnyin:
37edi afo usaŋake ukpere edem nditɔ Ammon, ye ofuri edem itihere Jabbok, ye obio ke ikpɔ obot, ye se Jehovah Abasi nnyin eketemede nnyin baba kiet.
Who We AreWhat We EelieveWhat We Do
2025 by iamachristian.org,Inc All rights reserved.
