1NDIEN Joshua eyen Nun etie ke Shittim ɔdɔŋ owo iba uyep ndibe-ndibe, ete, Mbufo eka ekese isɔŋ oro ye Jericho. Ndien mmɔ eka ekeduk ke ufɔk akpara kiet ekere Rahab, ekedaŋ do.
2Ndien etiŋ enɔ ɔbɔŋ Jericho, ete, Sese, ndusuk owo nditɔ Israel emedi mi mbubreyo emi, ndiyep isɔŋ.
3Ndien ɔbɔŋ Jericho ɔdɔŋ utom ke ɔtɔ Rahab, ete, Sio mbon oro etienede fi, eduk ufɔk fo, di: koro mmɔ emedi ndiyep ofuri edem emi.
4Edi ŋwan oro ada owo iba oro odip, ndien enye ɔdɔhɔ, ete, Edi ntre, mmɔ oro ekedi ke ebiet mi, edi ŋkɔfiɔkke ebiet eke mmɔ etode:
5ndien mmɔ ewɔrɔ adaŋemi eyomde ndisin usuŋ obio, ke ini eyo ebirede: mfiɔkke ebiet emi mmɔ ekade, mbufo esop ebine mmɔ: koro eyesim mmɔ.
6Ndien enye ama ada mmɔ ɔdɔk ke ɔkɔm, ama onyuŋ ada nnyanyaŋa flax emi enye okotimde obon ke enyɔŋ ɔkɔm, odip mmɔ.
7Ndien mbon oro ebine mmɔ ke usuŋ Jordan, esim ke ebiet ube inyaŋ: ndien adaŋemi mme andibine mmɔ ewɔŋɔde, mmɔ esin usuŋ.
8Ekem ke mmɔ mika-inaŋa kaŋa ke isɔŋ, ŋwan oro oto ɔdɔk ke enyɔŋ ɔkɔm etiene mmɔ.
9Ndien enye ɔdɔhɔ mmɔ oro, ete, Mmɔfiɔk nte Jehovah ada isɔŋ emi ɔnɔ mbufo, nte ndik mbufo onyuŋ ɔduɔ nnyin ke idem, nsia onyuŋ oyomo kpukpru mme andiduŋ isɔŋ emi abaŋa mbufo.
10Koro nnyin imekop nte Jehovah akanamde mmɔŋ Ididuot Inyaŋ asat ke iso mbufo, ke ini mbufo eketode ke Egypt ewɔŋɔ; ye nte mbufo ekenyuŋ enamde ndidem mme Amorite mbiba, emi ekedude ke edem Jordan oko, Sihon ye Og, emi mbufo ekesobode.
11Ndien ke adaŋemi nnyin ikekopde, nsia eyemere nnyin, mbufo inyuŋ iyakke aba owo ndomo kiet enyene uko; koro edi Jehovah Abasi mbufo edi Abasi ke ata enyɔŋ, ye isɔŋ ke idak.
12Mbufo etomo ndien Jehovah enɔ mi, mbɔk, ete, Nte emi mfɔnde mfɔn ye mbufo, kpa ntre ŋko ke mbufo edifɔn mfɔn ye ufɔk ete mi, enyuŋ enɔ mi idiɔŋɔ akpanikɔ:
13enyuŋ enim ete mi, ye eka mi, nditɔ-eka mi iren, ye nditɔ-eka mi iban, ye kpukpru se mmɔ enyenede, uwem, enyuŋ enyaŋa uwem nnyin mbak mkpa.
14Ndien mbon oro edɔhɔ enye, ete, Uwem nnyin etie ke ibuot mbufo ke idem mkpa, edieke mbufo midiyarakede ŋkpɔ nnyin emi. Ndien ama ekem, adaŋemi Jehovah edinɔde nnyin isɔŋ emi, nnyin iyefɔn fi mfɔn ye akpanikɔ.
15Ndien enye ada uruk, etie ke window ɔsuhɔre mmɔ: koro ufɔk esie odude ke ibibene obio, enye onyuŋ oduŋ ke ibibene.
16Ndien enye ɔdɔhɔ mmɔ, ete, Mbufo eka ikpɔ obot, mbak mme andibine edisim mbufo; ndien mbufo edibe do ke usen ita, tutu mme andibine efiak edem: ndien mbufo enyɔŋ eke mbufo.
17Ndien mmɔ edɔhɔ enye, ete, Nnyin iyebɔhɔ uŋwɔŋɔ fo emi afo anamde nnyin iŋwɔŋɔ.
18Sese, ke adaŋemi nnyin isimde edem emi, da ididuot uruk emi tebe ke window emi afo etiede ke esit ɔsuhɔre nnyin: nyuŋ nam usɔ, ye uka, ye nditɔ uka, ye ofuri ufɔk usɔ ebono ye afo ke ufɔk emi.
19Ndien ama ekem, owo ekededi ama oto ke usuŋ ufɔk fo oduk ke efak, iyip esie eyesɔp enye, ndien nnyin iyebɔhɔ: edi ama edi owo ekededi eke odude ye afo ke ufɔk, iyip esie eyesɔp nnyin, edieke ubɔk otukde enye.
20Edi afo ama ayarare ikɔ nnyin emi, nnyin iyebɔhɔ ndien uŋwɔŋɔ fo emi afo akanamde nnyin iŋwɔŋɔ.
21Ndien enye ete, Yak edi ke uyo mbufo. Ekem enye ayak mmɔ enyɔŋ, ndien mmɔ eka: enye onyuŋ ada ididuot uruk oro etebe ke window.
22Ndien mmɔ eka ekesim obot, enyuŋ etie do ke usen ita, tutu mme andibine efiak edem. Ndien mme andibine eyom mmɔ ke ofuri usuŋ, edi ikwe.
23Ekem owo mbiba oro efiak, eto ke obot, esuhɔre, ndien mmɔ esaŋa ebe ekesim Joshua eyen Nun, enyuŋ edɔhɔ enye kpukpru se ikɔwɔrɔde mmɔ:
24enyuŋ edɔhɔ Joshua, ete, Ke akpanikɔ ke Jehovah amada ofuri isɔŋ emi ɔnɔ nnyin ke ubɔk; nsia onyuŋ oyomo kpukpru mme andiduŋ isɔŋ emi abaŋa nnyin.
Who We AreWhat We EelieveWhat We Do
2025 by iamachristian.org,Inc All rights reserved.
