JOSHUA 9 - Efik Old Bible With Sectional Headings

Ŋkari Emi Mbon Gibeon Ekekaride Nditɔ Israel

1EDIKEM adaŋemi kpukpru mbɔŋ eke edude ke edem Jordan emi, ke ikpɔ obot, ye ke una-isɔŋ edem inyaŋ, ye ke ofuri mben akwa inyaŋ, ekem ye Lebanon, kpa mme Hittite, ye mme Amorite, ye mme Canaanite, ye mme Perizzite, ye mme Hivite,

2ye mme Jebusite, ekopde; mmɔ esop idem ɔtɔ kiet, ete iŋwana ekɔŋ ye Israel esit kiet.

3Ekem ke ini mme andiduŋ Gibeon ekopde se Joshua akanamde Jericho ye Ai,

4mmɔ ŋko enyuŋ enam ŋkari, eka ekenam nte ŋkpɔ eke mmɔ edide mme isuŋ-utom, eda ŋkani ekpat edori mme ass mmɔ ke edem, ye wine ke ŋkani ikpa emi ewahade, enyuŋ efan;

5mmɔ enyuŋ eda ŋkani ikpa-ukot emi ediɔŋde, esine ke ukot mmɔ, enyuŋ esine ŋkani ɔfɔŋidem ke idem mmɔ; kpukpru uyo ke udia usuŋ mmɔ onyuŋ edi nsat ye mfut-mfut.

6Ndien mmɔ etiene Joshua ke nna ke Gilgal, enyuŋ edɔhɔ enye, ye nditɔ Israel, ete, Nnyin imeto ke anyan idut idi; mbufo enam ndien ediomi ye nnyin.

7Ndien nditɔ Israel edɔhɔ mme Hivite, ete, Ndusuk mbufo eduŋ ke ufɔt nnyin; didie ndien ke nnyin idinam ediomi ye mbufo?

8Ndien mmɔ edɔhɔ Joshua, ete, Nnyin idi ikɔt fo. Ndien Joshua obup mmɔ, ete, Mbufo edi mme anie? enyuŋ eto mmɔŋ?

9Ndien mmɔ edɔhɔ enye, ete, Nnyin ikɔt fo imeto ke ata anyan idut idi, ibaŋa enyiŋ Jehovah Abasi fo: koro nnyin ikokopde etop esie, ye kpukpru se enye akanamde ke Egypt,

10ye kpukpru se enye akanamde mbɔŋ mme Amorite mbiba oro ekedude ke edem Jordan oko, kpa Sihon ɔbɔŋ Heshbon, ye Og ɔbɔŋ Bashan, emi okodude ke Ashtaroth.

11Ndien mbiowo nnyin, ye kpukpru mme andiduŋ edem nnyin ekedɔhɔ nnyin, ete, Mbufo eda udia usuŋ ke ubɔk mbufo, eka ekesobo ye mmɔ, enyuŋ edɔhɔ mmɔ, ete, Nnyin idi ikɔt mbufo. Mbufo enam ndien ediomi ye nnyin.

12Uyo nnyin emi iketimde ke udia usuŋ nnyin ikeda ke ufiop ke ufɔk nnyin, ke usen emi nnyin iwɔrɔde ndidi ke ɔtɔ mbufo; edi ke emi, sese, enye amakabare nsat ye mfut-mfut.

13Mme ikpa wine emi nnyin ikesinde iyɔhɔ, ekenyuŋ edi mbufa: ndien, sese, mmɔ emewaha: ɔfɔŋidem nnyin emi, ye ikpa-ukot nnyin enyuŋ ekabare ŋkani, oto koro usuŋ oyomde eti-eti.

14Ndien mbio oro ebɔ mmɔ udia, inyuŋ ibupke uyo Jehovah.

15Ndien Joshua ekpe emem ye mmɔ, onyuŋ odiomi ediomi ye mmɔ, ete inim mmɔ uwem: mbɔŋ esop enyuŋ eŋwɔŋɔ enɔ mmɔ.

16Edikem ke utit usen ita nte mmɔ ekediomide ediomi ye mmɔ, mmɔ ekop ete ke mmɔ oro ekpere mmimɔ, enyuŋ eduŋ ke otu mmimɔ.

17Ndien nditɔ Israel eda isaŋ edisim: ke obio mmɔ ke ɔyɔhɔ usen ita. Ndien obio mmɔ edi Gibeon, ye Chephirah, ye Beeroth, ye Kiriath jearim.

18Ndien nditɔ Israel iwotke mmɔ: koro mbɔŋ esop eketomode Jehovah Abasi Israel enɔ mmɔ. Edi ofuri esop enam ikɔ ye mbɔŋ oro.

19Ndien kpukpru mbɔŋ oro edɔhɔ ofuri esop, ete, Nnyin ima itomo Jehovah Abasi Israel inɔ mmɔ: ndien ikemeke aba ndituk mmɔ.

20Yak nnyin inam ntem ye mmɔ; inyuŋ inim mmɔ uwem, mbak iyaresit editiene nnyin, abaŋa uŋwɔŋɔ emi nnyin ikɔŋwɔŋɔde inɔ mmɔ.

21Ndien mbɔŋ edɔhɔ mmɔ, ete, Mmɔ eyedu uwem. Ndien mmɔ ekabare edi mme asiak-ifia ye mme okoi-mmɔŋ enɔ ofuri esop; kpa nte mbɔŋ oro ekedɔhɔde mmɔ.

22Ndien Joshua okot mmɔ, onyuŋ ɔdɔhɔ mmɔ, ete, Nsinam mbufo ebiaŋade nnyin, ete ke mbufo edu ata anyan usuŋ ye nnyin; ndien mbufo eduŋ ke ufɔt nnyin?

23Mmɔdo ɔdɔdiɔk ɔnɔ mbufo, mbufo idinyuŋ itreke ndidi ifn, ye mme asiak ifia, ye mme okoi mmɔŋ, nnɔ ufɔk Abasi mi.

24Ndien mmɔ ebɔrɔ Joshua, ete, Koro mmɔ eketiŋde enɔ nnyin ikɔt fo, nte Jehovah Abasi fo okowukde Moses owo esie ndida ofuri edem emi nnɔ mbufo, nnyuŋ nsobo kpukpru mme andiduŋ edem emi ke iso mbufo mfep, ndien oto mbufo nnyin idikhe eti-eti ibaŋa uwem nnyin, ndien inam ŋkpɔ emi.

25Ndien ke emi, se nnyin ke ubɔk fo: nam nte afo esede ete ɔfɔn, onyuŋ enen ndinam ye nnyin.

26Ndien enye anam ntem ye mmɔ, onyuŋ anyaŋa mmɔ osio ke ubɔk nditɔ Israel, ndien mmɔ iwotke mmɔ.

27Ndien ke usen oro Joshua onim mmɔ ke mme asiak-ifia, ye mme okoi mmɔŋ ɔnɔ mbon esop ye itie-uwa Jehovah tutu osim esop ye itie-uwa Jehovah tutu osim mfin emi, ɔnɔ ebiet eke enye edimekde.