NEHEMIAH 3 - Efik Old Bible With Sectional Headings

Mme Ikpehe Utom Nte Enyenede Ndida Mbɔp Jerusalem

1NDIEN Eliashib akamba oku, ye nditɔ-ete esie, mme oku, edaha ke enyɔŋ ebɔp inua-otop ŋkpri ufene; mmɔ enim enye enɔ Abasi, enyuŋ ekɔŋ itim esie, enyuŋ enim enye enɔ Abasi tutu osim ke tower Hammeah, ye ke tower Hananel.

2Ndien mbio-obio Jericho ebɔp ediana enye. Zaccur eyen Imri onyuŋ ɔbɔp adiana mmɔ.

3Ndien nditɔ Hassenaah ebɔp inua-otop iyak, mmɔ enam obubɔk esie, enyuŋ ekɔŋ itim esie, ye locks esie, ye usin-usuŋ esie.

4Ndien Meremoth eyen Uriah, eyen Hakkoz, ɔdiɔŋ adiana mmɔ. Ndien Meshullam eyen Berechiah, eyen Meshezabeel ɔdiɔŋ adiana mmɔ. Zadok eyen Baana onyuŋ ɔdiɔŋ adiana mmɔ.

5Mbio-obio Tekoa enyuŋ ediɔŋ ediana mmɔ; edi mbɔŋ mmɔ isinke itɔŋ mmɔ ke utom ɔbɔŋ mmɔ.

6Ndien Joiada eyen Paseah, ye Meshullam eyen Besodeiah ediɔŋ akani inua-otop; mmɔ enam obubɔk esie, enyuŋ ekɔŋ itim esie, ye locks esie, ye usin-usuŋ esie.

7Ndien Melatiah Gibeonite, ye Jadon Meronothite, ye mbio Gibeon ye eke Mizpah ediɔŋ ediana mmɔ, tutu osim ke itie ubɔŋ andikara edem akpa emi.

8Ndien Uzziel eyen Harhaiah owo mbon-usɔ gold kiet ɔdiɔŋ adiana enye. Ndien Hananiah eyen mme abuak-ibɔk kiet ɔdiɔŋ adiana enye. Ndien mmɔ ediɔŋ Jerusalem tutu esim ke edidobi ibibene.

9Ndien Rephaiah eyen Hur, etubom ubak Jerusalem kiet ɔdiɔŋ adiana mmɔ.

10Jedaiah eyen Harumaph onyuŋ ɔdiɔŋ adiana mmɔ, ekem ye ufɔk esie. Ndien Hattush eyen Hashabneiah ɔdiɔŋ adiana enye.

11Malchijah eyen Harim, ye Hasshub eyen Pahath-moab ediɔŋ ubak ekem ye tower mme furnance.

12Shallum eyen Hallohesh, etubom ubak Jerusalem, ye nditɔ-iban esie ediɔŋ ediana enye.

13Hanum ye mme andiduŋ Zanoah ediɔŋ inua-otop itihere; mmɔ ediɔŋ enye, enyuŋ ekɔŋ mme itim esie, ye locks esie, ye usin-usuŋ esie; enyuŋ ebɔp ibibene ke tɔsin ibio-idomo-okuk, tutu osim ke inua-otop ifum.

14Edi Malchijah eyen Rechab, etubom ubak Beth-haccerem, ediɔŋ inua-otop ifum. Enye ɔbɔp enye, onyuŋ ɔkɔŋ itim esie, ye locks esie, ye usin-usuŋ esie.

15Edi Shallun eyen Col-hozeh, etubom ubak Mizpah, ɔdiɔŋ inua-otop idim; enye ɔbɔp enye, onyuŋ okubi enye, onyuŋ ɔkɔŋ itim esie, ye locks esie, ye usin-usuŋ esie, ye ibibene mkpɔdiɔhɔ-mmɔŋ Shelah tutu osim iŋwaŋ-esa edidem, udigukot emi otode ke obio David ɔsuhɔre.

16Ndien Nehemiah eyen Azbuk, etubom ubak Beth-zur, ɔdiɔŋ adiana enye, tutu ekem ye udi David, ye mkpɔdiɔkhɔ-mmɔŋ emi ekenamde, ye ke ufɔk mbon-uko.

17Ndien mme Levite ediɔŋ ediana enye, Rehum eyen Bani. Hashabiah, etubom ubak Keilah, ɔdiɔŋ adiana enye, ke ubak esie.

18Ndien nditɔ-ete mmɔ, Bavvai eyen Henadad, etubom ubak Keilah, ediɔŋ ediana enye.

19Ndien Ezer eyen Jeshua, etubom Mizpah, adiana enye ɔdiɔŋ ubak efen, ekem ye usuŋ emi edɔkde ke ufɔk unim-ŋkpɔ-ekɔŋ ke inuk.

20Baruch eyen Zabbai esin idem ɔdiɔŋ ubak efen ɔtɔŋɔde ke inuk tutu osim enyn-usuŋ ufɔk Eliashib, ɔbɔŋ oku.

21Meremoth eyen Uriah, eyen Hak-koz, adiana enye ɔdiɔŋ ubak efen, ɔtɔŋɔde ke enyin-usuŋ ufɔk Eliashib, tutu osim ke utit ufɔk Eliashib.

22Ndien mme oku, mbon itihere Jordan, ediɔŋ ediana enye.

23Ndien Benjamin ye Hasshub ediana enye ediɔŋ ekem ye ufɔk mmɔ. Azariah eyen Maaseiah, eyen Ananiah, adiana enye ɔdiɔŋ ke mben ufɔk esie.

24Binnui eyen Henadad adiana enye ɔdiɔŋ ubak efen, ɔtɔŋɔde ke ufɔk Azariah tutu osim ke ukabare ibibene ke inuk.

25Palal eyen Uzai ekem ye ukabare ibibene ye tower, emi ɔwɔrɔde ekem ye ufɔk enyɔŋ edidem, emi ekperede okure ufɔk ukwak. Pedaiah eyen Parosh onyuŋ adiana enye.

26Ndien ŋko mme Nethinim eduŋ ke Ophel, tutu ekem ye inua-otop mmɔŋ ese edem usiaha-utin, ye tower emi ɔwɔrɔde ada.

27Ndien mbio-obio Tekoa ediana enye ediɔŋ ubak efen, ekem ye akwa tower emi ɔwɔrɔde ada, tutu osim ke ibibene Ophel.

28Ɔtɔŋɔde ke inua-otop mme horse, mme oku ediɔŋ, kpukpru owo ekem ye esien mmɔ.

29Zadok eyen Immer adiana mmɔ ɔdiɔŋ ekem ye ufɔk esiemɔ. Ndien Shemaiah eyen Shecaniah andikpeme inua-otop ke edem usiaha utin ɔdiɔŋ adiana enye.

30Ndien Hananiah eyen Shelemiah, ye Hanun, ɔyɔhɔ eyen Zalaph itio-kiet, ediana enye ediɔŋ ubak efen. Ndien Meshullam eyen Berechiah, adiana enye ɔdiɔŋ ekem ye ubet esie.

31Ndien Malchijah eyen owo-usɔ-gold adiana enye ɔdiɔŋ tutu osim ebiet mme Nethinim, ye eke mbon-urua, ekem ye inua-otop Hammiphkad, tutu osim ke usuŋ emi edɔkde ke inuk.

32Ndien mbon-usɔ-gold, ye mbon urua ediɔŋ ufaŋ usuŋ emi edɔkde ke inuk ye inua-otop ŋkpri ufene.