DANIEL 3 - Efik Old Bible With Sectional Headings

Nebuchadnezzar Obot abasi O-gold

1NEBUCHADNEZZAR edidem akanam akamba owo o-gold: idaha esie edi ibio-idomo-okuk ata: ubom esie edi ibio-idomo-okuk itiokiet: ndien onim enye ke una-isɔŋ Dura ke esien Babylon.

2Ndien edidem Nebuchadnezzar ɔdɔŋ ekebon mme satrap, ye mme andikara mme esien, ye mme etubom, ye mme ebierikpe, ye mme andikama inyene, ye mbon ewuhɔ, ye mme ekpe obio, ye kpukpru mbɔŋ mme esien, ete edi usɔrɔ mbiet owo oro edidem Nebuchadnezzar okonimde.

3Ekem mme satrap, ye mme andikara mme esien, ye mme etubom, ye mme ebierikpe, ye mme andikama inyene, ye mbon ewuhɔ, ye mme ekpe obio, ye kpukpru mbɔŋ mme esien ebono ke usɔrɔ mbiet owo oro edidem Nebuchadnezzar okonimde.

4Ndien ataŋa kiet ɔkwɔrɔ ɔkpɔsɔŋ, ete, Ke ewuk mbufo mme idut, ye obio, ye usem, ete,

5Ke ini emi mbufo ekopde uyo obukpoŋ, ye ifiom, ye harp, ye sackbut, ye psaltery, ye dulcimer, ye kpukpru oruk ndido, mbufo eduɔŋɔ ke isɔŋ enyuŋ etuak ibuot enɔ owo o-gold emi edidem Nebuchadnezzar okonimde:

6ndien ama edi owo ekededi eke mididuɔhɔ ke isɔŋ, midinyuŋ ituakke ibuot, kpasuk ndo-ndo oro eyemen enye eduɔk ke ufɔt akwa ikaŋ eke asakde.

7Oto oro kpasuk ini oro kpukpru mme idut ekopde uyo obukpoŋ, ye ifiom, ye harp, ye sackbut, ye psaltery, ye kpukpru oruk ndido, kpukpru mme idut ye obio ye usem eduɔŋɔ ke isɔŋ enyuŋ etuak ibuot enɔ owo o-gold oro edidem Nebuchadnezzar okonimde.

8Mmɔdo ndo-ndo oro ndusuk owo mme Chaldean esaŋa ekpere edibia mme Jew.

9Mmɔ ebɔrɔ enyuŋ edɔhɔ Nebuchadnezzar, edidem, ete, O edidem, yak itɔŋ uwem akam ɔsɔŋ fi ke nsinsi:

10afo, O edidem, okowuk ewuhɔ, ete, Kpukpru owo eke edikopde uyo obukpoŋ, ye ifiom, ye harp, ye sackbut, ye psaltery, ye dulcimer, ye kpukpru oruk ndido, eduɔŋɔ ke isɔŋ enyuŋ etuak ibuot enɔ owo o-gold emi:

11ndien eyeda owo ekededi eke miduɔhɔ ke isɔŋ minyuŋ ituakke ibuot, eduɔk ke ufɔt akwa ikaŋ eke asakde.

12Enyene ndusuk nditɔ mme Jew oro afo okonimde, ete esaŋa ŋkpɔ esien Babylon, Shadrach ye Meshach ye Abednego; mme mmɔ emi, O edidem, ibatke fi ke baba ŋkpɔ kiet; mmɔ ikponoke abasi fo, inyuŋ ituakke ibuot inɔ owo o-gold emi afo onimde.

13Ndien edidem Nebuchadnezzar ke ifuresit ye iyaresit ɔnɔ uyo, ete eda Shadrach ye Meshach ye Abednego edi.

14Ndien mmɔ edida ke iso edidem. Nebuchadnezzar ɔbɔrɔ onyuŋ ɔdɔhɔ mmɔ, ete, Shadrach, Meshach, Abednego, nte mbufo ekekoi enam? Nte mbufo inamke ŋkpɔ inɔ abasi mi, inyuŋ ituakke ibuot inɔ owo o-gold emi ŋkonimde?

15Edi edieke mbufo enyimede ndien ndiduɔŋɔ ke isɔŋ nnyuŋ ntuak ibuot nnɔ owo o-gold emi ŋkowukde, ke adaŋemi mbufo edikopde uyo obukpoŋ, ye ifiom, ye harp, ye sacbut, ye psaltery, ye dulcimer, ye kpukpru oruk ndido, ɔfɔn: edi mbufo mituakke ibuot, ke ndo-ndo emi eyemen mbufo eduɔk ke akwa ikaŋ eke asakde; ndien ewe abasi odu eke edikemede ndinyaŋa mbufo nsio mi ke ubɔk?

16Shadrach ye Meshach ye Abednego ebɔrɔ enyuŋ edɔhɔ edidem Nebuchadnezzar, ete, Nnyin ikpaha ndibɔrɔ fi baba ŋkpɔ kiet.

17Sese, Abasi nnyin emi nnyin inamde ŋkpɔ esie emekeme ndinyaŋa nnyin nsio ke akwa ikaŋ emi asakde: ndien enye eyenyaŋa nnyin osio fi ke ubɔk, O edidem.

18Ndien midige ntre, fiɔk, O edidem, ete ke nnyin ikwe nte inamde ŋkpɔ abasi fo, inyuŋ ikwe nte ituakde ibuot inɔ owo o-gold emi afo okonimde.

19Ndien esit ofut Nebuchadnezzar eti-eti, iso esie onyuŋ akabare ese Shadrach ye Meshach ye Abednego idiɔk. Enye ɔbɔrɔ onyuŋ ɔnɔ uyo, ete enam ikaŋ asak ke akwa ikaŋ utim ikatiaba akan nte ekam esikutde.

20Ndien enye ɔdɔhɔ ata mkpɔsɔŋ owo eke edude ke otu mbon-ekɔŋ esie, ete ebɔp Shadrach ye Meshach ye Abednego, enyuŋ emen mmɔ eduɔk ke akwa ikaŋ oro asakde.

21Ndien ebɔp mmɔ ye ɔfɔŋ-ukot mmɔ, ye anana-ubɔk mmɔ, ye ekure mmɔ, ye edisine-ŋkpɔ mmɔ efen, ndien emen mmɔ eduɔk ke ufɔt akwa ikaŋ oro asakde.

22Ndien koro uyo edidem ɔsɔpde, koro ikaŋ onyuŋ asakde ɔkpɔsɔŋ, edemikaŋ owot mmɔ oro ekemende Shadrach ye Meshach ye Abednego.

23Ke ntre ke owo mbita oro, Shadrach ye Meshach ye Abednego emi ekebɔpde, eduɔŋɔ ke ufɔt akwa ikaŋ oro asakde.

24Ekem idem akpa Nebuchadnezzar edidem, ndien enye obumere adaha ke enyɔŋ, ɔbɔrɔ, onyuŋ ɔdɔhɔ mme andinɔ enye item, ete, Nte idige owo ita ke nnyin ikɔbɔp iduɔk ke ufɔt ikaŋ? Mmɔ ebɔrɔ edidem, ete, Ke edi akpanikɔ, O edidem.

25Enye ɔbɔrɔ onyuŋ ɔdɔhɔ, ete, Sese, ami mmokut owo inaŋ etarade esaŋa ke ufɔt ikaŋ oro, baba ŋkpɔ kiet inyuŋ inamke mmɔ: ndien idem ɔyɔhɔ inaŋ ebiet eke eyen abasi.

26Nebuchadnezzar asaŋa ekpere inua akwa ikaŋ oro asakde, ɔkɔbɔrɔ, onyuŋ ɔdɔhɔ, ete, Shadrach, Meshach, Abednego, mbufo ikɔt Abasi ibom ewɔŋɔ edi. Ndien Shadrach ye Meshach ye Abednego ewɔŋɔ ke ufɔt ikaŋ.

27Ndien mme satrap, ye mbɔŋ, ye mme etubom, ye mme andinɔ edidem item ebono, ekut ete ke ikaŋ ikanke idem mbon oro, ke inyuŋ ifrike mmɔ baba idet ibuot kiet, ɔfɔŋ-ukot mmɔ inyuŋ ikpuhɔkede, baba utebe ikaŋ inyuŋ isimke mmɔ.

28Nebuchadnezzar ɔbɔrɔ onyuŋ ɔdɔhɔ ete, Ekɔm Abasi Shadrach ye Meshach ye Abednego, emi ɔkɔdɔŋde angel esie, onyuŋ anyaŋade ikɔt esie emi ebuɔtde idem mmɔ ye enye, enyuŋ ekpuhɔrede uyo edidem, enyuŋ eyak idem mmɔ, man ekunam ŋkpɔ, ekunyuŋ etuak ibuot enɔ baba abasi kiet, ke mibɔhɔke Abasi idem mmɔ.

29Ami nnyuŋ ŋwuk ewuhɔ, nte ke eyeda idut, ye obio, ye usem eke etiŋde se minenke edian Abasi Shadrach ye Meshach ye Abednego, ekpok mmɔ mbak-mbak, enyuŋ enim ufɔk mmɔ ke ekwe: koro baba Abasi efen eke ekemede ndinyaŋa ntem miduhe.

30Ndien edidem ofori Shadrach ye Meshach ye Abednego ke esien Babylon.