NEHEMIAH 4 - Efik Old Bible With Sectional Headings

Enɔ Nbon Ukpeme Ekpeme Mbon Utom Nehemiah Mbak Mme Asua

1EDIKEM adaŋemi Sanballat okopde ete ke nnyin imediɔŋ ibibene, enye ayat esit, onyuŋ akpaha esit eti-eti, onyuŋ asak mme Jew.

2Enye onyuŋ ɔdɔhɔ ke iso nditɔ-ete esie, ye mbon-ekɔŋ Samaria, ete, Mbukpo Jew emi ke enam nso? Nte ediyak mmɔ? Mme mmɔ ediwa uwa? Mme mmɔ edinam ema ke usen kiet? Nte mmɔ edidemere itiat esioŋo ke ibombom ntan, ndien mmɔ ema eta ikaŋ?

3Tobiah Ammonite onyuŋ odu enye ke ŋkaŋ, ndien enye ɔdɔhɔ ete, Kpasuk se mmɔ ebɔpde, jackal ama ɔdɔk, ekeme ndiwuri ibibene itiat mmɔ.

4O Abasi nnyin, kop; koro esinde nnyin ke ndek: nyuŋ nam nsahi mmɔ afiak okodoro mmɔ ke ibuot, nyuŋ nim mmɔ ke ŋkpɔ nsahi ke edem emi mmɔ etiede nte mbuot ekɔŋ:

5kunyuŋ ufuk mme ukwaŋ-ŋkpɔ mmɔ, kunyuŋ usɔhi mme idiɔk ido mmɔ ke iso fo ufep: koro mmɔ edade uyat-uyat ŋkpɔ etiene mmɔ eke ebɔpde.

6Ntem ke nnyin idiɔŋ ibibene; inyuŋ idian ofuri ibibene tutu osim ke ufɔt esie; koro esit kpukpru owo odude ke utom.

7Edikem adaŋemi Sanballat, ye Tobiah, ye mme Arabian, ye mme Ammonite, ye mme Ashdodite, ekopde ete ke ediɔŋ ibibene Jerusalem eka iso, ke etɔŋɔ ndisiri ŋwure, ndien esit ayat mmɔ eti-eti.

8Ndien kpukpru mmɔ ediomi kiet ye eken, ete ika ikaŋwana ye Jerusalem, inyuŋ inam enye idiɔk-ŋkpɔ.

9Ndien nnyin ikpe Abasi nnyin ubɔk, inyuŋ inim mbon-ukpeme ibaŋa mmɔ ke uwemeyo, ye ke okoneyo, ibak mmɔ.

10Ndien Judah ɔdɔhɔ, ete, Odudu mbon mbiomo ebieŋe, ibombom ŋwure enyuŋ ewak; ndien nnyin ikemeke ndibɔp ibibene.

11Ndien mme asua nnyin edɔhɔ, ete, “Mmɔ idifiɔkke, idinyuŋ ikwe, tutu nnyin iduk ke otu mmɔ, inyuŋ iwot mmɔ, inyuŋ inam utom mmɔ edop.”

12Edikem adaŋemi mme Jew emi eduŋde ediana mmɔ edide, enyuŋ edɔhɔ nnyin ntre utim ikoduop, ke kpukpru ebiet eke mmɔ etode etiene nnyin:

13ndien ami nda kpukpru owo ke ubon, ke ubon, ekama ofut mmɔ, ye eduat mmɔ, ye utiga mmɔ, nnim ke edisuhɔre ebiet, ke edem ibibene ke iberutin.

14Ndien ŋkut, nnyun ndaha ke enyɔŋ, nnyuŋ ndɔhɔ mbɔŋ, ye mme ebiere-ikpe, ye kpukpru mmɔ efen, nte, Mbufo ekufehe mmɔ: mbufo eti Ɔbɔŋ emi okponde, onyuŋ enyenede uteŋe, ndien eŋwana ekɔŋ enɔ nditɔ-ete mbufo, ye nditɔ-iren mbufo, ye nditɔ-iban mbufo, ye iban mbufo, ye mme ufɔk mbufo.

15Edikem adaŋemi mme asua nnyin ekopde ete ke nnyin ifɔfiɔk, ke Abasi onyuŋ asuan uduak mmɔ, ndien nnyin kpukpru ifiak ke ibibene, kpukpru owo ke utom nnyin.

16Edikem toto ke usen oro, ubak ikɔt mi enam utom, ubak mmɔ enyuŋ ekama eduat, ye otu-ekɔŋ, ye utiga, ye ɔfɔŋidem ekɔŋ; mme etubom enyuŋ eda ke edem ofuri ufɔk Judah.

17Mmɔ eke ebɔpde ibibene, ye mbon mbiomo, ye mmɔ eke emende mbiomo edori, eda ubɔk kiet enam utom, enyuŋ eda eken emum ŋkpɔ ekɔŋ.

18Ndien kpukpru mme andibɔp ebɔbɔ ofut mmɔ ke isin mmɔ, ndien ntem ke mmɔ ebɔp. Owo eke ofuride obukpoŋ onyuŋ odu mi ke ŋkaŋ.

19Ndien ndɔhɔ mbɔŋ, ye mme ebierikpe, ye mbio-obio efen, nte, utom emi okpon akan, nnyin imonyuŋ idianare kiet ye kiet ke ibibene ida anyan ebiet.

20Ke ebiet emi mbufo edikopde uyo obukpoŋ, do ke mbufo edisop ye nnyin: Abasi nnyin eyeŋwana ekɔŋ ɔnɔ nnyin.

21Ntem ke nnyin inam utom: ndien ubak mmɔ ekama eduat, toto ke usiere tutu ntantafiɔŋ ewɔŋɔ.

22Ndien ŋko ke ini oro ndɔhɔ kpukpru owo, nte, Yak kpukpru owo ye ikɔt mmɔ edaŋ ke esit Jerusalem, man ekpeme nnyin ke okoneyo, enyuŋ enam utom ke uwemeyo.

23Ndien ami, ye nditɔ-ete mi, ye ikɔt mi, ye mbon-ukpeme emi etienede mi, baba owo nnyin kiet isioho ɔfɔŋidem nnyin, kpukpru owo enyene ŋkpɔ-ekɔŋ mmɔ ye mmɔŋ ke ŋkaŋ.