ISAIAH 42 - Efik Old Bible With Sectional Headings

Isuŋ-Utom Abasi Edi Uŋwana Ɔnɔ Ererimbot

1SE owo mi; nyemum enye ŋkama: se edimek owo mi emi adatde mi esit; mmodori enye spirit mi ke idem: enye eyenam ikpe ɔwɔrɔ ɔnɔ mme idut.

2Enye idifiorike, idinyuŋ imenekede uyo esiemɔ, inyuŋ iyakke ekop uyo esie ke efak.

3Enye idibuŋke esaŋ eke anuahade, idinyuŋ inimeke ɔfɔŋ utuenikaŋ eke etiede nnime-nnime: enye eyeda ikpe ɔwɔrɔ ɔnɔ akpanikɔ.

4Esit ididuɔhɔ enye, idem idinyuŋ ikpaha enye, tutu enye onim ikpe ke ererimbot: mme isuo eyenyuŋ ebet mme ewuhɔ esie.

5Emi edi uyo Abasi Jehovah, emi okobotde enyɔŋ onyuŋ anyanarede mmɔ; emi ebride isɔŋ, ye se itibede ke esit; emi adade ibifik ɔnɔ kpukpru owo emi edude ke esit, ada spirit ɔnɔ kpukpru mmɔ emi esaŋade ke esit:

6Ami Jehovah mmokot fi ke edinen ido, nyenyuŋ mmum fi ubɔk ŋkama, nnyuŋ ŋkpeme fi, nnyuŋ nnim fi ke ediomi mbio-obio, ye ke uŋwana mme idut;

7man atat enyin eke ekimde, onyuŋ osio mbon ŋkpɔkɔbi ke ufɔk ukwak, osio mmɔ eke etiede ke ekim efep ke ufɔk ebuka.

8Ami ndi Jehovah; enyiŋ mi edi oro: ndinyuŋ nnɔŋɔ owo efen ubɔŋ mi, nnɔŋɔ ndisɔi mbiet itoro mi.

9Mbemiso ŋkpɔ, sese, mmɔ edi, ami nnyuŋ ntiŋ mbufa ŋkpɔ: ke mikaitibeke kaŋa, mbuk mmɔ nnɔ mbufo.

10Mbufo ekwɔ obufa ikwɔ enɔ Jehovah, ye itoro esie ke utit ererimbot, mbufo emi esuhɔde ke inyaŋ, ye se iyɔhɔde ke esit, mbufo mme isuo ye mme andiduŋ mmɔ.

11Wilderness ye mme obio esie eyemenere uyo, mme nna emi Kedar oduŋde: mme andiduŋ akwa itiat eyefiori, mmɔ eyetie ke enyɔŋ ikpɔ obot esio mkpo.

12Eyenim ubɔŋ enɔ Jehovah, enyuŋ ebuk itoro esie ke otu mme isuo.

13Jehovah eyewɔrɔ nte owo uko, eyedemere ufup nte owo ekɔŋ: enye eyefiori, eyefiori akamba; eyesɔŋɔ idem akan mme asua esiemɔ.

14Mma ndop uyo tutuko; (nte) ndisioroke uyo, nyemum idem mi ŋkama: nyefiori nte ŋwan uman; esit eyekibe mi, nyenyuŋ ŋkot ibifik ini kiet.

15Nyesobo ikpɔ obot ye ŋkpri, nnyuŋ nnam kpukpru ikɔŋ mmɔ asat; nnyuŋ ŋkabare mme akpa mmɔŋ edi isuo, nnyuŋ nnam mkpɔdiɔhɔ-mmɔŋ esat.

16Ndien nyenam mme nnan esaŋa ke usuŋ eke mmɔ mifiɔkke; nnyuŋ nnam mmɔ edigi ke ɔkpɔ-usuŋ eke mmɔ mifiɔkke: nnyuŋ nnim ekim ke uŋwana, ye mme ŋkwaŋa ŋkpɔ ke se inende. Mmɔ emi edi ŋkpɔ eke ndinamde nnɔ mmɔ nnyuŋ ŋkpɔŋke mmɔ.

17Mmɔ eke ebuɔtde idem mmɔ ye ndisɔi mbiet, mmɔ eke edɔhɔde nditara mbiet, ete, “Mbufo edi abasi nnyin,” efiak edem enyuŋ ekut ata but.

18Mbufo mme inan ekop; mbufo mme nnan etiŋ enyin, man ekut.

19Anie edi nnan ke mibɔhɔke owo mi? Anie edi inan nte isuŋ mi emi ndɔŋde enye utom? Anie edi nnan nte enye emi ɔfɔnde ama, ye nnan nte owo Jehovah?

20Afo omokut ediwak ŋkpɔ, edi udunimke; ke esirere utɔŋ, edi idikopke.

21Esit enem Jehovah abaŋa edinen ido esie; enye eyekpono mme ewuhɔ, onyuŋ ɔnɔ mmɔ ubɔŋ.

22Edi enye emi edi idut eke owo ebumede enyuŋ enamde mmɔ nnama; eke kpukpru mmɔ esikede ke ndudu, enyuŋ edibede ke ufɔk ebuka: mmɔ emekebare edi ŋkpɔ mbume, ndien baba owo kiet eke osiode mmɔ iduhe; mmɔ emekabare edi ŋkpɔ nnama, ndien baba owo kiet idɔhɔke, ite, Yak nɔ.

23Anie ke otu mbufo edikpaŋ utɔŋ ke emi? Anie edibiɔŋ utɔŋ onyuŋ okop ke ini iso?

24Anie ɔnɔ Jacob ke ŋkpɔ nnama, anie onim Israel ke ŋkpɔ mbume? Nte idige Jehovah, emi nnyin iduede enye, ndien minyimeke ndisaŋa ke usuŋ esie, minyuŋ ikopke mme ewuhɔ esie?

25Ndien enye ada ikaŋ iyaresit esie ye odudu ekɔŋ aŋwaŋa enye ke idem; ndien oro okim enye ikaŋ akanade okuk, edi enye ifiɔkke; onyuŋ ɔfɔp enye, edi enye inimke ibuot ke esit.