1O ISRAEL, mbufo ekop, ndien, mme ewuhɔ, ye mbet emi ŋkpepde mbufo nte enam, man mbufo edu uwem, enyuŋ eduk ekeda isɔŋ emi Jehovah Abasi mme ete mbufo ɔnɔde mbufo.
2Ekuda ikɔ efen edian ke ikɔ emi ami ntemede mbufo, ekunyuŋ esio ke esit efep, man mbufo enim mbet Jehovah Abasi mbufo emi ami ntemede mbufo.
3Enyin mbufo emekut se Jehovah akanamde ke ikɔ Baal-peor; koro ama edi kpukpru owo emi eketienede Baal-peor, Jehovah Abasi mbufo ama osobo mmɔ ke otu mbufo efep.
4Edi kpukpru mbufo emi ekeyirede ye Jehovah Abasi mbufo ededu uwem tutu osim mfin emi.
5Sese, mma nteme mbufo mme ewuhɔ ye mme item, kpa nte Jehovah Abasi mi eketemede mi, man mbufo enam ntre ke isɔŋ emi mbufo eyomde ndika do ŋkada nnyene.
6Mbufo etiŋ enyin, ndien, enam: koro emi edide eti ibuot mbufo, ye asian mbufo, ke iso mme idut, emi edikopde kpukpru mme ewuhɔ emi, ndien mmɔ eyedɔhɔ ete, Ho, akamba idut emi edi mbon eti ibuot, onyuŋ edi asian.
7Koro ewe akamba idut odu emi abasi esie ekperede enye, nte Jehovah Abasi nnyin, ke kpukpru se nnyin iseseme inɔ enye?
8Ndien ewe akamba idut odu emi enyenede edinen ewuhɔ ye item, ebiet ofuri ŋwed mbet emi ami nnimde ke iso mbufo mfin emi?
9Edi kpeme idem fo, nyuŋ tim kpeme ukpɔŋ fo, man afo okufre ŋkpɔ emi enyin fo ekekutde, man mmɔ ekunyuŋ ewɔrɔ ke esit fo, ofuri ini uwem fo: ndien da mmɔ kpep nditɔ fo, ye nditɔ nditɔ fo:
10usen oro afo akadade ke iso Jehovah Abasi fo ke Horeb, ke ini Jehovah ɔkɔdɔhɔde mi, ete, Bon mbio emi ɔtɔ kiet nɔ mi, ndien nyenam mmɔ ekop ikɔ mi, man mmɔ ekpep ndibak mi ofuri ini emi mmɔ edidude uwem ke isɔŋ oro, man mmɔ enyuŋ ekpep nditɔ mmɔ.
11Ndien mbufo esaŋa ekpere eketuak eda ke usuhɔre obot; ndien obot oro asak ikaŋ, osim ufɔt ikpa-enyɔŋ, ekim, obubit enyɔŋ, ye ata Ɔkpɔsɔŋ ekim enyuŋ edu.
12Ndien Jehovah etie ke esit ikaŋ ɔdɔhɔ ye mbufo: mbufo ekekop uyo ikɔ edi ikwe mbiet ŋkpɔ: ke mibɔhɔke uyo-uyo.
13Ndien enye asiak ediomi esie ɔnɔ mbufo, emi enye etemede mbufo ete enam, kpa ikɔ mboduop oro: enye onyuŋ ewet mmɔ esin ke itiat ŋwed iba.
14Ndien Jehovah ɔdɔhɔ mi ini oro, ete ŋkpep mbufo ewuhɔ ye item, kpaŋ mbufo ekpenam mmɔ ke isɔŋ emi mbufo ebede do ndida nnyene.
15Mbufo etim ndien ekpeme idem mbufo eti-eti: koro mbufo mikekwe baba mbiet ŋkpɔ kiet ke usen oro Jehovah eketiede ke ufɔt ikaŋ oro ɔdɔhɔ ye mbufo ke Horeb:
16mbak mbufo edikabare ediɔk, enyuŋ enam edisɔi mbiet ŋkpɔ ekededi enɔ idem mbufo, eke ebietde eren mme ŋwan,
17mbiet unam ekededi eke odude ke isɔŋ, ye mbiet inuen mba ekededi eke efede ke ikpa-enyɔŋ,
18mbiet ŋkpɔ ekededi eke ɔnyɔnide ke isɔŋ, ye mbiet iyak ekededi eke odude ke mmɔŋ ke idak isɔŋ:
19mbak afo edinyuŋ emenere enyin fo ese enyɔŋ, onyuŋ okut utin, ye ɔfiɔŋ, ye ntantafiɔŋ, kpa ofuri udim enyɔŋ, ndien enuk fi awaha akatuak ibuot ɔnɔ mmɔ, onyuŋ anam ŋkpɔ ɔnɔ mmɔ emi Jehovah Abasi fo ama ekedeme ɔnɔ kpukpru mme idut ke idak enyɔŋ.
20Ndien Jehovah akada mbufo oto ke ikaŋ utara-ukwak, ke Egypt, ɔwɔrɔ, man edi mbio udeme esie, nte edide mfin emi.
21Ndien ŋko Jehovah akayat esit ye ami abaŋa mbufo, onyuŋ ɔŋwɔŋɔ ete, Ami ndibehe Jordan emi, ndinyuŋ ndukke ke eti isɔŋ, emi Jehovah Abasi fo ɔnɔde fi ke udeme:
22koro ami mmɔŋ ndikpa ke isɔŋ emi, ndibehe Jordan; edi mbufo eyebe ekeda eti isɔŋ oro enyene.
23Mbufo ekpeme idem, mbak edifre ediomi Jehovah Abasi mbufo, emi enye okodiomide ye mbufo, ndien eka ekenam edisɔi mbiet ŋkpɔ ekededi ke idem mbufo, emi Jehovah Abasi fo akpande fi.
24Koro Jehovah Abasi fo edide edisak ikaŋ ye Abasi ufup.
25Ke adaŋemi afo edibonde nditɔ ye nditɔ nditɔ, mbufo enyuŋ ebigide ke isɔŋ oro, enyuŋ ekabarede ediɔk, enyuŋ esɔi ŋkpɔ esin ke mbiet ŋkpɔ ekededi, enyuŋ enam idiɔk ido ke iso Jehovah Abasi fo, enyuŋ eyat enye esit:
26mfin emi mmowuk enyɔŋ ye isɔŋ nte edi ntiense ebaŋa mbufo, nte mbufo eyewara ndibiara ke isɔŋ emi mbufo ebede Jordan eka do ndida enye nnyene; mbufo idibigike ke esit anyan ini; edi eyebiara tak-tak.
27Ndien Jehovah eyesuan mbufo ke otu mme idut, ndien mbufo eyesuhɔ esisit ke otu mme idut emi Jehovah adade mbufo aka do.
28Ndien do ke mbufo edikpono mme abasi emi ubɔk owo anamde, eto ye itiat, emi mikwe usuŋ, minyuŋ ikopke uyo, minyuŋ idiaha ŋkpɔ, minyuŋ ikopke utebe.
29Ndien afo ama etie do oyom Jehovah Abasi fo, afo eyekut enye, edieke oyomde enye ke ofuri esit fo, ye ke ofuri ukpɔŋ fo.
30Ke adaŋemi afo etiede ke itie ukut, kpukpru ŋkpɔ emi enyuŋ etienede fi, ke ini iso, ndien afo ama afiak etiene Jehovah Abasi fo, onyuŋ okop uyo;
31koro Jehovah Abasi fo edide Abasi mbɔm; enye idikpɔŋke fi, idinyuŋ isoboke fi, idinyuŋ ifreke ediomi mme usɔ emi enye ɔkɔŋwɔŋɔde ɔnɔ mmɔ.
32Mbɔk, kam bup ini eset, emi ekebemde fi iso, tɔtɔŋɔ ke usen oro Abasi okobotde owo ke ererimbot, nyuŋ tɔŋɔ ke utit enyɔŋ kiet, tutu osim ke utit eken, mme oruk akamba ŋkpɔ emi ama osu, mme ekam esikokop ebaŋa oruk ŋkpɔ emi?
33Nte owo akananam okop uyo Abasi nte ɔdɔhɔde ke esit ikaŋ, kpa nte afo okokopde, ndien odu uwem?
34Mme Abasi akananam odomo ndika ŋkosio idut kiet ke idem esie ke ufɔt efen, ke ndomo, ye ke mme idiɔŋɔ, ye ke mme utibe ŋkpɔ, ye ke ekɔŋ, ye ke ɔkpɔsɔŋ ubɔk, ye ke edimenere ubɔk, ye ke ikpɔ ŋkpɔ ndik, nte kpukpru se Jehovah Abasi mbufo akanamde ye mbufo ke Egypt ke iso mbufo, edide?
35Ema ewut fi, man afo ɔfiɔk ete ke Jehovah edi Abasi; efen iduhe idian ye enye.
36Enye eketie ke heaven anam fi okop uyo esie, man ekpep fi: enye onyuŋ owut fi akwa ikaŋ esie ke isɔŋ: afo ama onyuŋ okop ikɔ esie emi otode ke ufɔt ikaŋ.
37Ndien oto koro enye akamade mme usɔ, mmɔde enye emekde nditɔ mmɔ emi etienede mmɔ ke edem, onyuŋ adade akwa odudu esie osio fi ke Egypt ke iso esiemɔ:
38ete ibin mme idut emi ekponide enyuŋ esɔŋɔde ekan fi, ke iso fo ifep, ete ida fi iduk, ndinɔ fi isɔŋ mmɔ ke udeme; nte edide mfin emi.
39Ɔfɔn fi ɔfiɔk, ndien, mfin emi, onyuŋ ekere ke esit fo, ete ke Jehovah edi Abasi ke ata enyɔŋ, ye ke isɔŋ ke idak; efen iduhe.
40Nim ndien mme ewuhɔ esie, ye mbet esie, emi ami mbetde fi mfin emi, ndien eyefɔn fi, ye nditɔ fo emi editienede fi, man afo onyuŋ ebigi uwem ke isɔŋ emi Jehovah Abasi fo ɔnɔde fi, ke nsinsi.
41Ekem Moses adianare obio ita ke edem Jordan oko emi utin asiahade;
42man owot-owo emi ediwotde mbɔhiduŋ esie ke mikoho koi, mikonyuŋ isuaha enye ke ini eke ekebede, efehe aka do; man enye efehe oduk ke obio emi kiet, onyuŋ odu uwem:
43Bezer ke wilderness, ke una-isɔŋ, eke mme Reubenite; ye Ramoth ke Gilead, eke mme Gadite; ye Golan ke Bashan, eke Manasseh.
44Mme mmɔ emi enyuŋ edi mbet emi Moses okonimde ke iso nditɔ Israel:
45mme mmɔ emi edi ikɔ ntiense, ye mme ewuhɔ, ye mme item, emi Moses eketiŋde ɔnɔ nditɔ Israel, ke mmɔ ema eketo ke Egypt ewɔrɔ;
46ke edem Jordan oko, ke itihere emi asakde iso ese Beth-peor, ke isɔŋ Sihon ɔbɔŋ mme Amorite, emi okoduŋde ke Heshbon, emi Moses ye nditɔ Israel esuande, ke mmɔ ema eketo ke Egypt ewɔŋɔ:
47mmɔ enyuŋ eda isɔŋ esie, ye isɔŋ Og ɔbɔŋ Bashan, mbɔŋ mme Amorite mbiba, emi ekedude ke edem Jordan oko, ke edem usiaha-utin;
48ɔtɔŋɔde ke Aroer emi odude ke mben itihere Arnon, tutu osim ke obot Sion (emi edide Hermon),
49ye ofuri itihere Jordan ke edem Jordan oko ke edem usiaha-utin, tutu osim ke Inyaŋ Itihere, ke usuhɔre Pisgah.
Who We AreWhat We EelieveWhat We Do
2025 by iamachristian.org,Inc All rights reserved.
