2 CHRONICLES 33 - Efik Old Bible With Sectional Headings

Ukara Manasseh

1MANASSEH osim isua duop-eba ke ini enye adade ubɔŋ; onyuŋ edi edidem ke Jerusalem ke isua aba ye efut:

2enye onyuŋ anam se idiɔkde ke iso Jehovah, ebiet mbubiam-ŋkpɔ mme idut oro Jehovah ekebinde efep ke iso nditɔ Israel.

3Ndien enye ɔtɔŋɔ ntak ɔbɔp mme edikoŋ ebiet oro Hezekiah ete esie okowuride, onyuŋ ɔdiɔŋ itie-uwa ɔnɔ Baalim, onyuŋ anam mbiet Asheroth, onyuŋ atuak ibuot ɔnɔ ofuri udim enyɔŋ, onyuŋ anam ŋkpɔ mmɔ.

4Enye onyuŋ anam itie-uwa ke ufɔk Jehovah, emi Jehovah ɔkɔdɔhɔde ete, Ke Jerusalem ke enyiŋ mi edidu ke nsinsi.

5Enye onyuŋ anam itie-uwa ɔnɔ ofuri udim-enyɔŋ ke okure ufɔk Jehovah mbiba.

6Ndien enye onyuŋ anam nditɔ esie ebe eduk ke ikaŋ ke itihere eyen Hinnom, onyuŋ ebre idiɔŋ enyɔŋ, ye idiɔŋ urukikɔt, onyuŋ onim mme ebre-idiɔŋ ekpo owo, ye mme ɔfiɔk ŋkpɔ owo. Enye awak ndinam idiɔk ke iso Jehovah, onyuŋ ayat enye esit.

7Enye onyuŋ ada edisɔi mbiet ŋkpɔ oro enye akanamde, eneŋere onim ke ufɔk Abasi oro Abasi ɔkɔdɔhɔde David ye Solomon eyen esie, ete, Ke ufɔk emi ye ke Jerusalem emi mmekde ke otu kpukpru esien Israel, ke ndisin enyiŋ mi ke nsinsi:

8ndien ndisioho aba ukot Israel mfep ke isɔŋ emi ŋkonimde nnɔ mme ete mbufo: ke mmɔ ema etim enam kpukpru se ŋkowukde mmɔ ekem ye ofuri ibet, ye item, ye ikpe ke ubɔk Moses.

9Ntre ke Manasseh akanam Judah ye mme andiduŋ Jerusalem edue, enyuŋ enam idiɔk ekan mme idut oro Jehovah okosobode ke iso nditɔ Israel efep.

10Ndien Jehovah ɔdɔhɔ ikɔ ye Manasseh ye ikɔt esie, edi mmɔ ikpaŋke utɔŋ.

11Ekem Jehovah ada mme etubom udim-ekɔŋ edidem Assyria edi etiene mmɔ, ndien mmɔ emum Manasseh ke uwem, enyuŋ ekɔbi enye ufat-ubɔk ndien eda enye enyɔŋ ke Babylon.

12Ndien ke nnanenyin esie, enye ekpe Jehovah Abasi esie ubɔk, onyuŋ osuk idem esie eti-eti ke iso Jehovah Abasi mme ete esie,

13onyuŋ ɔbɔŋ akam ɔnɔ enye: ndien enye okop uyo esie, onyuŋ ekpaŋ utɔŋ ke eseme esie, ndien ada enye afiak ke Jerusalem ke itie ubɔŋ esie. Ndien Manasseh ɔfiɔk ete ke edi Jehovah edi Abasi.

14Ndien ke ŋkpɔ emi ema ekebe, enye ɔbɔp ibibene ke edem obio David, ke edem usop-utin Gihon, ke ebedeŋ, tutu osim ke inua-otop iyak, onyuŋ akan Ophel okuk, onyuŋ anam enye okoŋ eti-eti. Ndien enye onim mme etubom ekɔŋ ke kpukpru obio ibibene ke Judah.

15Ndien enye osioŋo isen abasi ye mbiet-ŋkpɔ efep ke ufɔk Jehovah, ye kpukpru mme-itie-uwa oro enye akanamde ke obot ufɔk Jehovah, ye ke Jerusalem, ndien ada mmɔ ɔduɔk ke edem obio.

16Enye onyuŋ ɔdiɔŋ itie-uwa Jehovah, onyuŋ awa uwa emem ye ekɔm ke esit, onyuŋ owuk Judah, ete enam ŋkpɔ Jehovah Abasi Israel.

17Edi mbio-obio esuk ewa uwa ke mme edikoŋ ebiet, edi ewa enɔ Jehovah Abasi mmɔ ikpɔŋ-ikpɔŋ.

18Ndien ama edi ikɔ Manasseh eŋwen, ye mkpe-ubɔk esie emi enye ekpede Abasi esie ubɔk, ye ikɔ mbon-ŋkukut emi ekedɔhɔde ye enye ke enyiŋ Jehovah Abasi Israel, sese, mmɔdo ke otu ikɔ ndidem Israel.

19Ama edi mkpeubɔk esie ŋko, ye nte Jehovah okopde uyo esie, ye kpukpru mme idiɔk ido esie, ye eridue esie, ye ɔtɔ oro enye ɔkɔbɔpde edikoŋ ebiet ke esit, onyuŋ owukde eto-mkpe, ye edisɔi mbiet, ke ini enye mika-isukke idem; sese, ewet mmɔ esin ke ikɔ mbon-ŋkukut.

20Ekem Manasseh ɔsuhɔre ana ye mme ete esie ede, ndien mmɔ ebuk enye ke ufɔk esiemɔ: ndien Amon eyen esie ada ubɔŋ ke itie esie.

21Amon edi isua edip ye iba ke ini enye adade ubɔŋ, ndien enye edi edidem ke Jerusalem ke isua iba.

22Enye onyuŋ anam idiɔk ke iso Jehovah, kpa nte Manasseh ete esie akanamde: Amon onyuŋ awa uwa ɔnɔ kpukpru edisɔi mbiet oro Manasseh ete esie akanamde: onyuŋ anam ido mmɔ;

23enye inyuŋ isukke idem esie ke iso Jehovah, nte emi Manasseh ete esie okosukde idem: edi Amon ɔdɔdiɔŋ anam idiɔk aka iso.

24Ekem ikɔt esie eduk odu ebaŋa enye, ndien ewot enye ke ufɔk esiemɔ.

25Edi mbio-obio ewot kpukpru mmɔ eke ekedukde odu ebaŋa edidem Amon; mbio-obio enyuŋ eda Josiah eyen esie enim ke edidem ke itie esie.