ISAIAH 36 - Efik Old Bible With Sectional Headings

Sennacherib Edidem Assyria Aŋwana Ekɔŋ ye Mme Obio Judah

1EDIKEM ke ɔyɔhɔ isua edidem Hezekiah duopenaŋ Sennacherib edidem Assyria ɔdɔk ediŋwana ekɔŋ ye kpukpru mme obio Judah eke enyenede ibibene, onyuŋ ada mmɔ.

2Ndien edidem Assyria etie ke Lachish ɔdɔŋ Rabshakeh utom ke Jerusalem ke ɔtɔ edidem Hezekiah, asaŋa ye akamba udim ekɔŋ. Ndien enye edida ke edem udiɔŋ mmɔŋ enyɔŋ-enyɔŋ mkpɔdiɔhɔ-mmɔŋ ke usuŋ iŋwaŋ ɔdiɔŋ-ɔfɔŋ.

3Ndien Eliakim eyen Hilkiah emi akarade ufɔk, ye Shebna ewet ŋwed, ye Joah eyen Asaph, ewet ŋkpɔ obio, ewɔŋɔ etiene enye.

4Ndien Rabshakeh eneme ye mmɔ, ete, Mbufo edɔhɔ ndien Hezekiah, ete, Ntem ke akwa edidem, kpa edidem Assyria ɔdɔhɔ ete, Nsidi iberedem emi afo ɔbuɔtde idem fo ke esit ntem?

5Mmɔdɔhɔ nte, Item ye odudu ekɔŋ (fo) edi ikɔ mkpɔk-inua ikpɔŋ-ikpɔŋ. Anie ndien ke afo eberi edem fo ke esit eke esinde fi ɔsɔŋ ibuot ye ami?

6Sese, afo ke eberi edem ke mbuŋɔ esaŋ nnyanyaŋa-isantim emi, kpa Egypt; emi owo ama ebere ke esit, eyeduk enye ke ubɔk, onyuŋ okim enye: ntem ke Pharaoh edidem Egypt etie ye kpukpru mmɔ eke eberede idem ye enye.

7Edi edieke afo ɔdɔhɔde mi, ete, Ke edi Jehovah Abasi nnyin ke nnyin ibere idem ke esit: nte idige Enye ke Hezekiah okosio edikoŋ ebiet esie, ye mme itie-uwa esie efep, onyuŋ ɔdɔhɔ Judah ye Jerusalem, ete,

8Mbufo etuak ibuot ke iso itie-uwa emi? Kam mia ata ndien, mbɔk, ye ete mi, edidem Assyria, ndien nyenɔ fi tɔsin horse iba, edieke afo ekemede ke idem fo ndinɔ owo eke edidorode mmɔ.

9Afo edinam didie, ndien, ekeme ndisin etubom kiet ke otu ŋkpri ikɔt ete mi akabare iso? Afo ebere idem fo ndien ye Egypt ke ikɔ chariot ye horse!

10Ndien ŋko, nte ami ŋkpɔŋ Jehovah ndɔk ndi ekɔŋ ye isɔŋ emi, man nsobo enye? Jehovah ɔkɔdɔhɔ mi, ete, Dɔk di isɔŋ emi, nyuŋ sobo enye.

11Ndien Eliakim, ye Shebna, ye Joah edɔhɔ Rabshakeh, ete, Mbɔk, sem usem Syria nɔ nnyin ikɔt fo: koro nnyin ikopde enye: ndien kudɔhɔ ye nnyin ke usem mme Jew usin ke utɔŋ mme mmɔ emi edude ke enyɔŋ ibibene.

12Ndien Rabshakeh ɔdɔhɔ, ete, Nte edi ɔtɔ ɔbɔŋ fo ye ɔtɔ fo ke ɔbɔŋ mi ɔkɔdɔŋ mi nditiŋ ikɔ emi? Nte idige ye mmɔ emi etiede ke enyɔŋ ibibene, emi edidiade ifuɔ mmɔ, edinyuŋ eŋwɔŋde ikim mmɔ ye mbufo?

13Ndien Rashakeh ada ofiori ke akamba uyo ke usem mme Jew, onyuŋ ɔdɔhɔ, ete, Mbufo ekop uyo akwa edidem, edidem Assyria,

14Ntem ke edidem ɔdɔhɔ ete, Mbufo ekuyak Hezekiah abiaŋa mbufo: koro enye midikemeke ndiyaŋa mbufo.

15Ekunyuŋ eyak Hezekiah esin mbufo ebere edem ye Jehovah, ete, jehovah iditreke ndinyaŋa nnyin: ke ididaha obio emi isin ke ubɔk edidem Assyria.

16Mbufo ekukop uyo Hezekiah: koro ntem ke edidem Assyria ɔdɔhɔ, ete, Mbufo enam emem ye ami, enyuŋ ewɔŋɔ etiene mi: mbufo kpukpru enyuŋ edia vine mbufo, ye eto fig mbufo, enyuŋ eŋwɔŋ mmɔŋ ke obube mbufo:

17tutu ami ndi ndida mbufo ŋka isɔŋ eke ebietde isɔŋ mbufo, isɔŋ ibokpot ye wine, isɔŋ udia ye eke iŋwaŋ vine.

18Ekuyak Hezekiah abiaŋa mbufo, ete, Jehovah eyenyaŋa nnyin. Nte mme abasi mme idut kiet kiet ema enyaŋa isɔŋ mmɔ esio ke ubɔk edidem Assyria?

19Enye mme abasi Hamath ye eke Arpad? Enye mme abasi Sepharvaim? Ndien ini ewe ke mmɔ ekesio Samaria ke ubɔk mi?

20Mme anie ke otu kpukpru mme abasi mme idut emi edu eke ekesiode isɔŋ mmɔ ke ubɔk mi, eke Jehovah okposiode Jerusalem ke ubɔk mi?

21Ndien mmɔ edop uyo, inyuŋ ibɔrɔke enye baba ikɔ kiet: koro edidem okowukde ewuhɔ, ete, Mbufo ekubɔrɔ enye.

22Ndien Eliakim eyen Hilkiah emi akarade ufɔk, ye Shebna ewet-ŋwed, ye Joah, eyen Asaph, andiwet ŋkpɔ obio, ewai edisine-ŋkpɔ mmɔ eduk ke ɔtɔ Hezekiah, enyuŋ emen ikɔ Rabshakeh etiŋ enɔ enye.