ISAIAH 51 - Efik Old Bible With Sectional Headings

Abasi Ɔnɔ Ikɔ Ndɔŋ-esit Ɔsɔk Ikɔt Esie

1MBUFO eke ebinede eti ido eyom Jehovah, ekop uyo mi: ese akwa itiat eke ekesɔide mbufo, ye inua obube eke eketibide mbufo esio.

2Mbufo ese Abraham ete mbufo, ye Sarah emi akamande mbufo: koro enye edide kierakiet ke ini ŋkotde enye, nnyuŋ ndiɔŋ enye, nnyuŋ nnam enye awak.

3Koro Jehovah ɔmɔdɔŋ Zion esit: ɔmɔdɔŋ kpukpru mme ŋwure esie esit; omonyuŋ anam wilderness esie ebiet Eden, anam desert esie ebiet iŋwaŋ Jehovah; eyekut mbre ye idara ke esit, ekɔm, ye uyo ikwɔ.

4Ikɔt mi, mbufo ekpaŋ utɔŋ enɔ mi; mbio-obio mi, mbufo enyuŋ ekop uyo mi: koro ewuhɔ eyeto mi ɔwɔrɔ, nyenyuŋ ŋwuk ikpe mi nnim ke uŋwana mme idut.

5Edinen ido mi emekpere; erinyaŋa mi ɔmɔwɔrɔ, ubɔk mi eyenyuŋ ekpe ikpe mme idut; mme isuo eyebet mi, enyuŋ edori enyin ke ubɔk mi.

6Mbufo emenere enyin mbufo ke enyɔŋ, enyuŋ ese isɔŋ ke idak; koro enyɔŋ eyesuana nte nsuŋikaŋ, isɔŋ eyenyuŋ ataha nte ɔfɔŋidem, ndien mme andiduŋ enye eyekpaŋa ŋko kpasuk ntre: edi erinyaŋa mi eyebigi ke nsinsi, eti ido mi idinyuŋ inuahake.

7Ekop uyo mi, mbufo emi efiɔkde eti ido, mbio emi mbet mi odude mmɔ ke esit; mbufo ekufehe esuene owo, nsia okonyuŋ oyomo mbufo abaŋa isuŋi mmɔ.

8Koro ŋkpri unam eyeta mmɔ nte ɔfɔŋidem, ndɔŋ eyenyuŋ eta mmɔ nte idet erɔŋ: edi edinen ido mi eyedu ke nsinsi, erinyaŋa mi eyenyuŋ odu ke ofuri emana.

9Demere, demere, sine odudu, O ubɔk Jehovah; demere, kpa nte ke eyo oko, ke emana eset. Nte idige afo edi enye emi okokpokde Rahab mbio-mbio, okonyuŋ owotde dragon?

10Nte idige afo edi enye emi akanamde akamba mmɔŋ, kpa mmɔŋ akwa inyaŋ asat? emi ekesinde udem akwa mmɔŋ edi usuŋ, eke mmɔ eke ekefakde mmɔ ekpesaŋade ebe?

11Ndien mmɔ eke Jehovah afakde eyefiak edi ke Zion ye mkpo; nsinsi idaresit eyedu mmɔ ke ibuot: mbre ye idaresit eyesim mmɔ; mfuhɔ ye eseme eyefeŋe.

12Ami, ami, ndi enye emi ndɔŋde mbufo esit: afo edi anie eke ekpefehede owo emi edikpade, efehe eyen owo emi edinimde enye nte mbiet;

13onyuŋ efre Jehovah emi akanamde fi, emi ekeneŋerede enyɔŋ, onyuŋ onimde isɔŋ ke itie esie; ndien osuk edikhe kpukpru ini ke ofuri usen abaŋa iyaresit owo utuk, ke ini enye otimde ŋkpɔ, ete ibiat?

14Ndien iyaresit owo utuk oro odu mmɔŋ? Owo eke ɔnuhɔde awara ndikpɔhɔre, enye idikpaha ke obube, idinyuŋ inanake udia esie.

15Ndien ami ndi Jehovah Abasi fo emi edemerede inyaŋ, ndien enye adaha okpot: Jehovah mme udim edi enyiŋ esie.

16Ŋkonyuŋ nsin fi ikɔ mi ke inua, nnyuŋ mfuk fi ke mfut ubɔk mi, man afo eneŋere ikpa-enyɔŋ, onyuŋ owuk isɔŋ ke itie esie, onyuŋ ɔdɔhɔ Zion, ete, Afo edi ikɔt mi.

17Demere, demere, daha ke enyɔŋ, Jerusalem, emi ɔkɔbɔde Jehovah cup iyaresit esie ke ubɔk ɔŋwɔŋ; afo ɔkɔŋwɔŋ bowl, kpa cup ufum, ɔkɔrɔde.

18Baba owo kiet ke otu kpukpru nditɔ emi enye akamande idaha enye usuŋ; baba owo kiet ke otu kpukpru nditɔ emi enye ɔkɔbɔkde imumke enye ubɔk ikama.

19Ŋkpɔ iba oro emesim fi: anie editua fi mbɔm? nditaha ye nsobo, ye akaŋ ye ofut: nnam didie ndɔŋ fi esit?

20Idem akpa nditɔ fo: mmɔ ena ke ibuot kpukpru mme efak, ebiet enaŋ ikɔt ke iyire: eyuhɔ ifuresit Jehovah, nduari Abasi fo.

21Kop emi, ndien, afo owo ukut, emi ɔyuhɔde, edi idige wine: emi edi uyo Ɔbɔŋ Jehovah,

22ye eke Abasi fo, enye eyekpe ikɔ ikɔt esie, ete, Sese, mmosio fi cup ufum ke ubɔk, nsio bowl kpa cup ifuresit mi; afo udumanake uŋwɔŋ aba enye:

23edi nda enye nsin ke ubɔk mmɔ emi etuhɔde fi: emi ekedɔhɔde ukpɔŋ fo, ete, Nuhɔ, man nnyin isaŋa ibe: ndien afo ama onim edem fo nte isɔŋ, ye nte efak ɔnɔ mmɔ eke esaŋade ebe.