JEREMIAH 37 - Efik Old Bible With Sectional Headings

Ekɔbi Jeremiah ke Ŋkpɔkɔbi

1EKEM edidem Zedekiah eyen Josiah ada ubɔŋ ke ibuot Coniah eyen Jehoiakim, emi Nebuchadrezzar edidem Babylon okonimde ke edidem ke isɔŋ Judah.

2Edi enye ye ikɔt esie ye mbiobio ikopke uyo Jehovah oro enye ɔkɔdɔhɔde ke inua Jeremiah prophet.

3Ndien edidem Zedekiah ɔdɔŋ Jehucal eyen Shelemiah, ye Zephaniah eyen Maaseiah oku, utom ke ɔtɔ Jeremiah prophet, ete, Mbɔk, kpe Jehovah Abasi nnyin ubɔk nɔ nnyin.

4Ndien Jeremiah oduk onyuŋ ɔwɔrɔ ke otu mbio-obio; ndien mmɔ ika-isinke enye ke ufɔk ukwak.

5Ndien mbon-ekɔŋ Pharaoh eto ke Egypt edi; ndien ke ini mme Chaldean emi ekande Jerusalem ekuk ekopde etop mmɔ, mmɔ ekpɔŋ Jerusalem edɔk.

6Ndien uyo Jehovah osim Jeremiah prophet, ete,

7Ntem ke Jehovah Abasi Israel ɔdɔhɔ, ete, Mbufo edɔhɔ ntem ye edidem Judah emi ɔdɔŋde mbufo utom ke ɔtɔ mi ndibup mi ŋkpɔ, ete, Sese, mbon-ekɔŋ Pharaoh emi eketode edi ndiŋwam mbufo, eyenyɔŋ ke Egypt isɔŋ mmɔ.

8Ndien mme Chaldean eyefiak edi ediŋwana ekɔŋ ye obio emi, enyuŋ eda enye, enyuŋ efɔp enye ke ikaŋ.

9Ntem ke Jehovah ɔdɔhɔ, ete, Mbufo ekubiaŋa idem mbufo, ete ke mme Chaldean iditreke ndidaŋa ŋkpɔŋ nnyin: koro mmɔ mididaŋake.

10Koro mbufo ekpewot ofuri udim-ekɔŋ mme Chaldean emi eŋwanade ekɔŋ ye mbufo, ndien mmɔ ekpesuk mbio unan mbio unan, kpukpru mmɔ ekpedaha ke enyɔŋ ke tent mmɔ, enyuŋ efɔp obio emi ke ikaŋ.

11Edikem ke ini mbon-ekɔŋ mme Chaldean ekekpɔŋde Jerusalem edɔk, mbak mbon-ekɔŋ Pharaoh:

12ndien Jeremiah oto ke Jerusalem ɔwɔrɔ, ete ika isɔŋ Benjamin, man ada udeme esie do ke otu mbio-obio.

13Ndien ke ini enye odude ke inua otop Benjamin, etubom mbon ukpeme odu do, ekere Irijah eyen Shelemiah, eyen Hananiah: ndien enye omum Jeremiah prophet, ete, Afo ke oyom ndidiana ye mme Chaldean.

14Ndien Jeremiah ɔdɔhɔ, ete, Nsu: ami nyomke ndidiana ye mme Chaldean. Edi enye ikopke uyo esie; Irijah omum Jeremiah, onyuŋ ada enye ɔsɔk mbɔŋ obio.

15Ndien mbɔŋ oro ekpahesit ye Jeremiah, enyuŋ emia enye, enyuŋ eda enye esin ke ŋkpɔkɔbi ufɔk Jonathan ewet ŋwed: koro mmɔ ekenimde enye ke ufɔk ukwak.

16Ke adaŋemi Jeremiah okodukde ke ufɔk obube ye ke ubet, Jeremiah okonyuŋ etiede do ediwak usen;

17ndien edidem Zedekiah ɔdɔŋ ekeda enye edi: edidem onyuŋ obime enye ke ufɔk esie ndibe-ndibe, onyuŋ ɔdɔhɔ ete, Nte ikɔ eke otode Jehovah mmɔdo? Ndien Jeremiah ete, Mmɔdo: onyuŋ ɔdɔhɔ ete, Eyeda fi esin edidem Babylon ke ubɔk.

18Jeremiah onyuŋ ɔdɔhɔ Zedekiah edidem, ete, Ŋkedue fi ye ikɔt fo ye mbio-obio emi nso ŋkpɔ, eke mbufo esinde mi ke ufɔk ukwak?

19Ndien mme prophet mbufo oro eketiŋde prophecy enɔ mbufo, ete, “Edidem Babylon ididige ekɔŋ ye mbufo ke isɔŋ emi”, edu mmɔŋ?

20Kop ndien, ɔbɔŋ mi edidem, yak mkpe-ubɔk mi ɔsuhɔre ana fi ke iso, kunyuŋ uyak mi mfiak ke ufɔk Jonathan ewet ŋwed, man ŋkukpa mkpa.

21Ndien Zedekiah edidem eteme, ete enim Jeremiah ke okure ufɔk ukwak, enyuŋ eda obukpa uyo kiet ke efak mme asaŋ uyo enɔ enye kpukpru usen, tutu ofuri uyo okure ke obio. Ntre ke Jeremiah etie ke okure ufɔk ukwak.