JAMES 1 - Efik Old Bible With Sectional Headings

Mbuɔridem ye Eti-ibuot

1JAMES, emi edide owo Abasi ye Ɔbɔŋ Jesus Christ, ewet ɔnɔ esɔk esien duopeba emi esuanade, ete ikɔm mmɔ.

2Enim ete edi ŋkpɔ ɔyɔhɔ idaresit, nditɔ-ete mi, ke ini nsio-nsio idomo esimde mbufo;

3ke efiɔkde ete mbuɔtidem mbufo emi ema edomo ewut anam ime ɔwɔrɔ.

4Edi yak ime anam utom esie ama, man mbufo efɔn ema enyuŋ esɔŋ ke ukpɔŋ, ekunana baba ŋkpɔ kiet.

5Edi edieke owo mbufo ekededi ananade eti ibuot, yak enye ebeŋe Abasi, emi ɔnɔde kpukpru owo ke ntarubɔk, minyuŋ itɔhɔke owo; ndien Abasi eyenɔ enye.

6Edi yak enye ebeŋe ke mbuɔtidem, okuyok; koro owo eke oyokde ebiet mbufut mmɔŋ, eke ofim eberide, emen, otop, ɔduɔk ko.

7Owo oro okuse ete, imɔ iyebɔ baba ŋkpɔ kiet ke ubɔk Ɔbɔŋ;

8enye edi owo esit iba, eke minyeneke nsɔŋɔ-nda ke kpukpru usuŋ esie.

9Yak eyen-ete eke odude ke usuhɔre-itie obure mbure ke akamba itie esie; yak owo inyene onyuŋ obure ke itie erisuhɔre esie;

10koro nte ndiye ikɔŋ-ikɔt ke owo inyene eyebe efep.

11Koro utin asiahade asaŋa ye ufiop-ufiop ofim ɔfɔp mbiet; ndien ndiye ikɔŋ esie ekibe eduɔŋɔ, uyai mmɔ onyuŋ abiara: ntre ke owo inyene edinyuŋ eyemere ke mbubine esie.

12Ɔfɔn ye owo eke ɔsɔŋɔde ada ke idomo, koro ke ema ekedomo enye efiɔk ete ɔfɔn, eyenɔ enye anyanya uwem, emi Ɔbɔŋ ɔkɔ-ŋwɔŋɔde ndinɔ mmɔ emi emade Enye.

13Ke ini idomo iduɔ osimde owo, enye okudɔhɔ ete, ke edi Abasi odomo imɔ: koro idomo iduɔ ikemeke ndisim Abasi, Enye ke Idem Esie inyuŋ idomoke owo man enye ɔduɔ.

14Edi idomo iduɔ osim kpukpru owo ke adaŋemi idiɔk udɔŋ atapde enye odudi.

15Ekem idiɔk udɔŋ ama oyomo, aman idiɔk-ŋkpɔ; idiɔk-ŋkpɔ ama ɔkɔkɔri, osioŋo mkpa.

16Ekuyak ebiaŋa mbufo, ndima nditɔ-ete mi.

17Kpukpru eti erinɔ ye kpukpru enɔ eke efɔnde ema eto ke enyɔŋ, eto ke ubɔk Ete mme uŋwana esuhɔre edi; emi mikemeke ndikpuhɔre, ukpuhɔre itie minyuŋ ikemeke ndimen Enye nsin ke mfut.

18Oto ke uduak Esie ke Enye akada ikɔ akpanikɔ aman nnyin, man nnyin ikpetie nte akpa mbuŋwum ke otu mmɔ emi Enye okobotde.

19Mbufo efiɔk emi, ndima nditɔ-ete mi. Edi yak kpukpru owo esɔp ndikop ikɔ, ekusɔp nditiŋ ikɔ, ekusɔp ndiyat esit;

20koro iyaresit owo miwɔrɔke edinen ido Abasi.

21Mmɔdo eduɔŋɔ kpukpru ndek-ndek ido ye nyɔhɔ-nsuhɔ udu, enyuŋ ebɔ ikɔ emi etɔde ke esit mbufo ke ododop, kpa ikɔ emi ekemede ndinyaŋa ukpɔŋ mbufo.

22Yak mbufo edi mme anam-ikɔ, ekudi mme andikokop ikpɔŋ-ikpɔŋ, ebiaŋa idem.

23Koro owo ekededi eke okopde ikɔ, edi minamke-nam ebiet owo eke esede obot iso esie ke ukut-iso:

24koro enye esede idem esie, adaha onyuŋ efre oruk owo eke enye edide kpa idaha oro.

25Edi owo eke owukde enyin ese ata edifɔn ibet Abasi emi anamde owo ɔwɔrɔ ufin, onyuŋ ɔsɔŋɔde ada ke esit, idige andikokop emi efrede, edi edi andinanam; owo emi eyekut eridiɔŋ ke erinam esie.

26Edieke owo abatde idem ke owo Abasi, minyuŋ imumke edeme esie ikama, edi abiaŋade esit esie, erinim eke enye onimde ido Abasi ɔwɔrɔ ikpikpu.

27Ido Abasi eke asanade, minyuŋ ideheke ke iso Abasi Ete nnyin edi, ndisaŋa nse nditɔ-akpa ye mme ebe-akpa ke ukut mmɔ, ndinyuŋ ŋkpeme idem ke idiɔk-ŋkpɔ emi odude ke ererimbot.