1 NDIDEM 12 - Efik Old Bible With Sectional Headings

Mme Obio Edere ke Israel Edianare Eda

1EKEM Rehoboam aka ke Shechem: koro ofuri Israel ekade Shechem ndinim enye ke edidem.

2Edikem adaŋemi Jeroboam eyen Nebat okopde, (ndien enye odu kaŋa ke Egypt, emi enye ekefehede iso Solomon edidem aka do, Jeroboam onyuŋ oduŋ ke Egypt;) ndien mmɔ edɔŋ ekekot enye edi.

3Ndien Jeroboam ye ofuri otu Israel edi edidɔhɔ Rehoboam, ete,

4Usɔ akanam ɔkpɔnɔ odobi nnyin: afo kam sio, ndien, ke ɔkpɔsɔŋ utom usɔ, ye ke edidobi ɔkpɔnɔ esie oro enye okodoride nnyin, ndien nnyin iyedi ikɔt fo.

5Ndien enye ɔdɔhɔ mmɔ, ete, Mbufo enyɔŋɔ kaŋa usen ita, ndien efiak etiene mi. Ndien mmɔ enyɔŋɔ.

6Ndien edidem Rehoboam osop ibuot ye mbiowo oro ekedade ke iso Solomon ete esie, adaŋemi enye okodude uwem, onyuŋ ɔdɔhɔ ete, Nso item ke mbufo enɔ kpaŋ ŋkpɔbɔrɔ mbon emi?

7Ndien mmɔ edɔhɔ enye, ete, Edieke afo onyimede ndidi owo mbon emi mfin, nnyuŋ nnam ŋkpɔ nnɔ mmɔ, nnyuŋ mbɔrɔ mmɔ, nnyuŋ ndɔhɔ mmɔ nti ikɔ, mmɔ eyedi ikɔt fo ŋko ke nsinsi.

8Edi enye ɔkpɔŋ item oro mbiowo eketemede enye, onyuŋ aka okosop ibuot ye mkparawa oro ekekɔride ye enye, emi edade enye ke iso:

9ndien enye obup mmɔ, ete, Mbufo eteme didie, ete nnyin ibɔrɔ mbon emi edɔhɔde mi, ete, Nam ɔkpɔnɔ emi usɔ okodoride nnyin efere?

10Ndien mkparawa oro ekekɔride ye enye, edɔhɔ enye, ete, Ntem ke afo edibɔrɔ mbon emi edɔhɔde fi, ete, Usɔ akanam ɔkpɔnɔ odobi nnyin, edi afo nam efere nnyin; dɔhɔ mmɔ ntem, ete, Ekpri nnuenubɔk mi eyekpon akan isin ete mi.

11Ndien ŋko ete mi okodori mbufo edidobi ɔkpɔnɔ, edi ami nyekɔrɔ mbufo ɔkpɔnɔ efen: ete mi akamia mbufo ke ikpa, edi ami nyemia mbufo ke scorpion.

12Ekem Jeroboam ye kpukpru mbio oro eka ke ɔtɔ Rehoboam ke ɔyɔhɔ usen ita, kpa nte edidem akasiakde, ete, Mbufo efiak etiene mi ke ɔyɔhɔ usen ita.

13Ndien edidem ɔbɔrɔ mbon oro ɔkpɔsɔŋ ikɔ, onyuŋ ɔkpɔŋ item mbiowo oro eketemede enye;

14enye onyuŋ ɔbɔrɔ mmɔ ke item mkparawa, ete, Ete mi akanam ɔkpɔnɔ odobi mbufo, edi ami nyekɔrɔ mbufo ɔkpɔnɔ efen: ete mi akamia mbufo ke ikpa, edi ami nyemia mbufo ke scorpion.

15Ntre ke edidem ikopke inɔ mbon oro: koro Jehovah akanamde ɔwɔrɔ ntem, man enye anam uyo esie, emi Jehovah akadade inua Ahijah a Shiloh ɔdɔhɔ, osu ɔnɔ Jeroboam eyen Nebat.

16Ekem adaŋemi ofuri Israel ekutde ete ke edidem ikopke uyo mmimɔ, mmɔ ebɔrɔ edidem, ete, Nnyin inyene nso ubak ke David? Nnyin inyuŋ inyeneke udeme eyen Jesse: mbufo, O Israel, enyɔŋɔ ke mme tent mbufo: kam se ufɔk fo, O David.

17Ndien Israel enyɔŋɔ ke mme tent mmɔ. Edi ama edi nditɔ Israel emi eduŋde ke mme obio Judah. Rehoboam edi edidem mmɔ.

18Edikem Rehoboam ɔdɔŋ Adoram, emi edide etubom mbon-utom (etiene mmɔ); ndien ofuri Israel etɔŋɔ enye ke itiat ewot. Ndien edidem Rehoboam awara ɔdɔk ke chariot esie, onyuŋ efehe aka ke Jerusalem.

19Ntem ke Israel esɔŋ ibuot ye ufɔk David tutu osim mfin emi.

20Edikem adaŋemi ofuri Israel ekopde ete ke Jeroboam ama afiak, mmɔ edɔŋ ekekot enye edi ke esop, ndien enim enye ke edidem ofuri Israel: baba owo kiet itieneke ufɔk David, ke mibɔhɔke esien Judah ikpɔŋ-ikpɔŋ.

21Ekem adaŋemi Rehoboam osimde Jerusalem, enye obon ofuri ufɔk Judah, ye esien Benjamin, tɔsin edimek mbon-ekɔŋ ke itie ikie ye anaŋ, man eŋwana ekɔŋ ye ufɔk Israel, man eda ubɔŋ ediyak enɔ Rehoboam eyen Solomon.

22Edi uyo Abasi osim Shemaiah owo Abasi kiet,

23ete, Dɔhɔ Rehoboam, eyen Solomon, edidem Judah, ye ofuri ufɔk Judah, ye eke Benjamin, ye mmɔ emi esuhɔde,

24ete Ntem ke Jehovah ɔdɔhɔ, ete, Mbufo ekudɔk, ekunyuŋ eŋwana ekɔŋ ye nditɔ-ete mbufo, nditɔ Israel: yak kpukpru owo efiak ke ufɔk mmɔ; koro ŋkpɔ emi otode mi. Ndien mmɔ ekop uyo Jehovah, enyuŋ efiak, etre ndika, ke uyo Jehovah.

25Ekem Jeroboam ɔdiɔŋ Shechem ke obot Ephraim, onyuŋ oduŋ ke esit; ndien enye ɔwɔrɔ do aka ɔkɔbɔp Penuel.

26Ekem Jeroboam ɔdɔhɔ ke esit esiemɔ, ete, Ke emi ke ubɔŋ edifiak ufɔk David ke ubɔk:

27edieke mbon emi edidɔkde eka ekewa uwa ke ufɔk Jehovah ke Jerusalem, esit mbon emi eyefiak etiene ɔbɔŋ mmɔ, kpa Rehoboam edidem Judah, ndien mmɔ eyewot mi, enyuŋ efiak etiene Rehoboam edidem Judah.

28Ndien edidem ekere, onyuŋ ada gold anam nditɔ enaŋ iba, onyuŋ ɔdɔhɔ mmɔ ete, Akan mbufo ndidɔk ke Jerusalem: O Israel, se mme abasi emi ekedade mbufo ke isɔŋ Egypt edɔk edi.

29Ndien enye ada kiet onim ke Bethel, onyuŋ onim kiet eken ke Dan.

30Ndien ŋkpɔ emi ɔwɔrɔ idiɔk ŋkpɔ: mbio-obio enyuŋ eka ke iso kiet tutu esim ke Dan.

31Enye onyuŋ ɔbɔp ufɔk ke edikoŋ ebiet, onyuŋ osio owo eke midige nditɔ Levi ke ofuri obio, onim ke oku.

32Ekem Jeroboam onim usɔrɔ ke ɔyɔhɔ ɔfiɔŋ itiaita, ke ɔyɔhɔ usen ɔfiɔŋ efut, ebiet usɔrɔ emi odude ke Judah, onyuŋ awa uwa ke itie uwa. Ntem ke enye akanam ke Bethel, ke awa uwa ɔnɔ nditɔ-enaŋ oro enye akanamde: onim ke Bethel.

33Ntre ke enye awa uwa ke itie-uwa oro enye akanamde ke Bethel ke ɔyɔhɔ usen efut, ke ɔyɔhɔ ɔfiɔŋ itiaita, ke ɔfiɔŋ oro enye akaduakde ke idem esie; enye onyuŋ anam usɔrɔ ɔnɔ nditɔ Israel; onyuŋ awa uwa ke itie-uwa, onyuŋ ɔfɔp incense.