JEREMIAH 31 - Efik Old Bible With Sectional Headings

Israel Eŋyɔŋɔ Edi ke Isɔŋ Ntaŋ Mfep

1JEHOVAH ɔdɔhɔ, ete, Ke ini oro nyedi Abasi kpukpru ufɔk Israel, ndien mmɔ eyedi ikɔt mi.

2Ntem ke Jehovah ɔdɔhɔ, ete, Mmɔ oro ekebɔhɔde ofut ekut mfɔn ke wilderness; ami ŋkasaŋa nte nnɔ Israel nduɔk-odudu.

3Ke eyo oko Jehovah okowut mi idem, ete, Mmama fi nsinsi ima: mmɔdo mfɔnde ido ye afo mbigi.

4Nyetɔŋɔ ntak ndiɔŋ fi, ndien eyediɔŋ fi, O adiaha Israel: afo eyetɔŋɔ ntak ada ekɔmɔ fo abana idem, onyuŋ ɔwɔrɔ oduk ke unek mmɔ eke ebrede mbre.

5Afo eyetɔŋɔ ntak ɔtɔ iŋwaŋ-vine ke ikpɔ obot Samaria: mme anditɔ eyetɔ, enyuŋ edia mfri:

6koro usen eyedi eke mbon-ukpeme ke ikpɔ obot Ephraim edikotde, ete, Mbufo edaha ke enyɔŋ, nnyin idɔk ke Zion, ika ɔtɔ Jehovah Abasi nnyin.

7Koro ntem ke Jehovah ɔdɔhɔ, ete, Mbufo ekwɔ ke idaresit enɔ Jacob, enyuŋ efiori ɔkpɔsɔŋ ke otu akpan mme idut: mbufo ekwɔrɔ, etoro, enyuŋ edɔhɔ, ete, O Jehovah, nyaŋa ikɔt fo, nditɔ Isreal emi esuhɔde.

8Sese, ami nyeda mmɔ ke edem edere ndi, nnyuŋ ntaŋ mmɔ ke ŋkaŋ ererimbot mbon, nnan, ye mbuŋɔ, ye oyomo idibi, ye aŋwan uman ɔtɔ kiet: akwa udim eyefiak edi ken.

9Mmɔ eyetua eyet edi: nyenyuŋ nda mmɔ usuŋ ke mkpe-ubɔk: nyeda mmɔ ŋka idim mmɔŋ, nsaŋa ke edinen usuŋ, mmɔ ididuɔŋɔke ke esit: koro ami ndide ete Israel, Ephraim onyuŋ edi akpan mi.

10Mbufo mme idut ekop uyo Jehovah, ndien ekwɔrɔ enye ke mme-isuo eke eyomde usuŋ, enyuŋ edɔhɔ, ete, Enye emi akasuande Israel eyetaŋ mmɔ obon, onyuŋ ɔbɔk mmɔ nte ɔbɔk-erɔŋ ɔbɔkde ufene esie.

11Koro Jehovah amafak Jacob, onyuŋ edep enye osio ke ubɔk emi ɔsɔŋde akan enye.

12Ndien mmɔ eyedi edikwɔ ke obot Zion, enyuŋ ebuŋɔ edi ke mfɔn Jehovah: ebaŋa ibokpot ye obufa wine, ye aran, ye nditɔ ŋkpri ufene, ye nditɔ enaŋ: ndien ukpɔŋ mmɔ eyebiet iŋwaŋ eke ɔŋwɔŋde mmɔŋ; ndien mmɔ idiyemekede aba.

13Ndien eyen-aŋwan eyebre ke unek, ye mkparawa ye mbiowo ke ɔtɔ kiet: ndien nyeda inem ŋkpuhɔre eyet mmɔ, nnyuŋ ndɔŋ mmɔ esit, nnyuŋ nnam mmɔ edat esit ke ini ubaha mmɔ okurede.

14Nyenyuŋ nnɔ mme oku ikpɔŋ unam eyuhɔ, ikɔt mi eyenyuŋ edia mfɔn mi eyuhɔ: ke edi Jehovah ɔdɔhɔ.

15Ntem ke Jehovah ɔdɔhɔ, ete, Ekekop uyom ke Ramah, eseme, ye edidoro ntua-eyet; Rachel ke atua eyet abaŋa nditɔ esie, inyimeke ndikop ndɔŋesit mbaŋa nditɔ esie: koro mmɔ miduhe.

16Ntem ke Jehovah ɔdɔhɔ, ete, Dop uyo fo, kutua eyet, tre enyin fo mmɔŋ eyet: koro utom fo enyenede utip, Jehovah ɔdɔhɔ: ndien mmɔ eyeto ke isɔŋ mme asua efiak edi.

17Utit fo onyuŋ enyene idori-enyin: Jehovah ɔdɔhɔ. Ndien nditɔ fo eyefiak edi ke adaŋa mmɔ.

18Ŋkokop nte Ephraim atuade idem esie, ete, Afo ɔkɔtunɔ mi, ndien ŋkop; ntunɔ, nte abak enaŋ eke mimeheke: kabare mi, ndien nyekabare; koro afo Jehovah edide Abasi mi,

19Ŋkɔm, ke adaŋemi ŋkabarede, ntua mkpɔfiɔk: ndien ke adaŋemi esiande mi, nyibi ifuhi mi: but ye ndutime enam mi: koro mbiomde esuene uyen mi.

20Nte Ephraim edi edima eyen mi? Nte enye edi eyenɔwɔŋ eke enemde owo esit? Koro adaŋa ini nte ndɔhɔde mbaŋa enye, ntreke nditi enye kaŋa: oro esin nsia oyomo mi abaŋa enye; nditreke nditua enye mbɔm: Jehovah ɔdɔhɔ.

21Wuk adaha nɔ idem fo, sin ɔtɔnɔ nɔ idem fo: nim esit fo ke ɔkpɔ-usuŋ, usuŋ oro afo akasaŋade: fiak edem, O adiaha Israel, fiak edem ke mme obio fo emi.

22Adaŋa didie ke afo ediyɔrɔ, O eyen-aŋwan mfiakedem? Koro Jehovah obotde obufa ŋkpɔ ke ererimbot, ŋwan eyekan eren.

23Ntem ke Jehovah mme udim Abasi Israel ɔdɔhɔ, ete, Mmɔ eyesuk edɔhɔ ikɔ emi ke isɔŋ Judah, ye ke mme obio esie, ke ini ndidade mmɔ ke itie-mbuot-ekɔŋ mfiak ndi, ete, Jehovah osuk ɔdiɔŋ fi, O iduŋ eti ido, O edisana obot.

24Ndien Judah eyeduŋ ke esit, ye kpukpru mme obio esie ɔtɔ kiet, mbon iŋwaŋ ye mmɔ eke esaŋade ye ufene.

25Koro mmɔnɔ ukpɔŋ mba-ba mmɔŋ ɔŋwɔŋ, mmonyuŋ nyuhɔ kpukpru ukpɔŋ eke efuhɔde.

26Ndo-ndo oro ami ndemere, ŋkut; idap mi onyuŋ enem mi esit.

27Jehovah ɔdɔhɔ, ete Sese, mme usen ke edi eke ndidade mkpasip owo ye mkpasip ufene nsuan ke ufɔk Israel ye ke ufɔk Judah.

28Jehovah onyuŋ ɔdɔhɔ, ete, Ama ekem, kpa nte ŋkpemede mbaŋa mmɔ, man ndibere, nnyuŋ ŋwuri nnyuŋ nsobo, nnyuŋ mbiat, nnyuŋ ntuk: kpasuk ntre ke ndikpeme mbaŋa mmɔ, man mbɔp nnyuŋ ntɔ.

29Ke ini oro ididɔhɔke aba, ite, Mme ete ekedia ŋkim-ŋkim grape, ndien esin edet nditɔ edoro isuɔ.

30Edi kpukpru owo kiet kiet eyekpa ke idiɔk ido mmɔ: edet kpukpru owo eke ediade ŋkim-ŋkim grape eyedoro isuɔ.

31Jehovah ɔdɔhɔ, ete, Sese, mme usen ke edi eke ndinamde obufa ediomi ye ufɔk Israel, ye ufɔk Judah;

32idibietke ediomi oro ŋkodiomide ye mme ete mmɔ, ke usen oro ŋkomumde mmɔ ubɔk, nnyuŋ nsioŋo mmɔ ke isɔŋ Egypt; kpa ediomi mi oro mmɔ ekebiatde, ndien ami ŋkenyene mmɔ: Jehovah ɔdɔhɔ:

33koro emi edide ediomi eke ndidiomide ye ufɔk Israel, ke mme usen oro ema ebe, Jehovah ɔdɔhɔ: nyesin mmɔ mbet mi ke esit, nnyuŋ ŋwet mmɔ ke ɔwɔŋ esit; nyenyuŋ ndi Abasi mmɔ, ndien mmɔ eyedi ikɔt mi.

34Ndien kiet idikpepke aba mbɔhiduŋ esie, ye kiet eyen-ete esie, ite, Mbufo efiɔk Jehovah: koro kpukpru mmɔ, ŋkpri ye ikpɔ, eyefiɔk mi, Jehovah ɔdɔhɔ: koro nyefen mme idiɔk ido mmɔ, ndinyuŋ ntihi aba mme oburobut ido mmɔ.

35Ntem ke Jehovah emi onimde utin ke uŋwana ke uwemeyo, ye ewukde ɔfiɔŋ ye ntantafiɔŋ ke uŋwana ke okoneyo, emi osukde odut inyaŋ, ke ini enye adahade, Jehovah mme udim edi enyiŋ esie, ɔdɔhɔ ete,

36Mme ewuhɔ emi ema edaŋa mi ke iso, ndien ubon Israel eyetre ndidi idut ke iso mi ke nsinsi, ke edi uyo Jehovah.

37Ntem ke Jehovah ɔdɔhɔ, ete, Ema ekeme ndidomo heaven ke enyɔŋ, nnyuŋ nduŋɔre itie-uwuk isɔŋ ke idak, ndien ami nyeduɔk ofuri ubon Israel, mbaŋa kpukpru se mmɔ enamde; Jehovah ɔdɔhɔ.

38Jehovah ɔdɔhɔ ete, Sese, mme usen ke edi eke mmɔ edibɔpde obio enɔ Jehovah, ɔtɔŋɔde ke edikoŋ ufɔk Hananel tutu osim ke inua-otop inuk.

39Uruk idomo eyenyuŋ ɔtɔŋɔ ntak ɔwɔrɔ ke edem oko ebe obot Gareb, ndien akabare aka Goah.

40Ndien ofuri ebedeŋ mme okpo ye eke ntɔŋ, ye ofuri ntaŋwaŋ ebiet tutu osim ebedeŋ Kidron, ye inuk inua-otop mme horse, ke edem usiakha-utin, eyedi edisana ebiet Jehovah; ididibekede enye, enye idinyuŋ ibiarake aba ke nsinsi.