DEUTERONOMY 23 - Efik Old Bible With Sectional Headings

Mme Mmɔ Emi Esiode Efep ke Efe Esop Ikɔt Abasi

1ANUAHA nsen, ye osibe ekpeta, okuduk ke esop Jehovah.

2Eyen akpara okuduk ke esop Jehovah; baba ke idem ɔyɔhɔ emana esie duop, enye okuduk ke esop Jehovah.

3Eyen Ammon ye eyen Moab ekuduk ke esop Jehovah, baba ke idem ɔyɔhɔ emana mmɔ duop, ekuduk ke esop Jehovah ke nsinsi:

4koro mmɔ mikedaha uyo ye mmɔŋ isobo ye mbufo ke usuŋ, ke ini mbufo etode ke Egypt ewɔŋɔ; koro mmɔ ekenyuŋ edade okuk enɔ Balaam eyen Beor emi otode ke Pethor ke Mesopotamia, ebaŋa fi, ete enye edisuŋi fi.

5Edi Jehovah Abasi fo ikonyimeke ndikop nnɔ Balaam; edi Jehovah Abasi fo ama ɔkpuhɔre isuŋi esin ke eridiɔŋ ɔnɔ fi: koro Jehovah Abasi fo amade fi.

6Kuyom emem mmɔ, ye se ifɔnde ye mmɔ, ofuri ini fo tutu amama.

7Kusua eyen Edom: koro enye edide eyen-usɔ; kusua eyen Egypt: koro afo ekededi esen ke isɔŋ mmɔ.

8Nditɔ eke emanade enɔ mmɔ eyekeme ndiduk ke esop Jehovah ke ɔyɔhɔ emana mmɔ ita.

9Ke adaŋemi mbon ekɔŋ ewɔŋɔde eka ekɔŋ ye mme asua fo, kpeme idem fo ke kpukpru idiɔk.

10Ke adaŋemi owo eke edehede abaŋa ŋkpɔ eke otibede ke okoneyo odude ke otu fo, yak enye ɔwɔrɔ aka edem nna, okuduk ke esit nna:

11ndien ke utin osopde, yak enye oduk ke esit nna.

12Ndien ŋko nyene ɔtɔ ke edem nna, nyuŋ wɔrɔ ke ikɔt do:

13nyuŋ kama udɔk ke otu ŋkpɔ-ekɔŋ fo; ndien ama ekem, ke afo ɔsɔrɔde ke edem nna, da enye tibi isɔŋ, ndien kabare fuk ndek fo.

14Koro Jehovah Abasi fo asaŋade ke esit fo, ete inyaŋa fi, inyuŋ ida mme asua fo inim fi ke iso: ndien nna fo edi edisana: mbak enye edikut mbubiam ke otu fo, ndien akabare ɔkpɔŋ fi.

15Kuda ofin eke efehede itɔk ɔkpɔŋ andinyene etiene fi, uyak unɔ andinyene:

16yak enye oduŋ ye afo ke otu fo, ke ɔtɔ eke enye edimekde ke obio mbufo kiet, kpa nte enye amade: kufik enye.

17Baba akpara kiet okudu ke otu nditɔ-iban Israel, baba ekpe akpara kiet okunyuŋ odu ke otu nditɔ-iren Israel.

18Kuda ŋkpɔ akpara, ye ekɔm-urua ebua, uduk ke ufɔk Jehovah Abasi fo, ke eke akaŋa ekededi: koro Jehovah Abasi fo esede mbiba emi ke ŋkpɔ mbubiam.

19Kubuɔt eyen-usɔ ubɔ udori; edide udori ke okuk, onyuŋ edide udori ke udia, mme udori ke ŋkpɔ ekededi eke ebuɔtde edia udori:

20buɔt esen owo dia udori; edi kubuɔt eyen-usɔ ubɔ udori: kpaŋ Jehovah Abasi fo ɔkpɔdiɔŋ fi ke kpukpru utom ubɔk fo, ke isɔŋ emi afo akade do ndida enye nnyene.

21Ke adaŋemi afo edikaŋade akaŋa ɔnɔ Jehovah Abasi fo, kubigi ndisio enye: koro Jehovah Abasi fo miditreke ndiyom enye ke ubɔk fo; ndien afo, eyedue isop.

22Edi edieke afo etrede ndikaŋa, ududuehe isop.

23Kpeme se itode fi ke inua: nyuŋ nam kpa nte afo akaŋade ɔnɔ Jehovah Abasi fo, kpa ŋkpɔ ima esit, eke afo asiakde ke mkpɔk-inua fo.

24Ke adaŋemi afo edidukde ke iŋwaŋ vine mbɔhiduŋ fo, dia grape nte afo amade yuhɔ; edi kuda usin ke akpan fo.

25Ke adaŋemi afo akade ke ebiet ibokpot mbɔhiduŋ fo, kibi ibuot ke ubɔk fo, edi kusin ukpi-ŋkpɔ ke ibokpot mbɔhiduŋ fo.