MICAH 7 - Efik Old Bible With Sectional Headings

Nditɔ Israel Ema Ebiara Ofuri Ofuri

1ƆDƆDIƆK ye ami! koro ntiede nte etetde ndat-ndat mfri: mbiet ŋkeŋe-ŋkeŋe mfri vine: baba etuek kiet eke owo adiade iduhe: baba akpa ndat fig eke ɔdɔŋde mi ukpɔŋ.

2Owo eke amade Abasi atak ke isɔŋ: baba owo kiet eke enende ke otu owo iduhe: kpukpru mmɔ edibe eyom iyip, kiet ada iyire ebine eken.

3Ubɔk mbiba edoro ke idiɔk man etim enam: ɔbɔŋ ye ebierikpe ŋko eyom utip: akwa owo onyuŋ etiŋ se idɔŋde ukpɔŋ esie: ntem ke mmɔ ekwaŋa ŋkpɔ.

4Mmɔ eke efɔnde ke otu mmɔ ebiet ŋkukim: mmɔ eke enede ediɔk ekan ɔkɔ akpap: usen mbon ukpeme fo ye eke ufen fo ke edi: ke emi ke ndutime mmɔ edidi.

5Mbufo ekunim uyo nsaŋa ke akpanikɔ, ekubuɔt idem ye ata ufan: kpeme usuŋ inua fo bak ŋwan emi anade fi ke ikpanesit.

6Koro eyen-eren esede ete esie ke ndek, eyen-aŋwan onyuŋ omiom ye eka esie: ŋwan eyen onyuŋ oyom eka ebe esie ikɔ; mbon usua owo edi nditɔ ufɔk esiemɔ.

7Edi ami nyetiŋ enyin ke Jehovah: nyebet Abasi emi anyaŋade mi: Abasi mi eyekop uyo mi.

8Kubure ubaŋa mi, O usua mi; ke ini nduɔde, nyedaha ke enyɔŋ; ke ini ntiede ke ekim, Jehovah eyedi uŋwana mi.

9Nyeyɔ ifuresit Jehovah, koro nduede enye: tutu enye edibiere ikɔ mi, onyuŋ ekpe ikpe mi: enye eyesio mi onim ke uŋwana: nyekut edinen ido esie.

10Ndien usua mi eyekut, ndien but eyefuk enye emi ɔkɔdɔhɔde mi, ete, Jehovah Abasi fo odu mmɔŋ? Enyin mi eyekut enye: ke emi enye eyedi se edigide nte mbat aŋwa.

11Ke usen eke edidiɔŋde ibibene fo, ke usen oro ke edinam adaŋa (fo) okpon.

12Ndien ke usen oro, owo eyeto ke Assyria, ye ke mme obio Egypt edi ke ebiet fo, ɔtɔŋɔde ke Egypt ŋko tutu osim akpa, ye ke inyaŋ kiet tutu osim inyaŋ eken, ye ke obot kiet tutu osim obot eken.

13Ndien isɔŋ emi eyena ikpikpu abaŋa mme andiduŋ enye, oto ke mfri ido mmɔ.

14Da esaŋ fo bɔk ikɔt fo, kpa ufene emi afo enyenede, emi eduŋde ikpɔŋ ke akai ke ufɔt Carmel: mmɔ eyeta mbiet ke Bashan ye ke Gilead, kpa nte eyo oko.

15Kpa nte usen emi afo okotode ke Egypt ke ndiwut enye mme utibe ŋkpɔ.

16Mme idut eyekut mi, ndien but ofuri odudu mmɔ eyenam mmɔ: mmɔ eyeda ubɔk mmɔ edori ke inua, utɔŋ mmɔ eyebakare edi inan.

17Mmɔ eyedei ntan nte urukikɔt, eyetie ke ndudu mmɔ enyek idem nte mme andinyɔni ke ntan: eyetiene Jehovah Abasi nnyin ke ndik, enyuŋ edikhe fi.

18Anie Abasi ebiet fi, ke efen mme ukwaŋ-ŋkpɔ, ke adahado ke idiɔk ido owo udeme esie emi esuhɔde? Ikɔhɔkede iyaresit esie ke nsinsi: koro enye adatde esit ndifɔn ido.

19Enye eyetɔŋɔ ntak atua nnyin mbɔm, eyedigi mme idiɔk ido nnyin; afo eyemen kpukpru mme ukwaŋ-ŋkpo mmɔ ɔduɔk ke udem inyaŋ.

20Afo eyenɔ Jacob akpanikɔ, ɔnɔ Abraham ufɔn oro afo ɔkɔŋwɔŋɔde ɔnɔ mme ete nnyin ke eyo oko.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help