1 NDIDEM 4 - Efik Old Bible With Sectional Headings

Mme Mmɔ Emi Ekenamde Utom Ukara ye Edidem Solomon

1NTEM ke edidem Solomon edi edidem ofuri Israel. Ndien mme mmɔ emi edi ikpɔ owo esie;

2Azariah eyen Zadok akpan owo;

3Elihoreph ye Ahiijah, nditɔ Shisha, edi mme ewet-ŋwed; Jehoshaphat eyen Ahilud edi andiwet ŋkpɔ obio.

4Ndien Benaiah eyen Jedoiada edi etubom mbon-ekɔŋ: Zadok ye Abiathar enyuŋ edi mme oku.

5Azariah eyen Nathan onyuŋ edi etubom mme andidaha: Zabud eyen Nathan ata akpan owo onyuŋ edi ufan edidem;

6ndien Ahishar onyuŋ edi etubom ufɔk: Adoniram eyen Abda edi akama-utomo.

7Solomon onyuŋ enyene ndidaha owo duopeba eke ekarade ofuri Israel, eke edepde udia enɔ edidem ye ufɔk esie: owo kiet kiet aŋwana udia ke ɔfiɔŋ kiet ke isua.

8Ndien mme mmɔ emi edi enyiŋ mmɔ:

9Ben-hur, ke obot Ephraim: Bendeker, ke Makaz, ye ke Shaalbim, ye Beth-shemesh, ye Elon-bethhanan:

10Ben-hesed, ke Arubboth; mmɔ enim Socoh ye ofuri edem Hepher enɔ enye.

11Ben-abinadab ada ofuri obot Dor; ndien Taphat eyen Solomon aŋwan ekedi ŋwan esie:

12Baana eyen Ahilud ada Taanach ye Meggido, ye ofuri Beth-shean, emi ekperede Zarethan, ke idak Jezreel, ɔtɔŋɔde ke Beth-shean tutu osim ke Abel-meholah, ye ke edem Jokmean oko;

13Bengeber ke Ramoth-gilead: enye ada mme obio Jair eyen Manasseh, emi edude ke Gilead; enye ada edem Argob emi odude ke Bashan, ikpɔ obio ata emi enyenede ibibene ye usin-usuŋ okpoho:

14Ahinadab eyen Iddo ada Mahanaim:

15Ahimaaz odu ke Naphtali: enye onyuŋ ada Basemath eyen Solomon aŋwan ɔdɔ:

16Baana eyen Hushai odu ke Asher ye ke Bealoth:

17Jehoshaphat eyen Paruah odu ke Issachar:

18Shimei eyen Ela odu ke Benjamin.

19Geber eyen Uri odu ke isɔŋ Gilead, ke isɔŋ Sihon ɔbɔŋ mme Amorite, ye eke Og ɔbɔŋ Bashan: enye onyuŋ edi adidaha kierakiet ke isɔŋ oro.

20Judah ye Israel ekewak, nte ntan emi odude ke mben inyaŋ ke uwak, ke edia ŋkpɔ, enyuŋ eŋwɔŋ, enyuŋ edaresit.

21Solomon onyuŋ akara kpukpru mme idut, ɔtɔŋɔde ke Akpa ye idut mme Philistine, tutu osim ke adaŋa Egypt: mmɔ etomo utomo; enyuŋ edi ikɔt Solomon ofuri ini uwem esie.

22Ndien udia Solomon ke usen kiet edi ndom-uyo ke cor edip ye duop, ye ndom-uyo (efen) ke cor ata;

23enaŋ eke ekuhɔde duop, ye enaŋ eke esaŋade eta mbiet edip ye duop, ye ŋkpri ufene ikie, ɔkɔrɔ ye ebet, ye okoyo, ye edop, ye edisehe unen.

24Koro enye akarade ofuri edem akpa emi, ɔtɔŋɔde ke Tiphsah tutu osim ke Gaza, onyuŋ akara kpukpru ndidem ke edem akpa emi; onyuŋ etie ke emem ke edem esie kpukpru.

25Ndien Judah ye Israel eduŋ ke ifure, kpukpru owo ke idak vine mmɔ ye eto fig mmɔ, ɔtɔŋɔde ke Dan tutu osim ke Beer-sheba, ke ofuri eyo Solomon.

26Solomon onyuŋ enyene itie horse chariot esie tɔsin aba, ye tɔsin mbio horse duopeba.

27Ndien mme adidaha oro ekedep udia enɔ edidem Solomon, ye kpukpru mmɔ eke etiede ke okpokoro edidem Solomon, owo kiet kiet ke ɔfiɔŋ esie: mmɔ iyakke baba ŋkpɔ kiet anana.

28Mmɔ enyuŋ eda barley ye nnyanyaŋa mme horse, ye eke mme dromedary, edi ke ebiet eke mmɔ edude do, owo kiet kiet ke ini esie.

29Ndien Abasi ɔnɔ Solomon eti ibuot ye asian eti-eti, ye ɔniɔŋ esit, nte ntan emi odude ke mben inyaŋ.

30Ifiɔk Solomon onyuŋ awak akan ifiɔk kpukpru nditɔ edem usiaha-utin, ye ofuri ifiɔk Egypt.

31Enye onyuŋ ɔfiɔk ŋkpɔ akan kpukpru owo, akan Ethan Ezrahite, ye Heman, ye Calcol, ye Darda, nditɔ Mahol; ndien etop esie ɔwɔrɔ ke kpukpru mme idut eke ekande ekuk.

32Enye onyuŋ eke tɔsin ŋke ita; ikwɔ esie enyuŋ edi tɔsin ye ition.

33Enye onyuŋ etiŋ abaŋa eto, ɔtɔŋɔde ke cedar emi odude ke Lebanon tutu osim ke hyssop emi otibede ke ibibene; onyuŋ etiŋ abaŋa unam,

34ye inuen, ye mme ɔnyɔni, ye iyak. Owo enyuŋ eto ke kpukpru mme idut edi ndikop ifiɔk Solomon, eto ke ɔtɔ kpukpru ndidem ererimbot eke ekekopde ebaŋa ifiɔk esie.