DANIEL 1 - Efik Old Bible With Sectional Headings

Ŋkparawa Hebrew Inaŋ ke Otu Mmɔ Emi Ebɔde Ukpep-Ŋkpɔ ke Esa Edidem Babylon

1KE ɔyɔhɔ isua ita nte Jehoiakim edidem Judah akada ubɔŋ, Nebuchadnezzar edidem Babylon edi ke Jerusalem edikan enye okuk.

2Ndien Ɔbɔŋ emen Jehoiakim edidem Judah esin enye ke ubɔk, ye ubak mkpoduoho ufɔk Abasi; ndien enye ada mmɔ ɔnyɔŋ ke edem shinar ke ufɔk abasi esie; onyuŋ ada mkpoduoho oro esin ke ufɔk unim-ŋkpɔ abasi esie.

3Ekem edidem ɔdɔhɔ Ashpenaz etubom mme eunuch esie, ete osio ndusuk nditɔ Israel, ye ke oruk edidem, ye ke eke ikpɔ owo;

4nditɔ eke mibiomke baba ndo, eke enyuŋ eyede iso, enyuŋ edide ɔniɔŋ ke kpukpru oruk eti ibuot, enyuŋ efiɔkde ŋkpɔ, enyuŋ edide mme asian ke ifiɔk, eke enyuŋ enyenede ukeme nte edidade ke akwa ufɔk edidem, eke edinyuŋ ekpepde mmɔ ŋwed ye usem mme Chaldean.

5Ndien edidem eteme, ete enɔ mmɔ udeme udia edidem ye eke wine emi enye ɔŋwɔŋde, nte ekemde kpukpru usen; enyuŋ ebɔk mmɔ ntem ke isua ita, man adaŋemi isua ita ebede, mmɔ ekpeda ke iso edidem.

6Ndien Daniel ye Hananiah ye Mishael ye Azariah emi etode ke nditɔ Judah, edu ke otu mmɔ:

7ndien etubom mme eunuch osio mmɔ enyiŋ: osio Daniel Belteshazzar; onyuŋ osio Hananiah Shadrach; onyuŋ osio Mishael Meshach; onyuŋ osio Azariah Abed-nego.

8Ndien Daniel aduak ke esit esie, ete ke imɔ idisabakede idem imɔ ke udia edidem ye ke wine emi enye ɔŋwɔŋde; enye onyuŋ ebeŋe etubom mme eunuch, ete ikusabare idem imɔ.

9Ndien Abasi ama ekesin etubom mme eunuch ɔfɔn ido ye Daniel onyuŋ ama enye eti-eti.

10Ndien etubom mme eunuch ɔdɔhɔ Daniel, ete, Ami mfehe ɔbɔŋ mi edidem, emi eketemede se mbufo edidiade edinyuŋ eŋwɔŋde: enye edinam didie okut iso ɔdiɔkde mbufo akan eke nditɔwɔŋ emi edide ŋka mbufo? Ndien mbufo eyenam mi ndue isop mkpa ye edidem.

11Ndien Daniel ɔdɔhɔ Hammelzar emi etubom mme eunuch okodoride, ete ese Daniel ye Hananiah ye Mishael ye Azariah, ete,

12Mbɔk, kam domo nnyin ikɔt fo ke usen duop; yak enyuŋ enɔ nnyin ŋkpɔ iŋwaŋ idia, ye mmɔŋ iŋwɔŋ.

13Ndien yak ese idem nnyin ye idem nditɔ oro ediade udia edidem ke iso fo; ndien nam ye nnyin ikɔt fo kpa nte afo edimade.

14Ndien enye okop uyo mmɔ ke ŋkpɔ emi, onyuŋ odomo mmɔ ke usen duop.

15Ndien ke utit usen duop mmɔ ekut idem mmɔ, ete ke ɔfɔn onyuŋ esehe akan kpukpru nditɔwɔŋ oro ediade udia edidem.

16Ndien Hammelzar ɔbɔ mmɔ udia oro ye wine eke mmɔ ekpeŋwɔŋde, onyuŋ ɔnɔ mmɔ udia iŋwaŋ.

17Ndien ama edi nditɔwɔŋ mbinaŋ emi, Abasi ɔnɔ mmɔ ifiɔk ye eti ibuot ke kpukpru oruk ŋwed ye ɔniɔŋ; Daniel onyuŋ edi asian ke kpukpru oruk ŋkukut ye ndap.

18Edikem ke utit ini emi edidem ɔkɔdɔhɔde, ete eda mmɔ edi, ndien etubom mme eunuch ada mmɔ edi ke iso Nebuchadnezzar.

19Ndien edidem eneme nneme ye mmɔ; ndien enye ikwe baba owo kiet eke ebietde Daniel, ye Hananiah ye Mishael ye Azariah ke otu mmɔ kpukpru: ndien mmɔ eda ke iso edidem.

20Ndien ke kpukpru ŋkpɔ ifiɔk ye asian eke edidem obupde mmɔ, enye onyuŋ okut ete ke mmɔ ekan kpukpru mbon-ŋwed ye mbia-idiɔŋ eke edude ke ofuri idut esie utim ikoduop.

21Ndien Daniel odu uwem tutu osim ke akpa isua Cyrus edidem.