2 SAMUEL 3 - Efik Old Bible With Sectional Headings

Ikɔt Ufɔk Saul ye Ikɔt David Ekaiso Eŋwana Ekɔŋ

1NTRE ke ufɔk Saul eŋwana ekɔŋ ye ufɔk David ebigi; ndien David ɔdɔdiɔŋ ɔsɔŋ aka iso, edi ufɔk Saul ɔdɔdiɔŋ afiak edem.

2Nditɔ-iren enyuŋ emana enɔ David ke Hebron: ndien akpan esie edi Amnon, eyen Ahinoam aŋwan a Jezreel;

3ndien udɔ esie edi Chileab eyen Abigail ŋwan Nabal Carmelite; ndien udɔ-udɔ edi Absalom eyen Maacab, eyen-aŋwan Talmai edidem Geshur;

4ye ɔyɔhɔ inaŋ, Adonijah, eyen Haggith; ye ɔyɔhɔ ition, Shephatiah, eyen Abital; ye ɔyɔhɔ itiokiet,

5Ithream, eyen Eglah, ŋwan David. Mme mmɔ emi emana enɔ David ke Hebron.

6Edikem adaŋemi ufɔk Saul aŋwanade ekɔŋ ye ufɔk David, Abner ɔsɔŋ omum ufɔk Saul akama.

7Ndien Saul ekenyene ŋwan-esa kiet, ekere Rizpah, eyen Aiah aŋwan: ndien Ish-bosheth ɔdɔhɔ Abner, ete, Afo anam didie okot ŋwan-esa ete mi?

8Ndien Abner ayat esit eti-eti abaŋa uyo Ish-bosheth, enye onyuŋ ɔdɔhɔ ete, Nte ami ndi ibuot ebua eke adade ye Judah? Mfin emi mfɔn ido ye ufɔk Saul usɔ ye nditɔ-ete esie, ye mme ufan esie, nnyuŋ ndaha fi nsin David ke ubɔk, ndien afo odori mi ikɔ mfin emi abaŋa ŋwan emi?

9Yak abasi osuk anam ntre ye Abner, onyuŋ anam ntre aka iso, ke mmendinamke nnɔ David kpa nte Jehovah ɔkɔwɔŋɔde ɔnɔ enye,

10nnyuŋ mbɔ ufɔk Saul itie edidem, nnyuŋ nnim ebekpo David ke Israel ye ke Judah, ɔtɔŋɔde ke Dan tutu osim ke Beer-sheba.

11Ndien enye ikwe aba nte ɔbɔrɔde Abner ikɔ: koro abakde enye.

12Ekem Abner ɔdɔŋ mme isuŋ-utom ke idemesie ekedɔhɔ David ete, Anie edi andinyene obio? ete, Diomi ediomi fo ye ami, ndien, sese, ubɔk mi eyediana ye afo, man nda ofuri Israel ŋkabare nsɔk fi.

13Ndien enye ɔbɔrɔ, ete, Ɔfɔn: ami nyediomi ye afo: edi ŋkpɔ kiet ke ami nyom ke ubɔk fo; nte ke afo udukwe mi iso, tutu afo ebem iso ada Michal uduŋwan Saul edi, adaŋemi afo edidide ndikut mi iso.

14David onyuŋ ɔdɔŋ mme isuŋutom etiene Ish-bosheth eyen Saul, ete, Nɔ mi Michal ŋwan mi emi ŋkadade edut mme Philistine ikie ntomo ukot.

15Ndien Ish-bosheth ɔdɔŋ ekesio enye ke ubɔk ebe esie, kpa Paltiel, eyen Laish.

16Ndien ebe esie asaŋa ye enye atua eyet, etiene enye ke edem, tutu osim ke Bahurim. Ekem Abner ɔdɔhɔ enye, ete; Fiak edem nyɔŋ. Ndien enye afiak edem.

17Ekem Abner eneme nneme ye mbiowo Israel, ete, Mbufo ekeyom David ke edidem mbufo totoko:

18enam ndien ke emi: koro Jehovah ɔkɔdɔhɔde abaŋa David, ete, Nyeda ubɔk owo mi David nnyaŋa ikɔt mi Israel, nsio ke ubɔk mme Philistine, ye ke ubɔk kpukpru mme asua mmɔ.

19Abner onyuŋ ɔdɔhɔ ŋko ke utɔŋ Benjamin: ndien Abner emen kpukpru se ifɔnde Israel ke enyin, ye ke enyin ofuri ufɔk Benjamin, aka okobuk ke utɔŋ David ke Hebron.

20Ekem Abner edisim David ke Hebron, owo edip enyuŋ esaŋa ye enye. David onyuŋ etem udia ɔnɔ Abner ye mmɔ emi esaŋade ye enye.

21Ndien Abner ɔdɔhɔ David, ete, Nyedaha ŋka ŋkosop ofuri Israel nnɔ ɔbɔŋ mi edidem, kpaŋ mmɔ ekpediomi ediomi ye afo, afo okponyuŋ edi edidem ke nte ofuri esit fo amade. Ekem David ayak Abner; ndien enye ɔnyɔŋ ke emem.

22Ndien, sese, Joab ye ikɔt David eto usuŋ mbume efiak edi; mmɔ enyuŋ eda ediwak mbume edi ŋko: edi Abner iduhe ye David ke Hebron: koro enye (David) akayakde enye ɔnyɔŋ ke emem.

23Adaŋemi Joab ye ofuri udim ekɔŋ oro edude ye enye, etode edi, mmɔ etiŋ enɔ Joab, ete, Abner eyen Ner ekedi ke ɔtɔ edidem, enye (edidem) okonyuŋ ayak enye ɔnyɔŋ ke emem.

24Ndien Joab etiene edidem, onyuŋ ɔdɔhɔ ete, Afo akanam nso? Sese, Abner ekedi ke ɔtɔ fo; nsinam afo akayakde enye, ndien enye ɔnyɔŋ ama?

25Afo ɔmɔfiɔk Abner eyen Ner, ete ke enye ekedi ndibiaŋa fi, nnyuŋ mfiɔk eriwɔrɔ fo, ye eriduk fo, nnyuŋ mfiɔk kpukpru se afo anamde.

26Ndien Joab ɔkpɔŋ David ɔwɔrɔ, ɔkɔdɔŋ mme isuŋutom ekebine Abner; ndien mmɔ eda enye ke ɔtɔ obube mmɔŋ Sirah efiak edi; edi David ifiɔkke.

27Ekem ke ini Abner afiakde okosim Hebron, Joab ada enye ɔkpɔnɔre ada ke inua-otop, ete idɔhɔ ikɔ suŋ-suŋ ye enye; ndien okim enye do ke idibi owot, abaŋa iyip Asahel eyen-eka esie.

28Edikem ke ini David okopde, enye ɔdɔhɔ, ete, Jehovah idinamke iyip Abner eyen Ner ɔsɔp mi ye ubɔŋ mi ke nsinsi.

29Yak enye odoro Joab ke ibuot, ye ke ofuri ufɔk ete esie; ndien owo eke ŋkpɔ ɔwɔrɔde enye ke idem, ye owo akpa-mfia, ye emi eberede ke esaŋ, ye emi ɔduɔde ke ofut, ye anana-udia okutre ke ufɔk Joab.

30Ntre ke Joab ye Abishai eyeneka esie ewot Abner, koro enye okowotde Asahel eyeneka mmɔ ke ekɔŋ ke Gibeon.

31Ndien David ɔdɔhɔ Joab ye kpukpru owo eke edude ye enye, ete, Mbufo ewai edisine-ŋkpɔ mbufo, enyuŋ ebɔbɔ ɔfɔŋ-ikpo ke idem, enyuŋ etuaŋa ke iso Abner. David edidem onyuŋ etiene ubiom-okpo ke edem.

32Ntre ke mmɔ ebuk Abner ke Hebron: edidem onyuŋ emenere uyo esie, atua eyet ke ɔtɔ udi Abner; kpukpru owo enyuŋ etuaŋa.

33Ndien edidem ɔkwɔ Abner, ete, Nte Abner akakpa nte ndisime owo akpade?

34Ikɔbɔpke fi ubɔk, iko-nyuŋ isinke fi ebuka ke ukot: afo ɔmɔduɔ nte owo eke ɔduɔde ke iso mme idiɔk owo, Kpukpru owo enyuŋ etɔŋɔ ntak etuaŋa enye.

35Ekem kpukpru owo edi ndinam David adia ŋkpɔ ke eyo mika ikutke, edi David ɔŋwɔŋɔ ete, Abasi osuk anam mi ntem, onyuŋ anam aka iso, edieke ntabide uyo mme ŋkpɔ ekededi ke utin mika-isopke.

36Ndien kpukpru owo efiɔk, enyuŋ enem esit: kpa nte kpukpru se edidem anamde enemde kpukpru owo esit.

37Ndien kpukpru owo ye ofuri Israel efiɔk ke usen oro, ete ke idige edidem ekesin ewot Abner eyen Ner.

38Edidem onyuŋ ɔdɔhɔ ikɔt esie, ete, Nte mbufo ifiɔkke ete ke ɔbɔŋ ye akamba owo ɔmɔduɔ mfin emi ke Israel?

39Ndien ami ndi mfefere mfin emi, okposuk edi nte ekeyetde mi aran enim ke edidem: mbon emi, nditɔ Zeruiaih enyuŋ esɔŋ ekan mi: Jehovah eyesio usiene ye owo eke anamde idiɔk nte ekemde ke idiɔk ido esie.