1 NDIDEM 14 - Efik Old Bible With Sectional Headings

Ubiom Ikpe Abasi Ufɔk Jeroboam

1KE ini oro Abijah eyen Jeroboam ɔdɔŋɔ. Ndien Jeroboam ɔdɔhɔ ŋwan esie, ete,

2Mbɔk, daha ke enyɔŋ, foro owo efen, man ekufiɔk ete ke afo edi ŋwan Jeroboam: ndien ka ke Shiloh: sese, Ahijah prophet oro ɔkɔdɔhɔde abaŋa mi ete ke ami ndida ubɔŋ obio emi, odu do.

3Nyuŋ da uyo duop, ye obukpa uyo, ye aran-ɔkwɔk ke ekpeme ke ubɔk fo, nyuŋ ka ke ɔtɔ esie: enye eyesiak se idiwɔrɔde eyen emi.

4Ndien ŋwan Jeroboam anam ntre, onyuŋ adaha ke enyɔŋ aka ke Shiloh, okoduk ke ufɔk Ahijah. Edi Ahijah ikwe ŋkpɔ, koro usɔŋ esie esinde enyin akai enye.

5Ndien Jehovah ɔdɔhɔ Ahijah, ete, Sese, ŋwan Jeroboam ke edi ndibup fi ŋkpɔ, mbaŋa eyen esiemɔ: koro eyen ɔdɔŋɔde dɔhɔ enye ntem ye ntem ndien ama ekem adaŋemi enye edidide, enye eyenim idem nte owo efen.

6Edikem ke ini Ahijah okopde ntim-ikpat esie, nte enye odukde ke enyin-usuŋ, enye ɔdɔhɔ, ete, Ŋwan Jeroboam, be duk, nsinam afo onimde idem fo nte owo efen? Koro etobode mi ɔkpɔsɔŋ ikɔ enɔ fi.

7Ka kɔdɔhɔ Jeroboam, ete, Ntem ke Jehovah Abasi Israel ɔdɔhɔ ete, Koro ami ŋkemenerede fi ke ufɔt obio, nnyuŋ nnim fi ke ɔbɔŋ ikɔt mi Israel,

8ŋkonyuŋ ŋwai ubɔŋ ufɔk David mbɔ, nda nnɔ fi, ndien afo ukanamke nte owo mi David, emi okonimde mbet mi, onyuŋ ebinede mi ke ofuri esit esie, onyuŋ anam se inende mi ke enyin ikpɔŋ-ikpɔŋ,

9edi ama anam idiɔk akan kpukpru owo emi ekebemde fi iso edu ama onyuŋ aka akanam abasi eŋwen, ye editara mbiet, onyuŋ ayat mi esit, onyuŋ emen mi ɔduɔk ke edem fo.

10Mmɔdo, sese, ami nyeda idiɔk-ŋkpɔ ntiene ufɔk Jeroboam, nyenyuŋ nsibe irenowo ufɔk Jeroboam mfep. Ofin ye eyen isɔŋ ke Israel, ndien nyebine ufɔk Jeroboam ŋkpɔri mfep, kpa nte owo ɔkpɔride ifum efep tutu okure.

11Mme ebua eyeta owo Jeroboam eke akpade ke obio, mme inuen enyɔŋ eyenyuŋ eta owo eke akpade ke iŋwaŋ: koro edi Jehovah ɔdɔhɔ.

12Afo daha ke enyɔŋ ndien ka ke ufɔk fo: adaŋemi ukot fo odukde ke obio, eyen oro eyekpa.

13Ndien ofuri Israel eyetuaŋa enye, enyuŋ ebuk enye: koro enye ikpɔŋ-ikpɔŋ ke eke Jeroboam edibukhɔ ke udi; koro ekutde ete ke se Jehovah Abasi Israel esede ke eti ŋkpɔ odu enye ke esit, ke ufɔk Jeroboam.

14Ndien Jehovah eyenam edidem Israel adaha ke enyɔŋ, eke edikpokde ufɔk Jeroboam efep. Emi eyesu mfin; ye kpa ke idem idahemi,

15Ndien Jehovah eyenuak Israel, kpa nte mmɔŋ enyeŋede nnyanyaŋa, enye eyenyuŋ edibere Israel efep ke eti isɔŋ emi enye ɔkɔnɔde mme ete mmɔ, onyuŋ asuan mmɔ ke edem akpa oko: koro mmɔ enamde eto-mkpe, ke eyat Jehovah esit.

16Ndien enye eyeyak Israel ɔnɔ, abaŋa mme idiɔk ido Jeroboam emi ɔkɔdiɔkde, emi okonyuŋ anamde Israel ediɔk.

17Ndien ŋwan Jeroboam adaha ke enyɔŋ, ɔnyɔŋ ke Tirzah: ndien ke ini enye ebede asaŋa-udɔk oduk ke ufɔk mmɔ, eyen oro akpa.

18Ndien mmɔ ebuk enye; ofuri Israel enyuŋ etuaŋa enye, ke uyo Jehovah oro enye akadade inua owo esie Ahijah prophet ɔdɔhɔ.

19Ndien ikɔ Jeroboam eŋwen, nte enye akaŋwanade ekɔŋ, nte enye okonyuŋ adade ubɔŋ, sese, emewet mmɔ ke ŋwed ikɔ eyo ndidem Israel.

20Ndien ini emi Jeroboam akadade ubɔŋ edi isua edip ye iba: ndien enye ɔsuhɔre ana ye mme ete esie ede idap: ndien Nadab eyen esie ada ubɔŋ ke itie esie.

21Ndien Rehoboam eyen Solomon edi edidem ke Judah. Rehoboam osim isua aba ye kiet ke ini enye adade ubɔŋ, onyuŋ edi edidem ke isua efureba ke Jerusalem, obio oro Jehovah ekemekde ke otu kpukpru esien Israel, ndisin enyiŋ esie do. Ndien enyiŋ eka esie ekere Naamah ŋwan Ammon.

22Judah enyuŋ enam idiɔk ke iso Jehovah enyuŋ esin enye ofibe ufup akan kpukpru se mme ete mmɔ ekenamde, ke idiɔk ido mmɔ eke mmɔ ekenamde.

23Ndien mmɔ enyuŋ enam edikoŋ ebiet ŋko-ŋko, ye mme adaha, ye eto mkpe, ke enyɔŋ kpukpru ŋkokoŋo obot, ye ke idak kpukpru awawa eto.

24Ndien mbon-use-sodom edu ke idut oro ŋko: mmɔ enam kpukpru mbubiam mme idut oro Jehovah okosiode ke iso nditɔ Israel ɔduɔk.

25Edikem ke ɔyɔhɔ isua edidem Jeroboam ition, Shishak edidem Egypt ɔdɔk edi ekɔŋ ke Jerusalem;

26onyuŋ ada ŋkpɔ-uto ufɔk Jehovah, ye ŋkpɔ-uto ufɔk edidem efep; enye ada kpukpru: onyuŋ emen kpukpru otu-ekɔŋ o gold oro Solomon akanamde, ɔnyɔŋ.

27Ndien edidem Rehoboam ada okpoho anam otu-ekɔŋ ke ibuot mmɔ, ada mmɔ esin ke ubɔk mme etubom mme andikpeme edidem, emi ekpemede inua-otop ufɔk edidem.

28Edikem adaŋemi edidem odukde ke ufɔk Jehovah, mme andikpeme ebiom mmɔ, ndien eda mmɔ efiak enim ke ubet mme andikpeme.

29Ndien ama edi ikɔ Rehoboam eŋwen, ye kpukpru se enye akanamde, nte ikewetke mmɔ ke ŋwed ikɔ ndidem Judah?

30Ekɔŋ onyuŋ odu ke ufɔt Rehoboam ye Jeroboam ke ofuri eyo mmɔ. Ekem Rehoboam ana ɔsuhɔre ye mme ete esie ede idap, onyuŋ ɔbuhɔ ye mme ete esie ke obio David.

31Ndien enyiŋ eka esie ekere Naamah ŋwan Ammon. Ndien Abiijam eyen esie ada ubɔŋ ke itie esie.