ISAIAH 5 - Efik Old Bible With Sectional Headings

Ŋke Emi Abaŋade iŋwaŋ-vine Emi Miŋwumke Mfri

1YAK nda ndien ikwɔ ufan mi eke abaŋade iŋwaŋ-vine esie, ŋkwɔ nnɔ ufan mi. Ufan mi ekenyene iŋwaŋ-vine ke obot mbiri.

2Ndien enye ofuŋ isɔŋ, onyuŋ ataŋ itiat ke esit efep, onyuŋ ɔtɔ enye akpan vine ke esit onyuŋ ɔbɔp enye tower ke ufɔt, onyuŋ otibi enye obube wine ke esit. Ndien enye onim enyin, ete eye-ŋwum eti grape, edi enye oŋwum ɔbɔruduk.

3Mbufo mme andiduŋ Jerusalem, ye mbio Judah, edi ndien edikpe ikpe ye ami, ye iŋwaŋ-vine mi.

4Nso ŋkpɔ ɔsuhɔ eke ŋkpanamde ye iŋwaŋ-vine mi, ndien mmeŋkanamke ke esit? Nnam didie ndien, nnim enyin nte enye eyeŋwum grape, ndien enye oŋwum ɔbɔruduk?

5Yak nsian mbufo, ndien, se ami ndinamde ye iŋwaŋ-vine mi: nyedibere ɔkɔ esie mfep, ndien enye eyekabare edi se etade; ŋwuri ibibene esie, ndien enye eyekabare edi se edigide:

6ndien nyebiat enye mma: owo idisepke enye, idinyuŋ idiɔŋke; edi akpap ye ŋkukim eyetibe; nyenyuŋ ŋwuk obubit enyɔŋ, nte edim okudep ke esit:

7koro ufɔk Israel edide iŋwaŋ-vine Jehovah mme udim, mbio Judah enyuŋ edi mkpuk ŋkpɔ emi enemde enye: ndien enye onim enyin ke ikpe, edi, sese, afai; onim enyin ke se inende, edi, sese, eseme.

8Ifɔnke fɔn inɔ mmɔ eke ekɔtde ufɔk ke ufɔk, edian iŋwaŋ ke iŋwaŋ, tutu ebiet iduhe, mbufo enyuŋ eduŋ ikpɔŋ ke ufɔt isɔŋ.

9Jehovah mme udim ɔdɔhɔ mi ke utɔŋ, ete, Kakpan ediwak ufɔk, ikpɔ ye nti, eyekabare edi ŋwure, koro owo eke oduŋde miduhe.

10Koro iŋwaŋ-vine eke enaŋ iba-iba ke itie duop efuŋde, ewɔrɔ abaŋ kiet, mkpasip ke homer kiet eyenyuŋ anam ephah.

11Ifɔnke fɔn inɔ mmɔ eke ebakde edaha ke usenubɔk ebine mmin: ebigi ke okoneyo, wine obubere mmɔ ibuot!

12Harp, ye viol, ye ekɔmɔ, ye ifiom, ye wine, enyuŋ edu ke ikpɔ udia mmɔ: edi mmɔ itiŋke enyin ke utom Jehovah, inyuŋ isehe se ubɔk esie enamde.

13Mmɔdo etaŋde ikɔt mi efep, koro ifiɔk miduhe: ndien mbɔŋ mmɔ ekabare edi mbon ɔbiɔŋ, itɔŋ onyuŋ asat mbio-obio mmɔ.

14Mmɔdo obio-ekpo okponde udɔŋ aka iso, onyuŋ aŋwaŋade inua esie akaha; ndien ubɔŋ mmɔ, ye uwak mmɔ, ye iwok mmɔ, ye owo eke ebrede ke esit, esuhɔre.

15Ndien owo ɔsuhɔre, ɔbɔŋ onyuŋ ɔduɔ, enyuŋ etuk mbon iseri enyin:

16edi Jehovah mme udim okoŋ ke ikpe, enyuŋ ekut ete ke Abasi Ata Edisana asana ke edinen ido.

17Ndien nditɔ-erɔŋ eyeta mbiet, nte ɔtɔ mbiet mmɔ, isen owo eyenyuŋ edia ndon mmɔ eke ekponide.

18Ifɔnke fɔn inɔ mmɔ eke edade uruk nsu edudi idiɔk ido, eda idut ukpat-ŋkpɔ edudi ukwaŋ-ŋkpɔ: mmɔ emi edɔhɔde ete,

19“Yak enye awara, yak ɔsɔp ubɔk anam utom esie, man nnyin ikut: yak uduak Edisana Abasi Israel onyuŋ asaŋa edikpere, man nnyin ifiɔk!”

20Ifɔnke fɔn inɔ mmɔ eke edɔhɔde ebaŋa idiɔk, ete, Eti, ebaŋa eti, ete, Idiɔk: eke, enimde ekim ke uŋwana, enim uŋwana ke ekim; eke enimde idot ke iniŋe, enim iniŋe ke idot!

21Ifɔnke fɔn inɔ mmɔ eke esede idem mmɔ ke mbon eti ibuot, enyuŋ ebatde idem mmɔ ke ɔniɔŋ.

22Ifɔnke fɔn inɔ mmɔ eke enamde uko ke eriŋwɔŋ wine, enyuŋ edide mkpɔsɔŋ owo ke eribuak mmin:

23eke enamde ikpe asana idiɔk owo ebaŋa enɔ, enyuŋ ebɔde owo utebe-ikpe ndinen owo!

24Mmɔdo nte edemikaŋ atade etak nnyanyaŋa, ye nte edisak mbiet ɔduɔde, kpa ntre oruŋ mmɔ edibiet mbumbu eto, ikɔŋ mmɔ eyenyuŋ ɔdɔk nte obu: koro mmɔ emende ibet Jehovah mme udim eduɔk, enyuŋ esinde uyo Edisana Abasi Israel ke ndek.

25Oro esin Jehovah obumerede iyaresit ye ikɔt esie, onyuŋ anyan ubɔk esie odori mmɔ ke idem, onyuŋ ɔtɔ mmɔ: ndien ikpɔ obot enyek idem, mme okpo mmɔ enyuŋ ena nte ifum ke efak. Ofuri ŋkpɔ emi isinke iyaresit esie afiak edem, edi enye osuk anyanyan ubɔk esiemɔ.

26Ndien enye ke emenere ŋkpɔ idiɔŋɔ ɔnɔ mme idut ke anyan ebiet, onyuŋ esi okot mmɔ ke utit ererimbot, ndien, sese, mmɔ ke ewara edi itɔk-itɔk:

27baba owo kiet ke otu mmɔ ikpaha mba; baba kiet ituakke ukot iduɔ; mmɔ iyetke idap inyuŋ idehe; itatke ubɔp-isin ke idem ifep, uruk ikpa-ukot mmɔ inyuŋ ikibeke:

28emi idaŋ mmɔ esɔpde, kpukpru utiga mmɔ enyuŋ enuhɔ, ebat mbara ukot mme horse mmɔ ke afransi, mme wheel mmɔ enyuŋ ebiet oyobio:

29mfiori mmɔ ebiet eke uman lion, mmɔ efiori nte mkparawa lion: eyenyuŋ ekuni, enyuŋ emum unam, enyuŋ emen enye enyɔŋ ke ifure, baba owo kiet eke anyaŋade idinyuŋ iduhe.

30Ndien enye eyekuni enye ke usen oro, kpa nte inyaŋ ibom oyomode: enye eyenyuŋ ese obot, ndien, sese, ekim! nnanenyin, ye uŋwana! ke okim ke mbubit enyɔŋ esie.