2 SAMUEL 13 - Efik Old Bible With Sectional Headings

Mbuk Ammon ye Tamar

1EDIKEM ke ŋkpɔ emi ema ekebe, Absalom eyen David enyene ediye eyeneka aŋwan ekere Tamar; ndien Amnon eyen David ama enye.

2Ndien esit ayat Amnon esin enye ɔdɔŋɔ abaŋa Tamar eyenete esie aŋwan: koro enye edide eyenɔwɔŋ: Amnon inyuŋ ikwe usuŋ nte anamde enye baba ŋkpɔ kiet.

3Amnon onyuŋ enyene ufan kiet, ekere Jonadab, eyen Shimeah, eyenete David: Jonadab onyuŋ edi ata ɔfiɔkŋkpɔ owo.

4Ndien enye ɔdɔhɔ Amnon, ete, Afo, eyen edidem, anam didie ɔdiɔk idem ntem kpukpru ini? Utiŋke unɔ mi? Ndien Amnon ɔdɔhɔ enye, ete, Mmama Tamar, eyeneka Absalom eyenete mi.

5Ndien Jonadab ɔdɔhɔ enye ete, Suhɔre na ke bed fo, nam nte ɔdɔdɔŋɔ: ndien adaŋemi usɔ edide ndise fi, dɔhɔ enye, ete, Mbɔk yak Tamar eyenete mi edi edinɔ mi udia, onyuŋ etem udia ke iso mi, man nse enye, nnyuŋ mbɔ enye ubɔk ndia.

6Ntre ke Amnon ɔsuhɔre ana, onyuŋ anam nte ɔdɔŋɔde: ndien adaŋemi edidem edide ndise enye, Amnon ɔdɔhɔ edidem, ete, Mbɔk yak Tamar eyenete mi edi edisaŋ uyo iba ke iso mi, man mbɔ enye ke ubɔk ndia.

7Ekem David ɔdɔŋ ekedɔhɔ Tamar ke ufɔk, ete, Mbɔk, ka ke ufɔk Amnon eyen usɔ, ke tem udia nɔ enye.

8Ndien Tamar aka ke ufɔk Amnon eyenete esie; ndien enye anana. Ndien enye (Tamar) ada ndom, abuak ke mmɔŋ, obuen, onyuŋ anam uyo ke iso esie, onyuŋ asaŋ uyo oro.

9Ndien enye ada ŋkpɔ usaŋ uyo aŋwaŋa mmɔ ke iso esie; edi enye esin ndidia. Ndien Amnon ɔdɔhɔ ete, Yak kpukpru owo ewɔŋɔ ekpɔŋ mi. Ndien kpukpru owo ewɔŋɔ ekpɔŋ enye.

10Ndien Amnon ɔdɔhɔ Tamar, ete, Da udia di ke ubet, man mbɔ ke ubɔk fo ndia. Ndien Tamar emen uyo oro enye akanamde, ada ɔsɔk Amnon eyenete esie ke ubet.

11Ndien adaŋemi enye adade uyo ɔsɔk enye, ete, adia, enye omum enye, onyuŋ ɔdɔhɔ enye, ete, Di mfiɔk fi, eyenete mi.

12Ndien enye ete, Ih ih, eyenete mi kubiat mi; koro midige se ekam esinamde ke Israel: kunam oburobut ŋkpɔ emi.

13Ndien ami ndida but mi ŋka mmɔŋ? Afo eyenyuŋ edi nte oburobut owo kiet ke Israel. Mbɔk, bup edidem; koro enye midisinke fi inɔ mi.

14Edi enye inyimeke ndikop uyo esie: ndien koro ɔsɔŋde akan enye, asabare enye, onyuŋ ɔfiɔk enye.

15Ekem Amnon asua enye ata akamba usua eti-eti; usua emi enye asuade eyen oro onyuŋ okpon akan ima oro enye akamade enye. Ndien Amnon ɔdɔhɔ enye, ete, Daha ke enyɔŋ nyɔŋ.

16Ndien enye ɔbɔrɔ enye, ete, Kusin idiɔk ŋkpɔ odu eke okponde akan enye eken emi afo amanam mi, ke eribin mi mfep.

17Edi enye inyimeke ndikop uyo esie. Enye onyuŋ okot akparawa esie emi anamde ŋkpɔ ɔnɔ enye, ete, Mbufo enam ŋwan emi adaha ɔkpɔŋ mi, ɔwɔrɔ ke efak, enyuŋ ekɔbi enye usuŋ ke edem.

18Ndien Tamar esine ediye ɔfɔŋ-idem: koro nditɔ edidem iban eke edide nditɔwɔŋ ekam esinede oruk ewura oro. Ndien asaŋutom esie ada enye (Tamar) ɔwɔrɔ ke efak, onyuŋ ɔkɔbi enye esuŋ ke edem.

19Ndien Tamar ada ntan ŋko ɔduɔk ke ibuot esie, onyuŋ awai ediye edisine-ŋkpɔ oro enye esinede, onyuŋ odori ubɔk esie ke ibuot, asaŋa atua.

20Ndien Absalom eyeneka esie ɔdɔhɔ enye, ete, Nte Amnon eyenete mi okodu ye afo? Mbɔk, ndien, eyeneka mi, dop uyo: enye edi eyenusɔ: kukere ŋkpɔ emi. Ntre ke Tamar etie ke mfuhɔ ke ufɔk Absalom eyeneka esie.

21Ekem ke adaŋemi edidem David okopde kpukpru ikɔ emi, esit ayat enye eti-eti.

22Edi Absalom idɔhɔke baba ikɔ kiet ye Amnon eyenete esie, edide eti, onyuŋ edide idiɔk: koro Absalom asuade Amnon, koro enye akasabarede Tamar eyeneka esie.

23Edikem ke isua iba ema ekebe, Absalom enyene mme andifat idet erɔŋ ke Baal-hazor emi ekperede Ephraim: ndien Absalom okot kpukpru nditɔ-iren edidem edi.

24Ndien Absalom aka ɔkɔdɔhɔ edidem, ete, Mbɔk, sese, owo fo enyene mme andifat idet erɔŋ; mbɔk, yak edidem, ye ikɔt esie esaŋa ye owo fo eka.

25Edi edidem ɔdɔhɔ Absalom, ete, Ih ih, eyen mi, kunam nnyin kpukpru ika, mbak nnyin ididobi fi. Ndien enye (Absalom) iyire enye: edi enye inyimeke, ndika, edi ɔdiɔŋ enye.

26Ndien Absalom ɔdɔhɔ ete, Midige ntre, mbɔk, yak Amnon eyenete mi asaŋa ye nnyin aka. Ndien edidem ɔdɔhɔ enye, ete, Enye edinam didie asaŋa ye afo aka?

27Edi Absalom eyire enye; ndien enye ayak Amnon ye kpukpru nditɔ-iren edidem etiene enye eka.

28Ekem Absalom eteme mkparawa esie, ete, Mbufo ese ini eke wine edidukde Amnon idem, ndien adaŋemi ndɔhɔde mbufo, nte, Mbufo etɔ Amnon: ewot enye, ndien, ekufehe ndik: nte idige ami nteme mbufo: mbufo esɔŋ ubɔk, enyuŋ edi mbon uko.

29Ndien mkparawa Absalom enam Amnon, kpa nte Absalom eketemede mmɔ. Ndien kpukpru nditɔ-iren edidem edaha ke enyɔŋ, edoro ke mule mmɔ, enyuŋ efeŋe.

30Edikem, ke ini mmɔ edude ke usuŋ, etop oro osim David, ete, Absalom ama owot kpukpru nditɔ edidem, baba owo mmɔ kiet inyuŋ isuhɔke.

31Ndien edidem adaha ke enyɔŋ, awai edisine-ŋkpɔ esie, onyuŋ ɔsuhɔre ana ke isɔŋ; kpukpru ikɔt esie enyuŋ ewai edisine ŋkpɔ mmɔ eda do.

32Ekem Jonadab, eyen Shimeah eyenete David, ɔbɔrɔ ete, Kuyak ɔbɔŋ mi ekere ete ke kpukpru nditɔ edidem emekpaŋa; koro Amnon ikpɔŋ-ikpɔŋ amakpa: koro ema eduak ŋkpɔ emi ke uyo Absalom, toto ke usen oro enye akasabarede Tamar eyeneka esie aŋwan.

33Ɔbɔŋ mi edidem okukere, ndien, ŋkpɔ emi, ete ke kpukpru nditɔ edidem emekpaŋa: koro Amnon ikpɔŋ-ikpɔŋ amakpa.

34Ndien Absalom ɔbɔhɔ. Ekem eyen emi adade ekpeme, emenere enyin esie ese, ndien sese, ediwak owo ke esaŋa ke ŋkaŋ obot ke edem esie edi.

35Ndien Jonadab ɔdɔhɔ edidem, ete, Sese, nditɔ edidem ke edi: ke ekem ntre ke uyo owo fo.

36Edikem adaŋemi enye osuk ɔdɔhɔde ntem, sese, nditɔ edidem ediwɔrɔ, ndien mmɔ emenere uyo mmɔ etua eyet: edidem ye kpukpru ikɔt esie enyuŋ etua akamba eyet eti-eti.

37Ndien Absalom efehe aka ke ɔtɔ Talmai eyen Ammihur, edidem Geshur. David onyuŋ atua eyen esie kpukpru usen.

38Ntem ke Absalom efehe aka Geshur, onyuŋ oduŋ do ke ofuri isua ita.

39Ndien oro esin David edidem etre ndiwɔrɔ ŋkoyom Absalom: koro enye ama okokop ndɔŋesit abaŋa Amnon, koro enye ama akakpa.