1 ŊWED CORINTH 12 - Efik Old Bible With Sectional Headings

Mme Enɔ Emi Otode Edisana Spirit

1ŊKO, mmaŋa mbufo enana ifiɔk ebaŋa mme enɔ eke Spirit, nditɔ-ete mi.

2Mbufo emɔfiɔk ete, ke ini mbufo ekedide mme okpono-ndem, nyoŋ-esit ke adada mbufo oduyo ebine ndem emi edide imum.

3Kpasuk ntre ke nnam mbufo efiɔk ete, baba owo kiet eke etiŋde ikɔ ke odudu Spirit Abasi idɔhɔke ete, Osuk ɔdɔdiɔk ɔnɔ Jesus; owo inyuŋ ikemeke ndidɔhɔ ete, Jesus edi Ɔbɔŋ, ke midige ke Edisana Spirit.

4Edi mme enɔ edi nsio-nsio, edi Spirit edi kiet.

5Nsio-nsio usuŋ erinam ŋkpɔ enyuŋ edu, edi Ɔbɔŋ edi kiet.

6Nsio-nsio oruk utom enyuŋ edu, edi edi Abasi kiet esine kpukpru owo ke idem anam kpukpru ŋkpɔ.

7Edi eyak eriyarare Spirit enɔ owo kiet kiet, man kpukpru owo ekut ufɔn.

8Enɔ owo kiet ikɔ ɔniɔŋ, oto ke Spirit;

9enyuŋ enɔ enye eken ikɔ ifiɔk, kpa ke Spirit oro; enɔ owo efen mbuɔtidem, ke Spirit oro; enyuŋ enɔ enye eken ukeme ukɔk-udɔŋɔ, kpa ke Spirit kiet oro;

10enɔ owo efen ukeme ndinam utom-odudu; enɔ enye eken ukeme ndisiak uduak Abasi; enyuŋ enɔ enye eken ukeme ndidomo mme spirit mfiɔk; enɔ enye eken ukeme ndisem nsio-nsio oruk usem; enyuŋ enɔ enye eken ukeme ndikabare usem.

11Edi kpukpru oruk erinam oro ke edi Spirit kiet anam; Enye edeme ɔnɔ kpukpru owo kiet kiet nte Enye amade.

12Koro kpa nte ikpɔhidem edide kiet, onyuŋ enyenede ediwak ndido, ndien kpukpru ndido ikpɔhidem, eke ewakde, edide ikpɔhidem kiet, kpasuk ntre ke edi ye Christ.

13Koro ke Spirit kiet ke ema enim kpukpru nnyin baptism esin ke ikpɔhidem kiet, ye idide Jew inyuŋ idide Greek, idide ifin inyuŋ idide nditɔ: ema enyuŋ enam kpukpru nnyin iŋwɔŋ Spirit kiet isin ke idem.

14Koro ikpɔhidem idige ndido kiet, edi edi ediwak ndido.

15Ukot ɔkpɔdɔdɔhɔ ete, Sia mmendige ubɔk, ndige ubak ikpɔhidem, oro inamke enye etre ndidi ubak ikpɔhidem.

16Utɔŋ okponyuŋ ɔdɔdɔhɔ ete, Sia mmendige enyin, ndige ubak ikpɔhidem; oro inamke enye etre ndidi ubak ikpɔhidem.

17Edieke ofuri ikpɔhidem ekpedide enyin-enyin, erikop ikɔ enye? Edieke ofuri ikpɔhidem ekpedide utɔŋ-utɔŋ, erikop utebe enye?

18Edi nte edide ke emi, Abasi omobon kpukpru ndido kiet kiet ke ikpɔhidem nte enemde Enye esit.

19Edi edieke mmɔ kpukpru ekpedide ndido kiet, ikpɔhidem enye?

20Edi nte ŋkpɔ ebonode ke emi, ndido ewak, edi ikpɔhidem edi kiet.

21Enyin ikemeke ndidɔhɔ ubɔk, ete, Nyomke fi; ibuot inyuŋ ikemeke ndidɔhɔ ukot, ete, Nyomke mbufo.

22Edi akam ana nte mme ndido eke edide mmem-mmem ke enyin owo ekpedu ke ikpɔhidem:

23nnyin inyuŋ imen ukpono eke awakde akan inɔ mme ndido ikpɔhidem eke etiede nnyin nte mmɔ minyeneke ukpono; mme ndido eke miyehe enyuŋ ekabare enyene uyɔhɔ uyai;

24Edi mmɔ eke eyede iyomke ite ese ebaŋa mme imɔ. Edi Abasi okototim obok ikpɔhidem, emen ukpono eke awakde akan ɔnɔ mme ndido eke enanade ukpono;

25man eribahare okudu ke ikpɔhidem; edi man kpukpru ndido ekpekere kiet eken.

26Ntem edieke ndido kiet okopde ndutuhɔ kpukpru ndido eken etiene enye ekop ndutuhɔ; edieke enyuŋ enɔde ndido kiet ubɔŋ, kpukpru ndido eken etiene enye edara.

27Ntre ŋko ke mbufo edi ikpɔhidem Christ, kpukpru mbufo enyuŋ edi mme ndido Esie.

28Abasi okonyuŋ emek ndusuk owo onim ke ufɔk Esie; onim mme apostle nte ebe-iso, onim mme asiak-uduak-Abasi ke udiana-akpa itie, onyuŋ onim mme anditeme ke ɔyɔhɔ itie ita, ndien edinim mme anam-utibe-ŋkpɔ, ye mme ɔkɔk-udɔŋɔ, ye mme ɔnɔ-uŋwam, ye mme akama ŋkpɔ, ye mme esem nsio-nsio usem.

29Ndi kpukpru owo edi mme apostle? Ndi kpukpru owo edi mme asiak-uduak-Abasi? Ndi kpukpru owo edi mme anditeme? Ndi kpukpru owo edi mme anam-utibe-ŋkpɔ?

30Ndi kpukpru owo enyene ukeme ndinam udɔŋɔ okure owo eŋwen? Ndi kpukpru owo esem nsio-nsio usem? Ndi kpukpru owo ekeme ndikabare ikɔ eke esemde?

31Edi mbufo eyom enɔ eke ekponde ekan ke ofuri esit. Nnyuŋ mmana ŋwut mbufo usuŋ eke akande mmɔ eken kpukpru.