1ŊWED TIMOTHY 5 - Efik Old Bible With Sectional Headings

Ubiɔŋ-Utom Enyenede Enɔ Kiet Eken

1KUSƆŊƆ uyo usua unɔ ebi-owo, edi nɔ enye item nte ete, nyuŋ teme mkparawa nte nditɔ-ete:

2nɔ ŋkani iban item nte mme eka, nyuŋ teme mkparawa iban nte nditɔ-ete ke ata edisana ido.

3Kpono mme ebe-akpa emi edide mme ebe-akpa ke akpanikɔ.

4Edi edieke ebe-akpa enyenede nditɔ mme nditɔ nditɔ, yak mmɔ oro ekpep ndibem nnam se idotde ye mbon ufɔk, nnyuŋ nsio usiene nnɔ mme eka mmɔ; koro emi ɔfɔnde Abasi ke enyin.

5Edi ŋwan emi edide ebe-akpa ke akpanikɔ onyuŋ etiede ikpɔŋ ama odori enyin ke Abasi, onyuŋ eyire ke akam ye mkpe-ubɔk ke okoneyo ye uwemeyo.

6Edi ebe-akpa eke ɔduɔde oduk ke mbre amakpa ke eyo uwem.

7Nɔ uyo emi ndien, man mmɔ ekunyene se edoride mmɔ.

8Owo eke mitimke ŋkpɔ inɔ oruk esie, akpan-akpan mbon ufɔk esie, esiŋe nsa ye mbuɔtidem, onyuŋ ɔdiɔk akan owo eke minimke ke akpanikɔ.

9Kusin enyiŋ baba ŋwan kiet ke ŋwed nte ebe-akpa, ke enye misimke isua ata:

10Enye enyene ndidi ŋwan emi ɔkɔdɔde ebe kiet, onyuŋ enyene ndiwɔrɔ eti etop mbaŋa nti utom esie, ete edi ŋwan emi ɔkɔbɔkde nditɔ, okonyuŋ akamade isen owo, onyuŋ eyetde ukot ikɔt Abasi, onyuŋ aŋwamde mbon ukut, onyuŋ esinde idem anam kpukpru oruk nti utom.

11Kubɔ enyiŋ mme ebe-akpa eke edide mkparawa iban usin ke ŋwed; koro ke ini mme idiɔk itɔŋ mmɔ edudide mmɔ ekpɔŋ Christ, mmɔ eyeyom ndidɔ ndɔ:

12ntre ke ikpe eyebiom mmɔ, sia mmɔ ebiatde akpa ediomi ye Enye.

13Akan oro, mmɔ ekpep ndifu ifu, esaŋa ke ufɔk ke ufɔk: inyuŋ idige ifu ikpɔŋ, edi ekabare mbabara ye mbon ibaŋa, etiŋ se mmɔ mikpetiŋke.

14Nyom ndien mme ebe-akpa emi misɔŋke edɔ ndɔ, enyuŋ eman nditɔ, enyuŋ ekpeme ufɔk, ekunyuŋ enɔ mme asua ifet ndisuene nnyin:

15koro ndusuk mme ebe-akpa ema ewɔrɔ ekpɔŋ usuŋ etiene Satan.

16Edieke ŋwan emi onimde ke akpanikɔ enyenede mme ebe-akpa, yak enye aŋwam mmɔ, okufihe ufɔk Abasi ye mbiomo; man ufɔk Abasi ekeme ndiŋwam ata mme ebe-akpa.

17Yak ebat ete, mbiowo eke etimde ekara edot akwa utip; akpan-akpan mmɔ emi ekpade utom ke ukwɔrɔ-ikɔ ye ukpep-ŋkpɔ.

18Koro ŋwed Abasi ɔnɔ uyo ete, Kubɔp enaŋ inua ke ini enye edigide ibokpot; onyuŋ ɔdɔhɔ ete, Anam-utom odot ukpe-utom esie.

19Kukop ikɔ-edem eke etiŋde edian ebiowo, ibɔhɔke oto ke inua owo iba mme ita.

20Mmɔ emi enamde idiɔk-ŋkpɔ, sua nɔ mmɔ ke iso kpukpru owo, man mmɔ eken efehe ndik.

21Mmowuk fi ke iso Abasi, ye Christ Jesus, ye ndimek angel, nte afo ekpeme ndinam uyo emi; okubem iso obiom owo ke unana ntak, okunyuŋ anam baba ŋkpɔ kiet ke uma.

22Kusɔp udori owo ubɔk umen usin ke itie; kunyuŋ unyene udeme ke idiɔk-ŋkpɔ owo eŋwen. Nim idem edisana-edisana.

23Kuŋwɔŋ mmɔŋ-mmɔŋ aba, edi da wine esisit kabaŋa idibi fo ye unana nsɔŋidem eke ɔkɔbɔde fi.

24Idiɔk-ŋkpɔ ndusuk owo eyarare, ebem iso ewɔrɔ ubiere-ikpe; edi idiɔk-ŋkpɔ ke etiene ndusuk owo ke edem.

25Kpa ntre ŋko nti ido edu eke enade iŋwaŋ-iŋwaŋ; se minyuŋ inaŋa iŋwaŋ idikemeke ndidibe.