2 CHRONICLES 29 - Efik Old Bible With Sectional Headings

Ukara Hezekiah ke Judah

1HEZEKIAH ada ubɔŋ ke ini enye osimde isua edip ye ition, ndien edi edidem ke Jerusalem ke isua edip ye usukkiet.

2Ndien enyiŋ eka esie ekere Abijah eyen Zechariah. Ndien enye anam se inende ke iso Jehovah, kpa nte ete esie aka-namde kpukpru ŋkpɔ.

3Ke akpa isua ubɔŋ esie, ke akpa ɔfiɔŋ, enye eberede mme itim ufɔk Jehovah, onyuŋ ɔdiɔŋ mmɔ.

4Enye onyuŋ ada mme oku ye mme Levite edi, onyuŋ obon mmɔ ke aŋwa ke edem usiaha-utin;

5ndien ɔdɔhɔ mmɔ, ete, Mbufo mme Levite ekop uyo mi, enam ndien idem mbufo esana, enyuŋ enam ufɔk Jehovah Abasi mme ete mbufo asana, enyuŋ esio ɔkɔp ke edisana ebiet efep.

6Koro mme ete nnyin ekeduede, enyuŋ enam idiɔk ke iso Jehovah Abasi nnyin, enyuŋ ekpɔŋ enye, enyuŋ ewɔŋɔre iso mmɔ ekpɔŋ ebiet iduŋ Jehovah, enyuŋ ekpa edem.

7Mmɔ ema enyuŋ ekɔbi usuŋ etehe, enyuŋ enime mme utuenikaŋ, enyuŋ etre ndifɔp incense, inyuŋ iwaha edifɔp uwa ke edisana ebiet inɔ Abasi Israel.

8Mmɔdo iyaresit Jehovah odorode Judah ye Jerusalem, enye onyuŋ esin mmɔ ke afanikɔŋ, ye ke mkpaidem, ye ke nsi, kpa nte mbufo ekutde ye enyin mbufo.

9Ndien, sese, mme ete nnyin emeduɔŋɔ ke ofut, mmɔ enyuŋ etaŋ nditɔ-iren nnyin, ye nditɔ-iban nnyin, ye iban nnyin, efep, ebaŋa ŋkpɔ emi.

10Ndien odu mi ke esit ndidiomi ye Jehovah Abasi Israel, man ikaŋ iyaresit esie ɔwɔŋɔre ɔkpɔŋ nnyin.

11Mbufo, nditɔ mi, ndien, ekunam nditi-nditi: koro Jehovah emekde mbufo, ete eda imɔ ke iso, enyuŋ enam ŋkpɔ imɔ, enyuŋ edi mme asaŋutom imɔ, ye mme ɔfɔp-uwa imɔ.

12Ndien mme Levite edaha ke enyɔŋ, Mahath eyen Amasai, ye Joel eyen Azariah, emi otode ke nditɔ mme Kohathite; ye eke nditɔ Merari; Kish eyen Abdi, ye Azariah eyen Jehallelel; ye eke mme Gershonite; Joah eyen Zimmah, ye Eden eyen Joah;

13ye eke nditɔ Elizaphan; Shimri, ye Jeuel: ye eke nditɔ Asaph; Zechariah ye Mattaniah;

14ye eke nditɔ Heman; Jehuel ye Shimei: ye eke nditɔ Jeduthun; Shemaiah, ye Uzziel.

15Ndien mmɔ ebon nditɔ-ete mmɔ, enyuŋ enam idem mmɔ esana, enyuŋ edi nte edidem okowukde ke uyo Jehovah, edinam ufɔk Jehovah asana.

16Ndien mme oku eduk ke esit-esit ufɔk Jehovah, enyuŋ enam enye asana, mmɔ enyuŋ esioŋo kpukpru ndek-ndek ŋkpɔ eke mmɔ ekutde ke temple Jehovah, ekenim ke okure ufɔk Jehovah. Ndien mme Levite ebɔ enye ewɔrɔ eka ke itihere Kidron ke edem obio.

17Ndien mmɔ etɔŋɔ ndikpɔri ke akpa usen akpa ɔfiɔŋ ndien esim etehe Jehovah ke ɔyɔhɔ usen ɔfiɔŋ itiaita: ntre ke mmɔ eda usen itiaita enam ufɔk Jehovah asana; ndien mmɔ ema ke ɔyɔhɔ usen efurekiet ke akpa ɔfiɔŋ.

18Ekem mmɔ eduk ke ɔtɔ edidem Hezekiah ekedɔhɔ, ete, Nnyin imenam ofuri ufɔk Jehovah asana, ye itie edifɔp uwa, ye kpukpru mkpoduoho esie, ye okpokoro udori uyo, ye kpukpru ŋkpɔ esie.

19Ndien ŋko kpukpru ŋkpɔ utom emi edidem Ahaz ke ini ubɔŋ esie akabiatde ke oburobut ido esie, ke nnyin itim, inyuŋ inam esana, ndien, sese, mmɔ ke ena ke iso itie-uwa Jehovah.

20Ekem Hezekiah edidem abak adaha ke enyɔŋ, onyuŋ obon mme ebio-owo obio, ɔdɔk ke ufɔk Jehovah.

21Ndien mmɔ eda enaŋ itiaba, ye okukim erɔŋ itiaba, ye nditɔ erɔŋ itiaba, ye okpo-ebot itiaba edi ke uwa idiɔk ido itie edidem, ye eke edisana ebiet, ye eke Judah. Enye onyuŋ ɔdɔhɔ nditɔ Aaron mme oku, ete ewa mmɔ ke itie uwa Jehovah.

22Ndien mmɔ ewot enaŋ oro, mme oku enyuŋ ebɔ iyip, ekesime ke itie-uwa; mmɔ enyuŋ ewot mme okukim, enyuŋ esime iyip mmɔ ke itie uwa: enyuŋ ewot nditɔ erɔŋ, enyuŋ esime iyip mmɔ ke itie-uwa.

23Ndien mmɔ eda okpo-ebot uwa idiɔk ido edi ke iso edidem ye ofuri esop; ndien mmɔ eda ubɔk mmɔ edori mmɔ ke idem;

24ndien mme oku ewot mmɔ, enyuŋ eda iyip mmɔ esime ke itie-uwa ebaŋa mme idiɔk ido, man esio isop enɔ ofuri Israel: koro edidem ɔdɔhɔde, ete ke edifɔp uwa ye uwa idiɔk ido ebaŋa ofuri Israel.

25Enye onyuŋ onim mme Levite ke ufɔk Jehovah, ekama cymbal, ye psaltery, ye harp, ke ewuhɔ David, ye ke eke Gad okutŋkukut edidem, ye ke eke Nathan prophet; koro ewuhɔ oro okotode Jehovah, ke ubɔk mme prophet esie.

26Ntre ke mme Levite ekama ŋkpɔ-mbre David eda, mme oku enyuŋ ekama mme ukorowo.

27Ndien Hezekiah ɔdɔhɔ mmɔ, ete ewa edifɔp uwa ke itie-uwa. Ndien ke ini edifɔp uwa ɔtɔŋɔde, ikwɔ Jehovah onyuŋ ɔtɔŋɔ, ye mme ukorowo, esaŋa ye ŋkpɔ-mbre David edidem Israel.

28Ndien ofuri esop etuak ibuot, mbon-ikwɔ enyuŋ ekwɔ, mme andifuri enyuŋ efuri ukorowo; enam kpukpru ŋkpɔ emi, tutu ema edifɔp uwa.

29Ekem ke ini mmɔ emade edifɔp uwa, edidem ye kpukpru mmɔ eke edude ye enye etɔŋɔ edɔŋ, enyuŋ etuak ibuot.

30Ndien Hezekiah edidem ye mme etubom edɔhɔ mme Levite, ete eda ikɔ David, ye eke Asaph okutŋkukut, etoro Jehovah. Ndien mmɔ etoro ke idaresit, enyuŋ enuhɔ, enyuŋ etuak ibuot.

31Ndien Hezekiah ɔbɔrɔ ete, Ke emi mbufo emeyɔhɔ ubɔk mbufo enɔ Jehovah, mbufo esaŋa ekpere, enyuŋ eda uwa emem ye uwa ekɔm eduk ke ufɔk Jehovah, Ndien mbon esop eda uwa emem, ye uwa ekɔm, edi; kpukpru owo eke esit mmɔ onyimede, enyuŋ eda edifɔp uwa edi.

32Ndien ibat edifɔp uwa eke mbon-esop edade edi, osim enaŋ ata ye duop, ye okukim ikie, ye nditɔ erɔŋ ikie iba: mmɔ emi kpukpru edi edifɔp uwa Jehovah.

33Mme edisana ŋkpɔ enyuŋ edi enaŋ ikie itiokiet, ye tɔsin ŋkpri ufene ita.

34Edi mme oku iwakke, ndien mmɔ ikwe nte esioŋode kpukpru edifɔp uwa ikpa efep: ndien nditɔ-ete mmɔ, mme Levite, ebɔ mmɔ ubɔk utom, tutu ema utom oro, tutu mme oku enyuŋ enam idem mmɔ esana: koro mme Levite enende ke esit ekan mme oku, ke erinam idem mmɔ esana.

35Ndien ŋko mme edifɔp uwa ewak, ye ikpɔŋ uwa emem, ye ediŋwɔŋ ŋkpɔ, edifɔp uwa. Ntem ke mmɔ etim unamŋkpɔ ufɔk Jehovah.

36Ndien Hezekiah ye kpukpru owo edara, koro Abasi okotimde kpukpru owo: koro ŋkpɔ oro edide ŋwara-ŋwara.