EZEKIEL 38 - Efik Old Bible With Sectional Headings

Ezekiel Etiŋ Prophecy Abaŋa Gog

1EDIKEM uyo Jehovah osim mi, ete, Eyen owo, wuk iso fo se Gog, isɔŋ Magog, ɔbɔŋ Rosh, Meshech, ye Tubal,

2nyuŋ tiŋ prophecy baŋa enye;

3nyuŋ dɔhɔ ete, Ntem ke Ɔbɔŋ Jehovah ɔdɔhɔ, ete, Sese, ami mmɔŋ nnam ikɔ ye afo, Gog, ɔbɔŋ Rosh,

4Meshech, ye Tubal: ndien nyenam afiak edem, nnyuŋ nsin fi uwam ke mbaŋ, nnyuŋ nsio fi ye ofuri udim ekɔŋ fo mfep, mme horse, ye mbio horse, kpukpru mmɔ esine ŋkpɔ-ekɔŋ eke efɔnde ema, akwa otu owo, enyene ikpɔ ye ŋkpri otu-ekɔŋ, kpukpru mmɔ enyuŋ ekama ofut ke ubɔk:

5Persia, ye Ethiopia (Cush), ye Put edu ye mmɔ; kpukpru mmɔ enyene otu-ekɔŋ ye ndun-ukwak:

6Gomer ye kpukpru mme udim esie: ufɔk Togarmah ke ata esit edere ye kpukpru mme udim mmɔ: ata ediwak owo edu ye afo.

7Tim idem fo eti-eti, afo ye ofuri udim fo, emi ebonode ke ɔtɔ fo, nyuŋ di andikpeme mmɔ.

8Ke ediwak usen ema ebe eyenim fi ke etubom: ke utit mme isua oro afo eyesim idut emi ekesiode enye efep ke ubɔk ofut efiak edi, emi eketaŋde ke ediwak mme idut ebon, ke enyɔŋ obot Israel, emi ekedide nditaha kpukpru ini: edi esioŋo mmɔ ke mme idut efep, kpukpru mmɔ enyuŋ eduŋ ke ifure.

9Ndien afo eyedɔk nte oyobio, eyedi nte obubit enyɔŋ, eyedi se ifukde isɔŋ, afo ye kpukpru mme udim fo, ye ediwak owo ŋko.

10Ntem ke Ɔbɔŋ Jehovah ɔdɔhɔ ete, Ama ekem ke usen oro, ŋkpɔ eyeduk fi ke esit, ndien afo eyekere idiɔk ekikere; ndien afo eyedɔhɔ, ete,

11Nyedɔk ke isɔŋ obio iŋwaŋ; nyesim mmɔ eke etiede ke ifure, emi eduŋde ke ndueidem, kpukpru mmɔ eduŋ enana ibibene, eto usuŋ ye itim inyuŋ iduhe,

12ete ibume mbume, inyuŋ iwo ŋwo, inyuŋ ikabare ubɔk imɔ idori mme ŋwure emi eduŋde, inyuŋ isim mbio emi eketaŋde ke mme idut ebon, emi ekɔde ufene ye inyene, emi eduŋde ke ufɔt ererimbot.

13Sheba, ye Dedan, ye mbon-urua Tarshish, ye kpukpru mkparawa lion esie eyedɔhɔ fi, ete, Nte afo emedi ndibume mbume? Nte omobon udim fo ndiwo ŋwo? ete itaŋ silver ye gold inyɔŋ, ida ufene ye inyene, inyuŋ ibume akamba mbume?

14Enyen owo, tiŋ ndien prophecy, nyuŋ dɔhɔ Gog, ete, Ntem ke Ɔbɔŋ Jehovah ɔdɔhɔ, ete, Nte afo udufiɔkke ke usen eke ikɔt mi Israel ediduŋde ke ifure?

15Ndien afo eyeto ke ebiet fo ke ata esit edere, afo ye ediwak owo ŋko, kpukpru mmɔ edoro ke horse, akamba udim, ye ediwak otu owo:

16afo eyenyuŋ ɔdɔk edi ekɔŋ ye ikɔt mi Israel, ebiet obubit enyɔŋ edifuk isɔŋ: edidi ke ini iso, nyenyuŋ nda fi nduk ke isɔŋ mi, man mme idut efiɔk mi, ke ini ndade fi Gog ŋwut nte nsanade ke enyin mmɔ.

17Ntem ke Ɔbɔŋ Jehovah ɔdɔhɔ, ete, Nte afo edi enye emi ŋkɔdɔhɔde ke ini eset, ke ubɔk ikɔt mi mme prophet Israel emi eketiŋde prophecy ke ini oro, ofuri isua, ete ke ndida fi ntiene mmɔ?

18Ɔbɔŋ Jehovah ɔdɔhɔ ete, Ama ekem, ndien, ke usen oro, ke usen eke Gog edidide ekɔŋ ke isɔŋ Israel, ifuresit eyeduk mi ke ibuo.

19Nyenyuŋ nda ufup mi, nda ikaŋ ifuresit mi ndɔhɔ, nte, Akamba unyek-isɔŋ iditreke ke isɔŋ Israel;

20ndien iyak ke mmɔŋ, ye iunen enyɔŋ, ye unam ikɔt, ye kpukpru mme andinyɔni emi enyɔnide ke isɔŋ, ye kpukpru owo emi edude ke iso ererimbot, eyenyek idem ke iso mi; ndien ikpɔ obot ewure; ŋkokoŋo itiat enyuŋ eduɔŋɔ, kpukpru ibibene enyuŋ eduɔŋɔ ke isɔŋ.

21Ɔbɔŋ Jehovah ɔdɔhɔ ete, Ami nnyuŋ ŋkot ofut edi etiene enye ke kpukpru ikpɔ obot mi; ofut kiet eyesobo ofut eken.

22Ndien nyeda idiɔk udɔŋɔ ye iyip ŋkpe ikpe ye enye; nnyuŋ nnam akwa edim, ye edim itiat, ye ikaŋ, ye brimstone, edep enye ke idem, ye ke idem mme udim esie, ye ke idem ediwak mme idut emi edude ye enye.

23Ami nyenyuŋ nnim idem mi ke akwa ye ke edisana, nnyuŋ nnam mmɔ efiɔk mi ke enyin ediwak mme idut. Ndien mmɔ eyefiɔk ete ke ami ndi Jehovah.