ISAIAH 22 - Efik Old Bible With Sectional Headings

Etop Abaŋade Nsobo Jerusalem

1UYO Abasi emi abaŋa ebedeŋ ŋkukut. Nsinam fi ndien, eke kpukpru mbufo edɔkde ke enyɔŋ ɔkɔm ufɔk?

2Ɔyɔhɔ-ntime, ama-iwok obio, obio mbre: idige ke ofut ke ekewot nditɔ fo emi ewotde, mmɔ inyuŋ ikpaŋake ke ekɔŋ.

3Kpukpru mme etubom fo efehe ɔtɔ kiet; ebɔp mmɔ, idige ke utiga: eda kpukpru nditɔ fo eke mmɔ ekutde ebɔp ɔtɔ kiet, mmɔ eto ke anyan ebiet efeŋe.

4Mmɔdo ndɔhɔde, nte, Mbufo ekabare ekuse mi; yak ntua ndot-ndot eyet, mbufo ekuŋwana ndidɔŋ mi esit mbaŋa nsobo eke esobode adiaha mbio-obio nnyin.

5Koro Ɔbɔŋ Jehovah mme udim onimde usen ndutime, ye eke udigi, ye eke nnanenyin ke ebedeŋ ŋŋkukut, ke ewuri ibibene, ke eseme enɔ ikpɔ obot.

6Ndien Elam akama odibe-idaŋ ke chariot, ye mme asaŋa ikpat, ye mme odoro horse, Kir onyuŋ ɔfuhɔre otu-ekɔŋ.

7Edikem, mme chariot eyɔhɔ ke ata nti ebedeŋ fo, mbio horse enyuŋ etuak eda ekpere inua-otop.

8Ndien efuhɔre Judah ufuhɔ-ŋkpɔ; ndien afo etiŋ enyin ke ŋkpɔ-ekɔŋ ufɔk akai ke usen oro.

9Mbufo emenyuŋ ekut ebiet obio David emi ewurede, nte ewakde: enyuŋ ebon mmɔŋ mkpɔdiɔhɔ-mmɔŋ ke usuhɔre.

10Mbufo emenyuŋ ebat mme ufɔk Jerusalem, enyuŋ ewuri ufɔk, man eda ediɔŋ ibibene.

11Mbufo emenyuŋ enam mkpɔdiɔhɔ-mmɔŋ ke ufɔt ibibene mbiba enɔ mmɔŋ akani mkpɔdiɔhɔ-mmɔŋ. Edi itiŋke enyin ke andinam enye, inyuŋ isehe Enye emi okobotde enye tutu ko.

12Ndien ke usen oro Ɔbɔŋ Jehovah mme udim okot eyet, ye eseme, ye ibɔ, ye ukune ɔfɔŋ-ikpo.

13Ndien sese mbre ye idara, ke ewot enaŋ, ke ewot erɔŋ, ke eta unam, enyuŋ eŋwɔŋ wine: “Eyak nnyin ita inyuŋ iŋwɔŋ, koro iyekpa mkpa mkpɔŋ.”

14Ndien Jehovah mme udim ayarare mi ke utɔŋ, ete, Ididahake do ke idiɔk ido emi inɔ mbufo tutu mbufo ekpaŋa mkpa. Ɔbɔŋ Jehovah mme udim ɔdɔhɔ ntre.

15Ntem ke Ɔbɔŋ Jehovah mme udim ɔdɔhɔ ete, Ka koduk ke ɔtɔ akama-ukpɔhɔre emi, ke ɔtɔ Shebna, emi akarade ufɔk, ete.

16Afo enyene nso mi? onyuŋ enyene anie mi, eke esinde fi otibi udi ɔnɔ idem fo mi? Enye otibi udi esiemɔ ke enyɔŋ, otuŋ iduŋ ke itiat ɔnɔ idem esie.

17Sese, Jehovah ɔmɔŋ ɔduɔk fi ɔkpɔsɔŋ eriduɔk, onyuŋ omum fi ata erimum.

18Enye eyesɔŋ afiak fi anam afiaha, nte nyuri eke ekpɔrɔde ke isɔŋ eke aŋwaŋade: do ke afo edikpa, do ŋko ke mme chariot ubɔŋ fo edika, afo but ufɔk usɔ!

19Nyenyuŋ nnuk fi ke itie fo mfep, nnyuŋ ndudi fi nsio ke idaha fo.

20Ndien ama ekem ke usen oro, nyekot owo mi Eliakim, eyen Hilkiah:

21ndien nyeda ekura fo nsine enye ke idem, nnyuŋ mbɔp enye ke ubɔp-isin fo, nnyuŋ nda ubɔŋ fo nsin enye ke ubɔk: ndien enye eyedi ete mme etubom Jerusalem, ye eke ufɔk Judah.

22Nyenyuŋ ndori enye ukpɔhɔre ufɔk David ke afara; ndien enye eyekpɔhɔre, ndien baba owo kiet idiberike; onyuŋ eberi, ndien baba owo kiet idikpɔhɔkede;

23nyenyuŋ ŋkɔŋ enye nte ntok nsin ke ɔkpɔsɔŋ ebiet: enye eyenyuŋ akabare edi ebekpo ubɔŋ ufɔk ete esie.

24Ndien mmɔ eyekɔŋ enye ofuri ubɔŋ ete esie ke idem, ubon ye nditɔ, kpukpru ŋkpri mkpoduoho, ɔtɔŋɔde ke mkpoduoho eke enimde ke cup, tutu osim ke kpukpru mkpoduoho eke enimde ke abaŋ.

25Uyo Jehovah mme udim edi emi: Ke usen oro eyedibere ntok eke ekekɔŋde esin ke ɔkpɔsɔŋ ebiet, enyuŋ esiak enye eduɔk ke isɔŋ; enyuŋ esibe mbiomo eke ɔkɔŋɔde ke esit efep: koro Jehovah ɔdɔhɔde.